_ إن بحكم محكمة النقض النهارده.. أصبح الرئيس الأسبق حسني مبارك "فاسدا" رسمياً.. المحكمة أيَّدت حكم سجنه 3 سنوات هو وولديه علاء وجمال في قضية القصور الرئاسية.. وده حكم له تبعيات كتير بعيد عن إنهم بالفعل قضوا عقوبة السجن دي.. إيه التبعيات دي؟
_ أقولك أنا.. مبارك فقد شخصيته الاعتبارية.. أيوه.. يعني ملوش جنازة عسكرية أبداً.. يموت.. يدفن عادي مثل أي مواطن آخر.. رجع ل"صفوف الجماهير".. طب والنياشين ..مالها ..أقولك ..يعلقها في البيت ..يحطها في خزنة ..بس ميلبسهاش ..ولا يلبس بدلة عسكرية ..بس كده.
_ أبداً والله ..حوالي 96 ألف جنيه كان بياخدهم شهرياً بدل "أوسمة ونياشين" دول من الشهر الجاي ..مش هياخدهم ..وكمان غير مسموح ل"علاء وجمال" بالمشاركة في الحياة السياسية ..وكمان التلاتة هيردوا ..أو لازم يردوا 147 مليون جنيه ل"مصر" ..ومصر هتاخد كل أملاك وممتلكات الراجل وولاده ..ولو مكملوش يعملوا إيه.
_ ولو في حالة إن ممتلكاتهم مكملتش المبلغ اللي هو 147 مليون جنيه يحصل إيه ..أقولك أنا..فيه حاجة اسمها "إكراه بدني" ..وهو إن المحكوم عليه بغرامة يشتغل في قسم شرطة أو محكمة ..يمسح ويكنس وينضف وكده ..طب وفيه أهم من الكلام ده ..الأهم أننا منتظرون التطورات بس لازم ننوه لبعض الأشخاص ..مين دول .. أقولك أنا.
_ الأول هو ضابط الرقابة الإدارية الشاب معتصم فتحي ..واللي كان مستبعد من الجهاز وقتها وقدم بلاغ القصور الرئاسية ..والثاني هو رئيس النيابة الشاب أحمد حبيب ..والثالث هي دائرة المستشار أسامة شاهين والتي أصدرت أول حكم في القضية بعضوية المستشار المحترم هشام الدرندلي ..وأيضا دائرة المستشار حسن حسين وأيضا المستشار فرحان عبدالعظيم بدران رئيس محكمة النقض.
_ ولسه في المحاكم معلهش ..النهارده ظهر في قفص الاتهام 13 من ضباط وأفراد الشرطة المتهمين بقتل ضحية التعذيب في الأقصر طلعت شبيب..والمشهد اللي كان لافت هو حضور أسرة "طلعت " ..ولاده وبعض السيدات من أسرته بملابسهم السودا.
_ وجبنا سيرة الشرطة ..لازم نتكلم عن المجند الشهيد محمد رمضان ..اللي مات النهارده الصبح بالرصاص هو والعقيد الشهيد علي فهمي ..إرهابيون أطلقوا عليهم الرصاص من بنادق آلية على بعد كيلو من بيت العقيد والعربية ولعت ..وتفحمت جثة الشهيدين ..عليهم رحمة الله الأبطال" .
_ وده يفكرك إن فيه خلية "تقلية" في منطقة جنوب الجيزة ..هدفها الاغتيالات ..والرصد لتحركات الضباط ..وعملت جرائم مشابهة في آخر سنتين ..لازم الشرطة تحط إيديها عليهم وبسرعة.
_ وده ما ينسيك حادث الغردقة ..والمتهمين اللي راحوا ودخلوا الفندق ومعاهم سكاكين ..وطبنجة صوت ..وأصابوا 3 سائحين ..والشرطة كانت نص صاحية ..أيوه نص صاحية ..لأن الاتنين دخلوا الفندق من باب رئيسي ..وربنا ستر إن مش معاهم عبوات أو حزام ناسف ..والأهم هو إصابة أحدهم دون تعمد قتله ..والإصابة كانت في القدمين.
_ والمشهد اللي حصل امبارح بالليل ده يفكرك مباشرة بالهجوم على فندق الأهرامات الثلاثة بالهرم ..وإن ده استهداف واضح للسياحة ..طب وهو فيه سياحة ..أهوه ..لأن عمليتين نوعيتين زي دول كفيلين يمشوا ال3 أو 4 أو 5 سياح اللي عندك ..وخاصة إن الخبر زي ده "بيطير" في العالم ..وواحد من المهاجمين منتمي للأولتراس.
_ وبمناسبة الأولتراس ..المحكمة النهاردة عاقبت 18 متهماً بالسجن المشدد لمدة 5 سنوات، بتهمة الشروع في قتل رئيس نادى الزمالك وبرأت 3 متهمين أهمهم "سيد مشاغب" وعاقبت كمان 8 متهمين باقتحام نادي الزمالك، وحيازة ألعاب نارية "شماريخ"، أهمهم برضه "سيد مشاغب"، بالحبس لمدة سنة واحدة مع الشغل، وبرأت 5 متهمين.
_ واتكلمنا عن الزمالك ..فالفريق النهاردة هيلاعب إنبي.. والحقيقة إنه مغلبش إنبي من 6 سنييييييييييين ..أي والله ..عندهم عقدة ..عندهم خوف ..بس عندي إحساس ..وعشان "حبايبي الزملكاوية " كتار أوي ..بقولهم ..هتفكوا العقدة وتكسبوا النهاردة ..قولوا يا مسهل.
_ وقبل ما أنسى ..خلينا أقولكم ..إن البرلمان هيكون فيه بكرة جلسة إجرائية ..وبكره هتلاقوا توفيق ..وزيد وعبيد ..وكل الحبايب ..الجلسة هيترأسها المحامي بهاء أبوشقة ..وكله هيكون موجود عشان يحلف ..وبعدما يحلفوا ..هيعملوا انتخابات على منصب الرئيس ..وبعد ما ينتخبوه ..أبو شقة يسلموا ..وبعد ما يسلموا ..يعملوا انتخابات لوكلاء اللجان ..هتعمل إيه توفيق ..بكره.
_ وعشان كله ميبقاش ..ضرب ..ضرب ..ضرب ..قول: "كم أناديك وفي لحني حنين ودعاء ..يا رجائي أنا، كم عذبني طول الرجاء ..أنا لولا أنت .. لم أحفل بمن راح وجاء ..أنا أحيا في غدي الآن بأحلام اللقاء ..فأتِ، أو لا تأتِ أو فافعل بقلبي ما تشاء "#حبيبي أنت.