على موقعى التواصل الاجتماعي "فيس بوك" وتويتر بدأ الباحثون والمفكرون والنشطاء السياسيون يكتبون ويغردون ردا على رسالة #وائل غنيم، بهاشتاج يحمل اسمه، فكتب Mohamed Altabei بالفيس بوك متعجبا ساخرا: جامعة هارفارد الأمريكية تقدم منح عمل ودراسة لباسم يوسف ووائل غنيم ونادر بكار.. #وائل_غنيم يعمل "كبير زملاء" بمعهد آش للحكم الديمقراطي بكلية جون كينيدي. #باسم_يوسف يعمل "زميل مقيم" بمعهد السياسة بكلية جون كينيدي. #نادر_بكار يدرس ماجستير في الإدارة الحكومية بمنحة من هارفارد. و#البلتاجي و #عصام_سلطان في المعتقل ؟؟؟!!!! وتابع الباحث محمد إلهامي قائلا: واحد زي #وائل_غنيم -كنموذج لفصيلة #الثائر_البغل- كان قلبه ما يستحملش موت قطة أيام #مرسي، حد يقدر يفسر إيه اللي حصل؟ إزاي بقوا سفلة أنجاس كده وكتب كنعاني مصري: "نكتة الثائر البغل: لا نريد عودة الشرعية ونريد إقصاء الإسلام السياسي ونريد إسقاط الحكم العسكري "لبن سمك تمر هندي" هذيان وإجرام بحق مصر #وائل_غنيم". وقال سامي مصطفي: عارف مين أغبي و أسذج من اللى خد 100 قفا على سهوة، اللى فرح و طبل لعودة #وائل_غنيم للكتابة و تبيان موقفه من البتاع. وكتب Wael Samir: #وائل_غنيم فاق بعد سنتين وبيقول الاخوان والعسكر مبيفهموش ف الديمقراطيه طيب حضرتك هو اللي مبيحسش بالخازوق الا بعد سنتين بيفهم ف ايه بقي. وكتب: إبراهيم محمد: الفرق بين ثورة 25 يناير (الضائعة) وما سمي زورا بثورة 30 سونيا هو نفس الفرق بين #وائل_غنيم و #محمود_بانجو. وكتبت لمياء مايرمعاتبة ومحللة: احنا مكناش متصورين انك هتؤيد السيسي، و لا كنا منتظرين انك تعترف بخطأك أو سذاجتك، بشمهندس #وائل_غنيم احنا مكناش متوقعين منك حاجه خالص لأنك بالنسبة لنا حاليا نكرة، صرت نسيا منسيا! من زمان قوي والعين امتلأت بأبطال رفضوا الظلم وجهروا بكلمة حق في وجه سفاح متوحش، بنتعلم منهم.. مكانك اللطيف هيكون في رواية ما هيكتبها كاتب ما بعد عدة سنوات، يحكي فيها كيف أصبحنا أضحوكة العالم.. فما تحاولش تضحك العالم عليك اكتر من كده كفاايه. وكتب Ahmed Elbanna: بجملة الكلام المكتوب عن #وائل_غنيم ما أعلمه "يقينا" ومنذ زمن ومن خلال وقاع عايشتها بنفسي.. أن وائل غنيم في معظم تحركاته كان أداة في يد الجهات السيادية والأمنية.. ربما لم يكن أمنجيا بالمعنى المعروف.. ولكنه كان يتعاون معهم لتحقيق أهداف مشتركة.. ومنها انقلاب 30 يونيو.. وبالتالي.. دعونا من تحليل اعتذاره وكلماته.. لأن وائل غنيم أضعف كثيرا من أن يأتي من نفسه.. ابحث عمن وراءه.. تعرف سبب عودته!! وكتبت أمل عبد الماجد: بعض المحسوبين على الثورة يطالبون بعض من ساكنى بالوعات 30 يونية معاودة الجلوس على موائد الوفاق؟!!! محسوب يطالب #البرادعى.. أبوخليل يطالب #وائل_غنيم.. أيمن نور يطالب #حمضين؟!!! وأكد الناشط الثوري خالد السرتي أن أحمد ماهر مؤسس حركة 6 إبريل المعتقل حاليا في سجون العسكر أشرف كثيرا من وائل غنيم؛ لأنه اعترف صراحة بالخطأ، وأنه كان يعرف أنه انقلاب، في الوقت الذي يساوي فيه وائل بين العسكر والإخوان، ويراهما قوتين متصارعتين لا يؤمنان بالديمقراطية. وفي تدوينة طويلة ساق السرتي 15 سؤالا استنكاريا يرد بها على ما كتبه وائل غنيم، أمس على صفحته الخاصة، يحاول من خلالها تقديم اعتذار على أنه أخطأ قراءة المشهد قبل 30 يونيو. نص تدوينة السرتي: الأخ وائل غنيم اللى مقدمنا لنا نفسه كليبرالى كتب النهاردة تغريدة جميلة جدا، جت لنا بعد شوقة الصراحة، ليثبت أن قيادات المجتمع المدنى من الشباب، لا تختلف كثيرا عن قياداتهم من المخضرمين أمثال البرادعى وصباحى.. محترمين.. الأخ وائل بيقول: معلش أنا كنت فاهم بعض الحاجات غلط، مش مشكلة يا وائل خالص، دا كلهم 10000 واحد بس اللى اتقتلوا، 50000 ألف واحد وواحدة اعتقلوا وبيتعذبوا، وكام ميت ألف طفل اتيتموا، فما تشغلش بالك بالحاجات الصغيرة دى.. ثم إن إنت كمان وضحت لنا أن غرضك كان نبيل، أنت كنت عاوز تخلص البلد من قوتين متصارعتين لا يؤمنان بالحرية، فين الغلط بقى يا رجل؟!.. الأستاذ وائل قدم لنا الدليل على أن الرئيس مرسى كان رجل ضد الحريات، لأن وائل كلم بنفسه مستشار للرئيس وقال له بلغ الرئيس: اعمل استفتاء على بقائك عشان البلد متوترة، فالرجل ماسمعش كلامه!.. مش عارف والله يا وائل أبتدى منين.. يعنى أنت طالع بلسانك تقول كده؟ طيب يا وائل بدون زعل: 1- أنت مين أصلا يا وائل عشان تتكلم عن مصير شعب مصر؟ أنت مين يا وائل فعلا ياللى عاوزنا ندوس على صوت ملايين؟ أنت عارف أنك كده..؟ عموما أنا كلمت مستشار الرئيس قبلها بيوم وقلتله خللى الريس ما يعملش استفتاء، والحمد لله سمع كلامى.. 2- الرئيس الدكتاتور ده بتكلم مستشاره بسهوله؟ كلمت أنت مين قبل أو بعد كده؟ وبتطلب منه أن الريس يهدر أصواتنا وحقنا، ونايم فى بيتك، وبتشتم، ومش عاجبك كمان؟! 3- الطلب الجميل اللى أنت طلبته ده، لو واحد طلبه فى دولة محترمة من اللى انتم عاوزينا نبقى زيها، له مكان غير مستشفى المجانين؟! 4- ماجاش فى بالك خالص وأنت ناشط سياسى مرموق، أن فى حاجة اسمها برلمان، كُنْتُمْ كلكم ضد انتخابه.. لو كان لكم شعبية كُنْتُمْ ممكن عن طريقه تقيلوا الرئيس مرسى وتحاكموه كمان، ده بفرض أنه مخطئ، وبفرض أنكم بنى آدمين. 5- ماجاش فى بالك دلوقتى أن القضاء بيزور، وكان ممكن، بل أكيد هيخلص الليلة بالتزوير، وماحدش هيعرف يعترض، شامخ بقى؟! 6- ماجاش فى بالك دلوقتى أن كل اللى كانوا متصدرين المشهد من طرفكم مجرد خدم للعسكر، وأن المعركة زى ما بتقول بين الجيش والإسلاميين؟ يعنى الجيش مش هيهمد لحد ما يرجع يخطف البلد؟ أنت صدقت أن صباحى كان عاوز الحرية؟ طب لسه مصدق؟! على فكرة أحمد ماهر طلع أشرف منك فى دى، لأنه مش عامل عبيط لحد دلوقتى، قال لك كنا عارفين أنه انقلاب، تبقى تسأله. 7- لو افترضنا أن الاستفتاء كان جاب مرسى، متخيل أن كلابكم كانت هتسكت من غير أمر الجيش؟ طب السيسى واللى وراه كانوا هيقولوا: ياللا بقى يا جماعة.. قدر الله وما شاء فعل؟ 8- أنت حقيقى يا وائل.. أنت شايف أن الإسلاميين هم اللى كانوا ضد الديمقراطية والحرية؟ والا.. .. اللى خسر كل الانتخابات، وبدل ما يحط جزمة فى بقه، راح اشتغل خدام عند نفس المجرم اللى عملنا عليه ثورة، نسيت حرق المقرات؟ نسيت حرق الأتوبيسات؟ سلوككم واحد يا وائل، حتى فى تونس! 9- هو أنتم ما اتعرضش عليكم مناصب ورفضتم؟ برغم أنكم مجرد فشلة، صوتكم عالى فى أبواق إعلام الدعارة، ( وده من أكبر أخطاء الإخوان، لأنكم صدقتم أنكم فعلا قيادات!).. المضحك أنكم خسرتم كل الانتخابات، ومع ذلك اتعرض عليكم مناصب، ورفضتوها، كُنْتُمْ عاوزين انتم اللى تحكموا والإخوان يمشوا، عشان الإخوان يبقوا ديمقراطيين؟! 10- طب لو كان الاستفتاء جاب حد تانى وماعجبناش، كُنْتُمْ هتدونا الأوبشن ده بتاع الاستفتاء؟.. ونروح بعيد ليه ؟؟؟ لو افترضنا السيسى باشا ما عجبناش، ممكن تكلم عمو عباس يقول له يعمل لنا استفتاء، بس يكون حر وحياتك يا وائل؟! 11- طب لما أنت فهمت غلط فى 30 سونيا ( اللى انت ما نزلتهاش، بس ساهمت فيها ).. لما شفت الملايين الحقيقية "يقصد في رابعة والنهضة وميادين مصر"، اللى ماحدش رمى عليها كوبونات، ولا عصير، ضربوا عليهم نار، وفضلوا ينزلوا برضه فى الشارع مافهمتش أن دول الشعب اللى اختار؟ وأن لهم حقوق، وأنهم غير الغوازى اللى نزلوا 30 يونيو؟! 12- طيب أنت ما أيدتش الانقلاب زى ما بتقول، طب هاجمته ؟ والا إحنا بنهاجم يا وائل بس اللى ما يديناش بالجزمة؟! 13- ما كنش فيه كلمة كده على لجنة الخمسين؟ 14- لما كتبت كلمتك السودة اللى أنت بتقول دلوقتى أنك كنت ساذج ساعتها، وقلت: غلطان اللى يتخيل أن الحكم المستبد هيرجع،،،، ما ختش بالك أن العسكر كان خلاص قفل كل القنوات، والجرائد، وحبس كل المذيعين؟ كل دى سذاجة يا وائل؟ 15- طيب جنابك شايف أن العسكر والإسلاميين وحشين، مش شايف أي حاجة خالص فى اللى مسمين نفسهم ليبراليين، ما لقتش نظرك حتى حرق المقرات؟ وتشجيع التيار المدنى لها؟ طبعا أنا ممكن اكتب لك فى حاجات لحد ما أعجز، ومش هخلص.. أنا مش بكتبلك لشخصك، أنا بكتب لكل اللى كانوا مصدقينكم، عن كل اللى زيك.. بعد كل ده، مش شايف أنك أجرمت؟ بالنسبة لنا "يتحدث عن نفسه" إحنا لو فاكر أن ده اعتذار، فهو مرفوض، وياريتك ماقلته.. لو مستكبر تقول أنك(..)، خليك يا وائل ساكت أحسن؟.. لو بتقوله لناس تانية، أدينا بنحاول نوضحه.. عندك 15 نقطة لو لك أنت أو أي واحد من اللى زيك، (قاد الناس وخدعهم) أى رد، ما تبخلش علينا بيه!! مع العلم أنى لا أنكر أخطاء كتير للإخوان، مافهمش "ليس فيهم" ولا حاجة من الإفك والأكاذيب بتاعة العسكر اللى قالوها على لسانكم..
