بهاء الدين محمد يكتب : حصرياً تفاصيل الفيلم الهندي : البلطجي والمدرعة

بعضنا شاف فيديو شهادة أسرة قناة الحرة بعنوان "بلطجي هو من كان يقود مدرعة الجيش!!" هو في الحقيقة الفيديو بيتكلم أكتر عن كيف تم تدمير سيارات بعض أعضاء فريق العمل بالقناة، وكيف نجت عربية منهم!! ..والعجيب إنهم بيقولوا إن المدرعة كان بيقودها بلطجي!! طبعا بغض النظر عن تعريف كلمة بلطجي اللي أحيانا بتطلق على المتظاهرين والنشطاء وغيرهم.
سوري .... احترموا عقولنا ... وتعالوا معايا واحدة واحدة كده.. وبالعقل.
طبعا ناس كتير أول ما هتشوف الفيديو هتقول:
أوبااااااااااا .... وااااااااااااو.. شوفتوا ظهر الحق... ويقوم "مشّير" وننسى بقى اللي حصل!
واضح جدا تحيّز الشهود .. وتركيزهم على عربياتهم اللي اتكرست (زي ما بيقولوا) وعدم ذكرهم أصلا لمن ماتوا، واضح كمان تركيزهم على مدرعة واحدة ولقطة معينة من المسلسل الدموي اللي كلنا شفناه.. ومستشهدين بمذيع قناة الإعلام الحكومي !!!!
طيب هل يعقل إن بلطجي يقدر يسيطر على مدرعة وياخدها من جنود مسلحين بالرشاشات؟؟؟ ولا إنتوا فاكرين الجنود اللي جوا المدرعة (وفي ظل ظروف التوتر دي) هيبقوا ماسكين في إيديهم كوباية نسكافيه مثلا؟
طيب يا ترى لو البلطجي عنده من القوة المسلحة والجبروت ما يمكنه من السيطرة على المدرعة.. ليه ماقتلش حد بالقوة المسلحة دي، سواء للحصول على المدرعة أو لتنفيذ مخططه بقتل المتظاهرين وإحداث الفتنة؟
ولو عنده الذكاء الخارق مما يجعله يسيطر على المدرعة ويستخدمها في قتل المتظاهرين (بالمدرعة وليس بالرصاص)، علشان يبان بعد كده إنه حادث تصادم وليس قتل عمد ومباشر بالرصاص!!! يبقى ليه ماحدش من الجيش نفسه (المتهم بالقتل) دافع عن الجيش وقال ده بلطجي إهئ إهئ خد مننا المدرعة إهئ إهئ وموّت الناس!
ولو فعلا حدث هذا، فهل يعد مبررا؟ هل يمكن قبول عذر إن الجيش مسلّمينه مدرعة مش عارف يحميها من بلطجي؟؟
وهل يا ترى المدرعتين تم السيطرة عليهم هم الاتنين في نفس الوقت برضه بالبلطجية؟!
ويا ترى البلطجية (ده بافتراض يعني ..ماتصدقش) بعد ما نفذوا المؤامرة راحوا فين ؟! هل اتقبض عليهم؟! هل نجحوا في الهرب؟! هل خدوا المدرعتين وراحوا يبيعوهم خردة ولا يتمشوا بيهم لحد كورنيش المعادي؟ ولا طلعوا بيهم ع المقطم يقضوا سهرة جميلة ويضربوا صاروخين تحية؟!
طيب هو مين أصلا البلطجي ؟؟؟ هل مثلا من المتظاهرين؟ طيب هل لو من المتظاهرين .. بعد ما سيطر ع الدبابة قال أما أموّت المتظاهرين اللي معايا؟!
إيه هو إحنا مجانين يعني علشان نصدق السذاجة دي؟!
بالله عليكم احترموا عقولنا!
وطبعا كلامي غير موجه لمن شيّر الفيديو .... كلامي لمنتجي هذا الفيلم الهندي اللي ينفع يبقى جزء جديد من لعبة GTA.
الداخلية قدمت معلومات نشرتها المصري اليوم بتقول فيها: "أعمال الشغب راح ضحيتها 25 قتيلا، وأصيب 329 من الشرطة والجيش والمتظاهرين"، عادي لما نجمع قتلى وجرحى المتظاهرين والجيش والشرطة ما هو كلنا مصريين (إيد واحدة بقي).
إنما الغريب فيما نشر إن الخبر بيكمل: " كان من بين ضحايا الأحداث مجند بقطاع الأمن المركزى، كان فى إجازة رسمية، وخرج للتظاهر مع أقاربه"، يعني مش بعيد بقى يكون "المتظاهرين" كانوا قوات جيش وشرطة في زي مدني وقتلوا نفسهم أو كانوا بيعملوا بروفة مسرحية ضمن الاحتفالات بذكرى نصر أكتوبر!!!
ومش بعيد برضه يبقى المتظاهرين (اللي طلعوا من قوات الأمن المركزي) هم اللي جيش وشرطة، وإن الجيش والشرطة اللي شفناهم هم اللي متظاهرين مدنيين لكن بزي عسكري ... وإيه المشكلة ما إحنا شفنا المشير لابس بدلة !!