م الآخر| ماما من الكتالوج

عادة مابقتش اهتم باللي بيهتم به الناس، وخاصة لما الموضوع يبقى هيصة وهري إنساني عظيم، لكن شغلني موضوع اختيار فيفي عبده أم مثالية، وبعيد عن إنه موضوع هايف وعبيط، يشغل شعب داخل على مجاعة وعجلته الانتاجية نائمة، وداخل على انتخابات رئاسية وكل ده.. إلا أن دار في ذهني سؤال بسيط.
هو مين فينا بيختار بابا و ماما؟ طيب تعمل ايه إذا شاء القدر واتولدت لقيت أمك رقاصة؟، اتفقنا محدش بيختار أبوه وأمه (انت و بختك) تطلع ابن وزير.. ابن مدرس.. ابن عامل نظافة.. أو ابن رقاصة، فكرت إذا كان ربنا اختار أمك رقاصة كنت هاتعمل ايه؟ كنت هاتتبرى منها مثلًا؟ ولا هتدافع عنها رغم إنك شايفها مش حاجة حلوة.
والسؤال ده خلاني افكر في سؤال تاني: هى ايه مواصفات الأم المثالية؟ أيوه اللي هي بتعمل ايه يعني؟ ومين اللي حط قواعد المثالية، فنقدر نقول إن الأم دي اقتربت من الأم المثالية؟، وهل لو مامتك برة مثالية الكتالوج، هاتكرهها مثلًا؟، ولا هتحاول تغير فيها؟ طيب أجيب ال"سوفت وير" بتاعها منين؟، وأصلًا مين اللي يقيّم إن دي أم مثالية؟ هل كل واحد فينا شايف أمه مثالية؟.
هل اللي بتنزل وتشتغل عشان ترفع مستوى الأسرة (معنويًا أو ماديًا) هل هي أكتر مثالية من اللي قاعدة بأطفالها في البيت؟.
خلينا نفكر في الموضوع من جانب تاني.. انت بتحاسب الأم على إنها مثالية طبقًا لها هي كشخص، ولا الناتج بتاعها؟.. يعني إنها نفسها، طبعها، شخصيتها، شغلانتها، ولا وصلت أولادها يبقوا ايه؟.
فإذا كان حكمنا على شغلانتها مثلًا تفتكر لو هي دكتورة تبقى ست أكتر مثالية من إنها مدرسة، ولا المثالية اللي بتبقى مهندسة ولا مذيعة؟، تحكم بأيه؟.
تعالى نقول هنحكم بأخلاقها.. طيب هو انت ماقبلتش مُدرسة معندهاش ضمير ولا أخلاق، و كل اللي بتفكر فيه إنها تدي دروس، وتستغلك؟، ياترى دي أُم صالحة تربي؟ يا ترى هي أخلاقها أحسن ولا الرقاصة؟ دكتورة مهملة اللي بتودي حياة مريض بالإهمال، بلاش واحدة مهنيًا وأخلاقيًا كويسة.. بس هو ده معناها إنها ست محترمة؟ مسمعتش عن الستات اللي بتخون جوزها؟ أهي مش رقاصة؟ تفتكر هي أم مثالية؟، لكن لو طبقنا على الناتج اللي طلعتوا، فتعالى نطبقوا على فيفي عبده، هي ماطلعتش واحدة من بناتها راقصة، ربيتهم في مستوى مدارس عالي، عندهم نادي، دخلتهم مستوى أعلى من المستوى اللي هي اتربيت فيه.. طيب مش كده هي أم كويسة؟.
أنا مش بدافع عن فيفي عبده، أكتر ما بفكر بصوت عالي.. في فكرة الأم المثالية "مسز برفكت"، أنا بحب ماما مش عشان هي أكتر ست مثالية، قد أختلف معها في بعض معايير التربية، وأكيد انت بتختلف برضه مع أهلك (خليني أقولك على سر محدش عنده الجراءة يقولها، نص مشاكل جيلنا انه اتربى بطريقة غير اللي هو مقتنع بيها إن ده الصح)، وساعات كتير اقول لما يبقى عندي ولاد هبقى اعمل معاهم كذا وكذا، اللي هو ممكن يكون عكس اللي ماما بتعمله، ومع ذلك أمي عندي أغلى إنسانة في الدنيا، وعمري ما اتمنيت أم تانية غيرها.
محدش فينا بيحب أمه عشان أمه أحسن أم، إنما عشان هي أمه.. افتكرت فيلم (خللي بالك من زوزو)، وفي المشهد الأخير لما سعاد حسني قالت أنا لو أمي فرانة كنت رحت ساعدتها، لو كناسة كنت ساعدتها، أنا بحب ماما مش عشان هي أحسن أم في الدنيا، إنما بحبها عشان هي أمي، حتى لو مش بتعجبني كل صفاتها، وحتى لو في رأيكم هي مش أم مثالية.