سرحان ونفيسة في مجلة كلمتنا..

سرحان ونفيسة في مجلة كلمتنا..ياريتني كنت معاهم !
خلال الفترة الماضية، زادت مسابقات الفضائيات، وكان من أشهرها المسابقة اللي حلها إنك تعرف ليه "نفيسة" ماماتتش.. وبعدها قرر "سرحان" يسيب نفيسة تعيش في "سيت كوم" جديد، اتعرفنا فيه على "بيومي وعسران وشمندي ونسمة وتوحة"، وعشان هم شباب إيجابي، ودمهم خفيف جدا، كان لازم يبقوا ضيوفنا في "مجلة كلمتنا"، وعملوا لنا مفاجأة جامدة جدا.. حلقة من "سرحان ونفيسة" عن "كلمتنا و TeenStuff"، تعالوا نشوف حوارنا معاهم عامل إزاي.
في البداية عايزين نتعرف عليكم
سارة.. كلية آداب إعلام، قسم علاقات عامة وإعلان.
شاهيناز.. فنون جميلة.
عمرو كمال.. 28 سنة خريج فنون جميلة.
نهى، 22 سنة، وانضميت للفريق مؤخرا.
مها، فنون جميلة، درست جرافيك شعبة تصميمات، ولسه برده منضمة لفريق العمل قريب.
رغدة، فنون جميلة، قسم رسوم متحركة.
في بداية ظهوركم ماخفتوش من المقارنة مع (كرومبو)؟
لأ؛ لأن الفكرة والشخصيات مختلفة، التشابه الوحيد إن دى كانت مسابقة ودي مسابقة.
إزاي عملت المسابقة مع موجة كوميدي؟
الشركة المنافسة للشركة اللي عملت كرومبو، كانت تبع موجة كوميدي، وحبوا يعملوا مسابقة كوميدية، والفكرة كانت في دماغي من الأول.
هي المسابقات دي مربحة قوي كده؟
بالنسبة للشركات، مربحة جدا طبعا، بس بالنسبة لنا، بنديهم العمل الفني ومالناش دعوة بقى.. كسبوا ولا خسروا، وبصراحة كتر المسابقات دلوقتي وتدخل الشركات، هو اللي خلاني أسحب نفسي منها.
إيه المشاكل اللي واجهتكم في البداية؟
الحاجات اللي اتكتبت في الجرايد، من نوعية إننا بنضرّ الأمن، وإن سرحان ونفيسة سببوا مشكلة للأطفال، لدرجة إن جريدة مرة قالت إن إحنا السبب في حادثة حصلت في الأزهر وقتها، عشان كان فيه حلقة..سرحان بيرمي صاروخ على نفيسة، وقالوا إن الصاروخ في الأزهر اترمى بنفس الطريقة!! يعني كلام يودّي ورا الشمس، من ناس فاضية بتقول أى كلام، عشان مش لاقية حاجة تعملها!
هل قرار المهندس أسامة الشيخ - رئيس قطاع القنوات المتخصصة- بمنع عرض الحلقات، هو اللي خلاكم تحولوها لسيت كوم؟
إحنا ما غيرناش الفكرة عشان النقد، بالعكس، إحنا اتشجّعنا أكتر، وقررنا نحولها لسيت كوم.. لأن أساليب القتل كلها خلصت خلاص، وحسينا الموضوع لو زاد عن كده هيبقى ممل، فكان لازم نعمل حاجة جديدة، وكمان من الأول كنا بنحضّر لها عشان المسلسل، فلما جت حكاية المسابقة، قلنا كويس عشان الناس تعرف الشخصيات قبل المسلسل.
عمرو إنت المخرج والمؤلف وبتعمل كل الشخصيات ما عدا نفيسة، بتعمل ده إزاي؟
الحمد لله بتوفيق من ربنا سبحانه وتعالى..والموضوع خد وقت في الأول عشان التحضير وتظبيط الأصوات، بس الحمد لله قدرت أوصل للي أنا عايزه، وأنا من البداية كنت محضّر كل شخصية بشكلها وصوتها، وكانت زوجتي بتساعدني في الأفكار، وبعد كده هي اللي عملت صوت نفيسة.
بتراعي في الإفيهات اللي بتكتبها إن مايكونش فيها إيحاءات خارجة؟
هو ساعات فيه حاجات بتفلت مننا، بس طبعا بنراعى إننا نبعد عن الإيحاءات دى، عشان ما يصحش، وفى الأول والآخر إحنا بنقدّم شخصيات كرتون.
مافكرتوش ليه تعملوا سرحان ونفيسة بالشكل الكرتوني المعروف؟
عشان تقليدي.. وبعدين لما تبقى حاجة بسيطة ومحققة نجاح، أحسن ما تبقى مبالغ فيها وماتحققش أي نجاح.
إمتى مصر تقدر تنافس الكرتون العالمي؟
مصر مقارنة بالوطن العربي، متقدّمة قوى في المجال ده.. بس بالنسبة للعالم، فإحنا لسّه عايزين وقت، وإمكانيات.
إزاى ممكن أعمال زى سرحان ونفيسة تساهم في تغيير مجتمع أو التأثير فيه؟
الفكرة إنك لما تعملي عمل يشد الناس، ممكن وقتها تأثرى فيهم، وطالما الشخصية اتحبت، فممكن من خلالها توصلى هدفك، وتغيّري المجتمع بالفن.
إيه الخطوات اللي بتمروا بيها عشان تطلّعوا لنا حلقة؟
فيه أفلام ما بكونش شفتها من فترة، فبضطر أشوفها تاني، وأشوف المشاهد المؤثرة في الفيلم وأرتبها، وأمسك مشهد مشهد، وأبني عليه الحلقة بتاعتي، وبعد ما بنخلّص الكتابة، بنسجل الصوت ونقطعه "شوتات"، والشخصيات كده كده مرسومة وجاهزة عندنا، وبنبدأ نحركها، ونبني الديكور 3D ونشتغل عليها، وبعد كده بنخرَّج الشغل وندخله المونتاج، وبيخرج الشغل اللي بتشوفوه، والحلقة الواحدة بتاخد مننا أسبوع شغل.
هنشوف الجزء التاني من سرحان ونفيسة في رمضان؟
لأ، مش هنلحق رمضان، لأن قدامنا حوالي أربع شهور عشان نخلص الجزء التاني.
كلمونا عن مشروعكم الجاي؟
مشروع ديني، مش كوميدي المرة دي، وهيبقى مختلف عن سرحان ونفيسة، هيكون فيه شخصيات كتير جدا، وهيبقى ليها علاقة بالحروب، وطبعا مش هعرف أعمل أصوات الشخصيات كلها بنفسي.
عايزين نعرف مواهبكم ونفسكم تحققوا إيه قدام؟
سارة: بحب الكتابة قوى، وعايزة يكون لي برنامج من إعدادي، الناس كلها تكون عارفاه.
عمرو: موهبتي الرسم طبعا، ونفسي أكبّر شركتي، وتبقى شركة ليها اسم، وطبعا نفسي بنتي تبقى أحسن واحدة في الدنيا.
شاهيناز: الرسم والجرافيكس، وعايزة أتعلم أكتر في مجالي، ويكون ليا شخصية كرتونية بتنافس على المستوى العالمي.
نهى: الكتابة، وبحب شغل الإذاعة، ونفسي نوصل لمرحلة إننا نعمل فيلم زي "أفاتار"، ونتكرم في الأوسكار.
مها: الرسم طبعا، وبحب الرسم الأكاديمي، وبعمل تمهيدي ماجستير، وعايزة أدرس في الجامعة، ونفسي أعمل معرض ليا اسمه "مستر آند مسز عتريس"، ويبقوا شخصيات مصرية دمها خفيف، عشان أقدم الرسم الأكاديمي بشكل ظريف.
رغدة: الرسم برضه، وبحب الموسيقى جدا، ونفسي أتعلّمها، وعايزة أشتغل في الرسوم المتحركة، وأعمل حاجة فيها تسيب أثر وتعيش كتير، زي بوجي وطمطم كده زمان.
نشر في شهر 8 -2010 في مجلة كلمتنا