حلقة منى الشاذلي عن ضباط الشرطة رفضت تليفون شقيق الشهيد مصطفى الصاوي .. وتعليقات الشباب: كان ناقص يقولوا المسدسات بتضرب لوحدها

* وانتهت حلقة العاشرة مساءً بعنوان: الشرطة حلوة ..الشرطة طعمه.. الشرطة لذوذة .. الشرطة حبوبة
* تعليق : ” الشرطة مش آسفين ..الشرطة خايفين” .. وآخر : الضباط عايزينا لما نقابلهم نبوسهم في بقهم
* تعليق : ” الضباط حيوا شهداء 25 يناير .. اللي قتلوهم بنفسهم .. لا تعليق” .. وآخر : حاسين إن الظباط اللى طلعوا ممثلين
* اقول للظباط اللي مع منى الشاذلي : أترى حين أفقا عينيك بالرصاص المطاطي، ثم أثبت شوية اعتذارات مكانهما, هل ترى؟ هي أشياء لا تشترى
كتبت – نفيسة الصباغ :
عقب إذاعة حلقة العاشرة مساءا حول المصالحة بين ضباط الشرطة والشعب .. قال نشطاء أن ناشط 6 ابريل عبد الرحمن الذي قال ضابط الأمن المركزي انه كان صاحبه ولم يتعرض له قال لهم أن الضابط المذكور لا يقول الحقيقة وقال عبد الرحمن في تويته على تويتر ” أن الضابط الذي نفى قيامه بضرب المتظاهرين ياما ضربهم ” .. فيما قال شقيق الشهيد مصطفى الصاوي أنه عندما اتصل بالبرنامج على الموبايل زحلقوه وعندما اتصل على الأرضي أغلقوا السماعة في وجهه ..
ونفى ضباط شرطة مصريون في تصريحات لبرنامج العاشرة مساء أن يكون تراجع الشرطة خلال ثورة 25 يناير “انسحابا” أو أنه جاء بأوامر من القيادات، معتبرين أن ما حدث كان لتجنب مواجهة مع الناس، ونفوا أن يكون الأمن المركزي قد أطلق الرصاص الحي. وأقر الضباط بوجود فساد داخل وزارة الداخلية مشيرين إلى أن الفساد في كل القطاعات وليس الداخلية فقط ولا ينفي وجود أناس محترمين.
الحلقة التي بدا أن الهدف منها هو محاولة التقريب بين الشرطة والشعب من جديد لصالح الطرفين والبلد كلها، يبدو أنها لم تأت بالتأثير المرغوب، لأن المطلب الأول والأهم للمصريين في الشارع والنشطاء والشباب على الإنترنت هو سرعة التحقيق ومحاسبة من تسبب فيما حدث من مواجهات وقتل وفوضى أمنية، بعدها تبدأ استعادة علاقة متوازنة بين الشعب والشرطة. ومن بين التعليقات التي توالت على المواقع الاجتماعية والتي تشير بوضوح إلى تأثير تلك المحاولة ما يلي:
- عليا النعمة الملازم إللي كان مع منى على دريم لو نزل الشارع تاني حيضرب في خلق الله ولا هيهمه دول عالم **** يا امه
- بعد المسكنة اللي ظهر بها ظباط الشرطة في ال 10 مساء، أكيد اللي ها يشوف ظابط في الشارع ها يثبته على اعتبار انهم عيال سيس
- تخفيض فورى لأعداد الأمن المركزى و تعديل لقانون هيئة الشرطة إلخ
- الى كل ضباط الشرطة المجرمين والأقل إجراما، والذين يقعون في منزلة ما بين المنزلتين: عيشوا بشرف .. جاتكوا القرف
- محدش إتكلم عن عدم قبولهم .. لكن قبولهم مشروط بإصلاحات جذرية و ملموسة ومعلنة مش مجرد حركة تنقلات خايبة
- كان ناقص يقولوا ان المسدس بيضرب لوحده
- طيب أنا موافق إننا نحتضن الشرطة بس يسيبونى أطلع ميتين أهلهم 30 سنة و بعدين نبقى كلنا نحتضن بعض
- طيب احنا ممكن نعمل منهج جديد في مؤسسة الشرطة انما الرفض بعدم قبولهم تاني منطق غلط
- محدش يا بنى عمره عمم القول على أى فئة من المجتمع كلنا لنا أقارب و أصدقاء فى جهاز الشرطة .. بس يفرق الفساد الفردى عن المؤسسى
- انا هنظم مسيرة اعتذار لكل شرطي ضربني بالعصيان والذخيرة الحية والرصاص المطاطي والغاز المسيل للدموع عشان ما اتضربتش كويس ولا استشهدت
- الشرطة مش آسفين. الشرطة خايفين.
- كان الأهم هو أن تعترف الداخلية بجرمهم -مش يحسسنى انه مظلوم
- انا مع عودة الشرطة لكن يجب أعادة تأهيل الظابط و يبقى فية دكتور نفساني يكشف علية شهري
- إلى منى الشاذلي وكل بوع التوك شو. برضه بنكره ظباط الشرطة
- هي خلاصة النهارده ان ظباط الشرطه طلعوا عايزين لما نقابلهم نبوسهم في بقهم
- ناس كتير مش مصدقة، وحاسين إن الظباط اللى طلعوا ممثلين
- هى برامج التوك شو فى الفضائحيات لسة ماشية زى الكورس اللى بيغنى حسب تعليمات المايسترو المجهول؟ .. يعنى إيه كلها بتستضيف ضباط شرطة؟
- وزير الداخلية بيقول بكرة يابني الناس تعرف انكوا ما هربتوش، ما سرقتوش، ما خرجتوش سجنا..!!
- وانتهت حلقة العاشرة مساءً بعنوان: الشرطة حلوة الشرطة طعمه الشرطة لذوذة الشرطة حبوبة
- هو فيه حد لسه بيتعاطف مع الشرطة؟ هو فيه حد لسه معتبرهم وطنيين؟ اسمحلي أقولك انت *** كبير
- أنا أعلن إنّي مش مسامح الشرطة و الأمن في دم الشهداء اللي ماتوا ...و لا حاحترمهم و لا حأقدّرهم
- اللي فتح السجون للمجرمين علشان ترويع الناس في بيوتها، هو نفسه اللي بيبيع قطع السلاح الميري للبلطجية
- واحد صاحبي سلفي متصل بيا عمال يسب الدين لمني الشاذلي وأمن الدولة والظباط...تخيلوا بقي سلفي وبيسب الدين
- واضح من حملة الدعاية لتنظيف سمعة الشرطة ان الناس دي ما تغيرتش ولا بتعرف تعتذر
- خلاص....الفايدة الوحيدة اللى نستنتجها من برنامج العاشرة مساءا الليلة دى ان جهاز امن الدولة لازم يتحل....وانه مش هيتصلح ابدا طول ماهو موجود
- أخو الشهيد مصطفى الصاوي كلمهم على الموبايل زحلقوه.. كلمهم على الارضي قفلوا عليه
- حتي الان كلما أمر من أمام مقر أمن الدولة بحلوان والذي طالما اعتقلت داخله أتامله وهو محترق واتذكر دعوتي من داخله”اللهم ارنا فيهم عجائب قدرتك
- عبد الرحمن إلي بيجيب سيرته الضابط ***** ده اتصل بيا وقال لي الرجل ده كذاب وياما ضربنا
- ظابط الأمن المركزي...ليه بتخليني أضربه...متحطنيش قدامه...مش لاقي شتيمة تناسبك بجد...أربع سنين بتموت في الناس ودلوقت زعلان...اسبله اقوله إيه؟
- واحد نازل بيطالب بحقة ليه يكرهني ؟ ملوش حق صحيح يكرهك انت حياله بتطلع عين أمه يكرهك ليه ؟
- اقول للظباط اللي مع منى الشاذلي : أترى حين أفقا عينيك بالرصاص المطاطي، ثم أثبت شوية اعتذارات مكانهما, هل ترى؟ هي أشياء لا تشترى
- التليفزيون لازم يستضيف أطباء نفسيين يدلونا ويدلوا الشرطة على طريقة لحل الموقف المحزن دة
- هي الشرطة ما فيهاش فايدة؟ عاوزين يبقوا أبطال
- هو انا يعني مش ضد اعادة بناء الثقة بس انهم ينكروا تماما ان كان فى ضرب رصاص حي وكل اللى يطلع يقول ان كان فى ناس مندسة فده كتير
- أنا كمان جابلي شلل أي حد من المصريين المتبعين للبرنامج يفهمنا: الشرطة استقبلت المتظاهرين بالورود وكانت بتوصلهم لميدان التحرير؟
- وربنا لو ظابط شرطة فتح بقه معايا....هطلع مايتين أهله...لغاية دلوقت **** كبار أو صغار مصرين علي الغلط وبيعاندوا
- حلقة العاشرة مساءا هتزود عدد المظاهرين في الجمعه الجايه
- نحن نطالب وزارة الداخلية أن تشتري لا سلكي للظابط اللي في دريم عشان ماكنش عارفيين يتصلوا بالقيادة لما الموبيلات فصلت
- أعتقد أن حلقة العاشرة مساءا نتائجها عكسية بنسبة مليون في الماية
- الضباط حيوا شهداء 25 يناير ... ال قتلوهم بنفسهم ... لا تعليق