شعبولا: هبقى تبع الجو وهغني للرئيس الجديد وأعمل ايه لازم اشتغل

أكد الفنان الشعبي انه كان يغني للنظام القديم لأنه لم يكن يعلم بهذا الفساد الذي يقومون به في الخفاء.
وعن رأيه في ثورة 25 يناير، قال شعبان: "والله حاجة كويسة وأهو تجديد برضه وهي دي التكنولوجيا"، ورفض شعبان ان تكون الشرطة هي التي اطلقت الرصاص على الشهداء وقال: " الشرطة مضربتش حد الناس والشرطة كله كان بيضرب في بعضه يعني الناس بتضرب في الشرطة والشرطة بتضرب في الناس وكل واحد فيهم كان بيدافع عن نفسه".
وأضاف شعبان في حواره مع جريدة "صوت الامة": "وبعدين الشرطة دي ساعة مامشيوا وسابوا الاقسام دي أوامر واخدنها وميقدروش ميعملوهاش بس مش في قسم واحد ده في كذا قسم يعني لازم يكون في حد كبير هوه اللي قالهم يمشوا دول بياخدوا أوامر امشي امشي، اقف اقف، اضرب اضرب مبيفكروش فيها وبيني وبينك لما يمشوا أحسن مايقفوا قصادهم ويضربوا بالنار".
وبرر شعبان غناءه للنظام القديم قائلاً: "بصراحة أنا مكنتش أعرف إن الناس دي سارقانا في حاجة ولا حاجة خالص، يعني مين كان يقول حبيب العادلي ياخد فلوس ويحطها في البنك لنفسه ولا الريس يعمل كده يا ريت الناس الجديدة اللي تيجي بقى تبقى كويسة وتزبطنا!".
وأكد شعبان انه سيغني للنظام القادم أياً كان، وقال: "أنا هبقى تبع الجو بقى وهغني للرئيس الجديد وهعمل ايه ما أنا لازم أقوم بقى واشتغل"، وعما إذا كان ينوي التأكد من نزاهة النظام قبل الغناء له قال شعبان:"هغني وخلاص زي ماكنت الأول بغني وخلاص يعني أنا كنت اتأكدت أولاني عشان أتأكد تاني؟... ولو الإخوان المسلمين مسكوا الواحد هيقرا قرآن وخلاص هخش برضوا تبع الخط يعني همشي ورا عمرو خالد هو يتكلم وأنا أقول "آمين" من ويقول أيها المواطنون وانا وراه "آمين".
ووجه شعبان رسالة للرئيس مبارك قال له فيها: "يا عم حسني ربنا يسترها معاك مكان ما إنت نايم ومتزعلش بقى معلش هتعمل إيه".