«أديب» عن حادث قطاري سوهاج: اضرب بقوة يا ريس مفيش أعز عندك من دم البلد

علق الإعلامي عمرو أديب، على حادث تصادم قطاري سوهاج، الذي وقع ظهر اليوم الجمعة، قائلا: «أ، ب، إنهم كانوا يقولوا حاسب في قطر واقف، لكن ألف باء، مش عندنا، وعندنا مشاكل إن حسين رياض لسه موجود، الراجل اللي بيقف على المزلقان، صحيح إننا جددنا المزلقانات، لكن في مئات المزلقانات عاوزة تتجدد».
وأضاف أديب، خلال تقديمه حلقة اليوم، من برنامج «الحكاية»، الذي يعرض عبر شاشة «MBC مصر»: «في مليارات المفروض تتدفع، لكن البلد مفيهاش كل الفلوس دي، والمفروض إن أي مكان في العالم فيه قطر وقف يتعمل له تحويله أو اللي جاي بعده يهدي».
وتابع الإعلامي عمرو أديب: «ولو المواطن بيدوس على الفرملة عشان ينزل المكان اللي عاوز ينزل فيه قبل الوصول للمحطة عشان ميمشيش حتة فده يبقى كفر، ولو هنكمل كده ملناش قطارات، هذا البلد لا يستطيع إدارة قطار الآن، أو كلنا نتحمل، وهنركب القطار بمشكلاته وسيئاته».
وأردف: «لما شركة بوينج، صنعت طائرات سقطت، منعت إقلاعها مرة أخرى، لكن ماتعملش لبوينج الدوشة دي كلها .. كل شيء في هذا البلد يتحول إلى خناقة ودوشة».
وعن المطالبين بتدخل مجلس النواب لمحاسبة الحكومة، أوضح أديب: «مصر تحركت منذ اللحظة الأولى ووعدت بحساب المقصرين.. حقق واعرف واضرب بقوة يا ريس مهما كان، مفيش حد أعز على عبدالفتاح السيسي، من دم البلد، والكلام واضح منذ اللحظة الأولى، والغلطان هيتحاسب حساب عسير، ويجب أن يكون القضاء سريعا والحساب مريرا وناجعا، واللي غلط يتحاسب أيا كان هو مين".
وواصل: «عاوزين نعرف الحقيقة، اللي مات مات، مانموتش الناس الباقية بالحياة، فقد عانينا من هذا المرفق على مدار 30 سنة، وحد تاني بيقول وقت مرسي .. يا أخي اتنيل، ده وقته؟! انتو هاممكم الناس ولا التاني ده؟.. إحنا عاوزين الحقيقة حتى لو كانت مرة وعاوزين نحاسب حتى لو كان حد كبيرهيتحاسب».