علي عيني

آه.. منك يا مصر

آه منك يا مصر هاتستحملي إيه والا إيه علي كتافك.. آه منك يا مصر رغم اللي شايفاه بعينيكي.. عايشة وماشية وبتستحملي بلاوي بتحاول تكعبلك من رجليكي.. ومش هايقدروا إلا لما يشوفوا خرم ودانهم.. هاتستحملي ليه.. وليه ساكتة علي اللي مايتسموش وليل نهار بيقطعوا فيكي.. والغريبة إن اللي بيدافعوا عنك وبيحبوكي لما يغلطوا غلطة صغيرة يطلع كلاب الحارة ينبحوا عليهم. وبنقولك علي اللي كارهينك وإنتي عارفاهم ومابتسمعيش كلامنا.. تخيلي بعد ما طلع عليكي النهار وغاروا في داهية الإخوان وجالك فارس محترم بيموت في ترابك.. يطلع علينا خازوق يقول عاوزين نعمل "البديل" ياكش يبدلوك في سوق الكانتو يا بعيد.. ويخرج علينا واحد اسمه "خراب" مايعرفش أي عمار وماكناش نسمع عنه قبل 25 "إياها" وعمال يلطش ويلبخ في البلد واللي فيها وماتعلمش من درس لميس جابر.. وتطلع علينا "عرة" علي الشاشة وتقطع وتشوه في المشروعات اللي اتعملت وتتهم الفارس بالباطل مدفوع الأجر.. ويستضيف "طبال" الجندول في برنامجه "خراب" أفندي بشعره المنعكش زي مقالاته السامة.. شايفه يا مصر إحنا مستحملين إيه عشان خاطر عينيكي.. بجد زادت قوي ولازم تخلصي من كل ده.. وهانصبر معاكي علي جارنا السو.. يا يرحل يا تيجي مصيبة تاخده..!
تعالوا بقي نشوف المذيعة عزة الحناوي علي قناة القاهرة "الثالثة سابقاً" وصاحبة السوابق في إهانة الرموز.. وما ارتكبته من جريمة جديدة في حق زميلنا أسامة شحاتة اللي كان لازم يقلب الترابيزة علي دماغها ويسيب الاستوديو ويمشي.. ويا حلاوة علي تشكيل لجنة أمرت بإيقافها.. يا فرحتي.. والعيب مش عليها.. فين رئيس القناة.. ورئيس القطاع الغائب دائماً.. ماتعلموش من سوابقها عندما استضافت زميلنا عبدالمنعم فوزي.. وسلام مربع للخواجة ماسبيرو المتهم حالياً بصراحة ووضوح بأنه خلية نايمة..!!
والثلاثاء الماضي ظل المذيع إبراهيم عيسي يهاجم وينتقد حيثيات حكم السجن ضد أديب اسمه أحمد ناجي صاحب رواية يتضمن فصلها الخامس تسمية صريحة للأعضاء الجنسية "العورات" للرجل والمرأة.. وتعلل عيسي بأنه لا يعلق علي أحكام القضاء وأن من حقه التعليق علي الحيثيات وكأنها ليست من صميم صحيح الحكم وقال بالحرف الواحد "قداسة الأحكام القضائية مزيفة".. وأندهش أن أحداً من مجلس القضاء الأعلي لم يحرك ساكناً ليحاسبه.. وارجعوا لتسجيل الحلقة.. ثم قال عيسي "أتألم من وطني" وأقول له طالما الوطن يؤلمك قوي شوفلك وطن تاني لا يؤلمك لكن ماتقرفناش في عيشتنا وتسودها في وشنا.. ثم يتهم البلد قائلاً "الدولة سلفية من عاليها لواطيها" في إسقاط واضح للجميع.. وألا يعرف أننا كلنا ننتمي للسلف الصالح..!!
ويا دي المصيبة السودة.. حمدين صباحي يحاول اللعب من جديد بمبادرة سامة أخطر من الكوبرا ولا يدري أن الشعب خلاص بقي فاهمه كويس هو وغيره من زبانيته مثل عمار علي حسن الذي يتكلم في كل برنامج ساعتين ولا نفهم منه كلمة توحد ربنا والناس مندهشة..!!
وكله كوم وما يقدمه وائل الابراشي من سموم خاصة بعضها صناعة محلية والأخري أجنبية مستوردة.. ما يصدق جنازة ويشبع فيها لطم وصراخ وتوليع..!
إيه رأيك يا مصر.. أقول تاني.. واللا كفاية كده..!! ولو سمحتي إقري المقال من الأول..!!