زهراء مدينة نصر "نظيفة وخضراء وبدون كلاب".. و"حقوق الحيوان": حرام عليكم

أحمد سعيد: مستعد أقتل بني آدمين مش كلاب وبس عشان أحمي ابني

"مدينتنا نظيفة وخضراء وبدون كلاب" استقر المقيمون في منطقة زهراء مدينة نصر على شعار خاص جدًا لمدينتهم، التي أرادوا لها أن تكون خالية من الكلاب: "الكلاب جاية من الجبل وبتهاجم الأطفال والكبار، والعيال خايفة تنزل من البيوت" قالتها مروة حسين، أحد سكان المنطقة، ناطقة بلسان حال العديد من سكان المنطقة.
"حرام عليكم، ده كفر، مين اللي يقتل روح بريئة كدة؟ انتو متأكدين إنهم كلهم ضارين ومسعورين عشان تقتلهوهم" قالتها مريم علي، أحد النشطاء في مجال حقوق الحيوان، في رسائل متتالية قامت بتوجيهها لسكان المنطقة، في حملة ضدهم تبناها عدد من نشطاء الحيوان، إلا أن أعمال المكافحة استمرت لتسفر عن مقتل عدد لا بأس به من كلاب المنطقة.
"الناس مكانتش عارفة تعمل، مفيش جهة رسمية نروحلها، وناس مننا خاطبوا جميعات الرفق بالحيوان ييجوا يتصرفوا محدش اتحرك، لذلك قررنا نتصرف بنفسنا" قالها أحمد سعيد، أحد سكان المنطقة، والذي عانى مع ابنه بسبب خوف الصغير من النزول إلى الشارع بسبب الكلاب.
مقابل مائة وخمسين جنيهًا جمعتها خمس عمائر، قامت شركة "النجم الساطع" بإبادة الكلاب: "إحنا لينا سوابق في قتل الكلاب والقطط، والموضوع بياخد وقت قليل جدًا" هكذا قدّم القائمون على الشركة أنفسهم إلى سكان المنطقة، معلنين أن مرحلة مكافحة الحشرات تطورت إلى مكافحة القطط والكلاب.
"كلاب كتير ماتت بالفعل، ناس كانت بتقول حرام عليكم، وناس قالت أحسن، وأنا بقول اللي عنده حل يقدمه أهلًا وسهلًا واللي معندهوش ينقطنا بسكاته، أنا عشان خاطر ابني مستعد أقتل بني آدمين، مش مجرد كلاب متوحشة جاية من الجبل، اللي إيده في المية مش زي اللي إيده في النار" يواصل أحمد سعيد حديثه، مشيرًا إلى نشطاء حقوق الحيوان الذين هاجموا عملية "الإبادة".