فركش

كان فين.. ده كله

** إيه اللي سينا كانت شايلاه في بطنها ده.. أطنان الأسلحة والذخيرة المتنوعة والمتفجرات والعبوات الناسفة والمخدرات ومئات الأوكار والمخازن والبؤر والمخابئ والأنفاق والعربيات المفخخة.. ده غير المجرمين والإرهابيين والتكفيريين..يا خبر إسود إيه ده كله وكان مستخبي فين وعند مين وإزاي وليه وبكام.. واللي يرعب ويموت إذا ما كنش الجيش خد الشرطة في إيده ونزل دك في ولاد الكلب دول كان إيه اللي ممكن يحصلنا كمان سنة مثلاً.. بجد الحمدلله علي جيشنا.. واللي عجبني في الموضوع البيانات اليومية اللي بتتذاع ومعيشه الناس في جو الحرب بجد.. وعموماً هانت.. وقريب قوي هاتنضفي ياسينا من كل النجاسات وهاترجعي الأرض الطاهرة بتاعة الأنبياء.. وتحيا مصر.
تعالوا بقي ماننساش الدور العبقري اللي بتعمله الشئون المعنوية بقيادة المفكر والأديب والخبير الإعلامي اللواء محسن عبدالنبي.. الإدارة دي بقي بتشتغل حرب تانية خالص.. حرب بأسلحة الثقافة والإعلام والتوعية والخدمات للبلد وللناس.. وماينفعش الشكر علي واجب.. وكل التحية لصاحب قرار إذاعة أغنية الصاعقة "قالوا إيه علينا" في طابور الصباح بالمدارس.. ومنظر التلامذة يفرح القلب بملابس الصاعقة واللا براعم الحضانة وهمه بيغنوها.. الأغنية بقت نشيد قومي.. وأهلاً بالانتماء للبلد.. وهانفضل نحبك ونموت فيكي يامصر ياحلوة الحلوين.
** بدون أي مصلحة أقول.. خيري رمضان صحفي ومذيع وطني مابعش البلد وقبض من أعدائنا ولاشتم جيشه وشرطته زي غيره ماعمل والأمثلة معروفة للجميع ورجعتوهم علي الشاشة تاني.. ولما سمعت اللي قاله كان قصده يوضح قد إيه ظابط الشرطة طالع عينه قد إيه ومرتبه تعبان.. لكن ولاد الحرام مخلوش لولاد الحلال حاجة.. وخليك في حالك ياأخ سيد علي.. الراجل مش محتاجك تتكلم عنه.. ولعواجيز الفرح الفاشلين العاجزين.. الجدع فيكم يوصل لمكانة خيري رمضان..!!
** أنس الفقي: كان فين الانتاج الحلو المحترم ده من زمااااااان.. والله وحشتنا حلوياتك..وبرافو الدينامو أحمدطه..!!
** ممثل .. منوفي.. عمره "69سنة".. شمام بودرة علي كيفك.. والخمرة لسعت دماغ ابنه.. ومراته الأولانية مدمنة بانجو .. وشقته في عمارة المشاهير بالقرب من النيل كانت مأوي للحريم بأنواعهم.. الأخ فجأة بقي ثورجي وبيهبل ضد الرموز.. ولو مابطلتش العبط ده هافضحك بالاسم.. "يابو فشه" ..!!
** مش عارف إيه لازمته المذيع أبو إسم "زفر" يستضيف علي التليفون واحد كان مبوظ الكيان الصحفي وخلصنا منه عشان يدافع عن نفسه وهومن الاشتراكيين الثوريين وماشي مع الناس اللي ضد البلد.. وللأخ "الزفر" إوعي تعيط وتهرتل وتعمل الاسكتشات المضحكة بتاعتك!
** محمود سعد ومنة شلبي تاني مع بعض في برنامج.. ياااه والله وحشتونا..!!
**عماد أديب: هاتفضل طول عمرك محترم.