غادة عبد الرازق: حكاية الست التي تعيش لبيتها وأولادها "انتهت "!

رغم حالة الجدل والشد والجذب طوال شهر رمضان ومع بداية عرض " زهرة و أزواجها الخمسة " .. لكن لا أحد ينكر أن المسلسل حظى بمعدل مشاهدة كبير ويعتبر " محطة فاصلة في مشوار بطلته غادة عبد الرازق .. تعالوا نتكلم معها في البداية عن شهر رمضان وأهم النجوم الذين تابعت أعمالهم ..
تصوير : محمد عمر
* كل سنة وانت طيبة .. ما هي طقوسك التي حرصت عليها خلال الشهر الكريم؟
قبل الافطار " الدنيا بتكون فاصلة عندي " ..أصلي واقرا قرآن ، لكن بعد الافطار ولو روتانا موجودة في مصر لازم نخرح نروح خيم رمضانية نسهر حتي السحور .. لكن لو روتانا مش معي بجلس في البيت اقلب في قنوات التلفزيون اتفرج علي مقاطع من المسلسلات .
* ومن النجوم الذين حرصت علي متابعة مسلسلاتهم في رمضان؟
مفيش حد معين .. أنا باخد من كل فيلم اغنية يعني مش بتابع عمل بالكامل لكن بشوف كل الاعمال وببدأ احكم لان العمل بيبان من عنوانه .
* كل اعمالك عليها نقد و كلام ... حتي المسلسل تعرض لهجوم شديد حتي من قبل عرضه فهل تتعمدين ذلك؟
اطلاقا لاني مش محتاجة أساليب رخيصة عشان اسوق اعمالي انا نجمة سعرها عالي وكمان الهجوم حصل علي الحاجة زهرة علي شيء اترد عليه من شيخ الازهر نفسه و الذي وافق علي المسلسل ... والله ساعات بحس ان النقاد مش لاقيين حاجة يقولوها شوية مخالف للدين وشوية مخالف للرقابة وفيه رقص وشوية نسخة من عائلة الحج متولي والمهم انه لا يوجد اي حاجة من دول في المسلسل .
* كم عملا لك تم رفع دعاوي قضائية عليه؟
تقريبا كلها قبل او اثناء تصويرها وفي الاخر بيطلع الموضوع علي فاشوش وأنا عادة لا أتأثر أبدا وكل ما يقلقني هو رد فعل الجمهور هذا ما يشغل بالي والحمد لله أنا راضية عنه للغاية تجاه الحاجة زهرة .
* ما الذي جذبك في الحاجة زهرة بالذات؟
العمل كله بجميع جوانبه من سيناريو واخراج وطاقم عمل هو كله علي بعضه مسلسل دمه خفيف بعيد عن الفذلكة الزائدة عن الحد حاجة خفيفة لطيفة لجمهور رمضان وفي نفس الوقت بنقدم رسالة وقضية .
وما الرسالة التي أردت توصيلها ؟
والله انا شايفة ان حكاية الست التي تعيش عشان بيتها وأولادها خلاص انتهت لان السيدات اصبحوا اقل تحملا لعبء الحياة ورخامة الرجال ومش كل الستات تعرف تخلع أزواجها لان هذا بيكون في طبقة الهاي كلاس فقط اما الطبقة الشعبية فالست يطلع عينها علشان تطلق .
احكي لنا عن أول وقفة أمام الرائع حسن يوسف ؟
في الاول كنت خايفة منه مش أنا وبس كلنا كنا نقعد نهزر ونيجي لحد عنده ونقف لكن مع الوقت وجدناه " إنسان محترم جدا " وبيفهم في جوهر الدين مش بالظاهر فقط يعني من الاخر هو حد مش متزمت ... وقد ابهرني اول ما وقف امام الكاميرا عنده حضور رهيب هو فعلا فنان ذو قيمة وبجد اسعدني ان اقف امامه في أول عمل اجتماعي كوميدي له واتمني الا تكون اخر مرة .
طب ايه في مدحت صالح؟
انا اصلا بحب مدحت كمطرب جدا و من جمهوره فعلا واسعدتني مشاركته البسيطة معنا في العمل بالرغم من بعده فترة عن الاعمال الدرامية هو إنسان متحضر ودمه هو كمان خفيف .
والزوج الخامس؟
ده هيكون مفاجاة للجمهور وهيظهر في الحلقة الاخيرة حد مستحيل تتخيلوه فمن النهارده لحد اخر حلقة عايزة كل الجمهور يفكر يا تري مين هو الزوج الخامس .
هل صحيح انك تحضرين لرمضان المقبل من الان ؟
اه فعلا انا وافقت علي سيناريو مسلسل ' شباب امراة ' وهو ماخوذ عن قصة الفيلم الشهير والذي قامت ببطولته الفنانة تحية كاريوكا وشكري سرحان .
مش شايفة انه مبكر انك تحددين عمل رمضان المقبل و رمضان الحالي لم ينته بعد ؟
والله الفرصة لا تاتي للفرد الا مرة واحدة وانا اتحط تحت ايدي عمل جيد فأكيد مش هضيع الفرصة وعلي راي منير الفرصة بنت جميلة راكبة عجلة ببدال فلازم نلحقها قبل ما تطير .
( يمكنكم متابعة بقية الحوار كاملاً على صفحات مجلة الشباب عدد سبتمبر 2010)