فيلم ضد الحكومة

حوار:
- خدلك شوية ينسون.. يجلى الصدر.. يوسع الشرايين.. إنت عايز توصل لإيه؟
- للعدل يا دكتور.. العدل اللى اتعلمناه وآمنا بيه ودعت ليه الأديان كلها.
- آه عظيم.. طب إيه بقى العدل فى إنك تختصم الوزراء فى قضية زى دى المتهم فيها معروف ومحدد بلا أى لبس.
- قصد حضرتك سواق الأوتوبيس أو عامل التحويلة؟
- أو حتى هيئة السكك الحديدية نفسها!.. إنت عرفت إن بالكشف الطبى ع السواق اتضح إنه كان متعاطى مخدرات؟
- عارف.. عارف إنه مذنب ولازم ياخد جزاءه.. بس مش هو لوحده.
- طبعاً، هو.. وعامل التحويلة.. وملاحظين السينافورات.. و...
- يا افندم أرجوك افهمنى.. الأوتوبيس مادخلش فى القطر من نفسه ولو حتى صدفة.. فيه مسئول ورا ده كله هو اللى وصل مزلقانات القطر إنها تكون من غير إشارات.. وهو اللى خلى سواق الأوتوبيس، اللى المفروض أنه مسئول عن أرواح البنى آدمين، ياخد مخدرات.
- ما هو ده بيحصل فى أى مكان فى العالم.
- أيوه، بس بيبقى فيه حساب.. وبتتحدد المسئوليات بدقة.. كل واحد بيأدى واجبه، ولما يحصل الخطأ بيبقى معروف مين بالظبط المخطئ ويتحاسب.
- يعنى انت عايز وزير النقل يعدى بنفسه على السنافورات سنافور سنافور ويتأكد إن الإشارات شغالة؟
- لازم يبقى فيه مسئول حقيقى.. مش كبش فداء يتحاسب وياخد جزاءه.. المسئول عن وسائل النقل فى البلد هو وزير النقل مش عامل المزلقان.. والمسئول عن تأمين حياة تلاميذ المدارس وحمايتهم هو وزير التربية والتعليم مش سواق أوتوبيس الرحلة.. والمسئول عن الاتنين رئيس الوزراء.. القضية لازم تتطرح كده.. اللى راحو بنى آدمين.. بشر.. أرواح بريئة مالهاش ذنب.. لو المسئولين عن ضياعهم اتحاسبوا وخدوا جزاءهم.. هيفكروا ألف مرة بعد كده عشان مايقعش خطأ أو إهمال مشابه.. الإهمال لما يوصل للدرجة دى يبقى جريمة بشعة لا بد من التحقيق فيها.
- ممم.. ما تيجى ننسى الكلام الكبير ده شوية!
- حضرتك علمته لنا فى الكلية وكتبته لنا فى الكتب.
- البلد مش مستحملة هزات!
- البلد مش هتتقدم إلا بمواجهة أخطائها.. مش عيب إننا نبقى بلد متخلف.. لكن العيب الحقيقى إننا نحط راسنا فى الرمل ومانواجهش التخلف ده.. إذا كان حد قلبه ع البلد دى بصحيح.. لازم يُقف يحاسب ويتحاسب.
كتب أحد الأصدقاء الحوار السابق على صفحته على ال«فيس بوك»، ثم علق قائلاً: مشهد من فيلم ضد الحكومة لأحمد زكى، تأليف وحيد حامد، إنتاج 1992. البوست ده بقاله سنة، متاخد من بوست بقاله سنتين، منقولين من مشهد فى فيلم بقاله 22 سنة، ولسه الدنيا زى ما هى!
سألت السيد رئيس الوزراء عن هذه الواقعة وكان رده: هناك محاسبة مباشرة للمسئولين، وهناك قرار بأن يتم إزالة كافة المزلقانات غير الشرعية من على شريط السكك الحديد، وعلينا أن نتصرف وكأن مشاكل مصر مسئولية مشتركة بين الحكومة والشعب حتى لو كان هو، كرئيس وزراء، يضع المسئولية الأكبر على الحكومة لأن عليها أن تقود الناس وأن تحمى الأبرياء من المهملين.
والله المستعان.