هيقول عدس

كل الناس شايفاك من برَّه
واللى ما شافشى بيقول عدس
ليه كارهينك؟
ليه حاسدينك؟
بينى وبينك
شايفين برَّه وبس
ياما اللبس مدارى مآسى
شايفين شقة والعربية
أطفال طِعمة جميلة بهيّة
حدّ يا ناس بيشوف إحساسى؟
ولَّا مرارة قلب مقطّع
ياما هدوم بتدارى ولِبْس
ليه باصينلى فى راحة وجايَّة؟
ليه بتموت بينا الحنيَّة؟
ليه بنركِّز ويَّا الناس؟
ناس مطحونة طحنها الترس
وصلت فوق بعرقها وبس
بالمجهود أو خلع الضرس
سيبوا الناس ما تبصوش ليها
الناس فيها اللى مكفِّيها
كل الناس شايفاك من برَّه
واللى ما شافشى هيقول عدس.