شعبان عبدالرحيم: أنا هاغني للنظام الجديد وخلاص.. وأقول للرئيس مبارك: ياعم حسني ربنا يسترها معاك مكان ما انت نايم ومعلش متزعلش بقي هتعمل إيه

· لو الإخوان مسكوا الحكم هاقول «قرآن» وهمشي ورا عمرو خالد ولما يقول أيها «المواطنون» هاقول أنا «آمين»
حوار يجبرك عزيزي القارئ لرسم الابتسامة العريضة شئت أم ابيت علي شفتيك بعد أن فارقتك لمدة خمسة عشر يوما هي عمر الثورة وتباينت خلال هذه الفترة أحاسيسك مابين الخوف والقلق والعصبية والصبر والانتظار.. إنه الواضح الصريح العفوي شعبان عبدالرحيم «الشهير بشعبولا» والذي يتحدث ل«صوت الأمة» عن الثورة من وجهة نظره وفنه السياسي أيضا، فسريعا إلي التفاصيل.
ما رأيك في ثورة 25 يناير والتي قام بها الشباب في ميدان التحرير؟
- والله حاجة كويسة وأهو تجديد برضه وهي دي التكنولوجيا.
وكيف تري الشهداء الذين سقطوا برصاص الشرطة؟
- الشرطة مضربتش حد الناس والشرطة كله كان بيضرب في بعضه يعني الناس بتضرب في الشرطة والشرطة بتضرب في الناس وكل واحد فيهم كان بيدافع عن نفسه وبعدين الشرطة دي ساعة مامشيوا وسابوا الاقسام دي أوامر واخدنها وميقدروش ميعملوهاش بس مش في قسم واحد ده في كذا قسم يعني لازم يكون في حد كبير هوه اللي قالهم يمشوا دول بياخدوا أوامر أمشي أمشي، اقف اقف، أضرب أضرب مبيفكروش فيها وبيني وبينك لما يمشوا أحسن مايقفوا قصادهم ويضربوا بالنار.
وما رأيك في شباب 25 يناير؟
- دي شباب كويسة وعملوا اللي عليهم وجددوا مصر بس المفروض انهم كانوا بعدما مشوا الرئيس انهم يمشوا علي طول.
هل أنت كنت مؤيد لوجود الرئيس مبارك في السلطة أم معارضا لذلك؟
-لا هو كان كفاية عليه كده بس برضوا أنا زعلان عليه عشان احنا طلعنا لقيناه قدامنا فالمفروض كان يمشي بطريقة غير دي عشان كان هيبقي شكله أحسن أصل كده شكله بقي مش كويس وحرام كده ده دلوقتي في غيبوبة وبعد ده كله يتعمل فيه كده والراجل ده اتعود إن الناس تجيبله الأكل وناس تشيل الأكل بعد ماياكل وكل حاجة وهو قاعد دلوقتي مفيش الكلام ده لا ليه ولا لعياله ولا لمراته ومباقش حد حواليه، حرام كده والله.
ولكن أنت غنيت أغاني كثيرة من قبل تؤيد فيها الرئيس مبارك وتعلن حبك له فيها؟
- بيني وبينك وبصراحة ربنا أنا مكنتش أعرف إن الحكاية إن الناس دي واخده فلوس كتير كده ولا إن الناس دي بتسرق حاجة خالص يعني مين كان يقول إن حبيب العادلي ده هياخد كل الفلوس دي ويمشي بيها ولايحطها في البنك ويسبنا احنا تعبانين والريس كمان يعمل كده.
وما رأيك في الرئيس مبارك ونظامه بعد ما عرفت كل هذه التفاصيل؟
- هغني وأقول خدوا الفلوس ومشيوا وراحت علينا بس أنا مش عارف هي الفلوس اللي خدوها دي هيجيبوها للناس اللي كانوا قاعدين في ميدان التحرير؟
هي من حق كل المصريين وليس من حق المتظاهرين من ميدان التحرير فقط؟
- يعني احنا هاخد منهما إزاي هيقفوا مع الناس في ميدان التحرير وينادوا علي كل واحد باسمه وياخد 500 جنيه مثلا؟
لا المفروض أنها سترد إلينا في شكل مشاريع قومية هامة تنعش اقتصادنا من جديد؟
-يارب الناس الجديدة دي تطلع كده وتظبطنا بقي.
هل شعبان عبدالرحيم وبعد صدمته في النظام الذي غني في حبه كثيرا ممكن أن يغني للنظام الجديد بنفس الطريقة أم سيبتعد عن الغناء السياسي أصلا؟
لا أنا هبقي تبع الجو بقي وهغني للرئيس الجديد وهعمل ايه ما أنا لازم أقوم بقي واشتغل.
كيف ستغني للنظام الجديد دون أن تتأكد من نزاهته يعني هتغني وخلاص؟
- آه هغني وخلاص زي ماكنت الأول بغني وخلاص يعني أنا كنت أتأكدت أولاني عشان أتأكد تاني؟
وماذا لو كان الحكم من نصيب الاخوان؟
- لو الإخوان المسلمين مسكوا الواحد هيقرا قرآن وخلاص هخش برضوا تبع الخط يعني همشي ورا عمرو خالد هو يتكلم وأنا أقول «آمين» من ويقول أيها المواطنون وانا وراه «آمين»..
وماذا تقول للرئيس حسني مبارك وهو يرقد حاليا في فراشه؟
- أقوله ياعم حسني ربنا يسترها معاك مكان ما انت نايم ومتزعلش معلش بقي هتعمل ايه.