أحمد عفيفي يكتب: فيفي ولميس وعكاشه .. رقّصني ياجدع!!!

مش عايز أقف كتير عند حكاية اختيار فيفي عبده أم مثالية .. من نادي الطيران .. والدوشة اللي حصلت بعدها .. والتريقة اللي على أصولها اللي ملأت صفحات الفيسبوك .. وكأن الحكاية دي مقصودة عشان نشوّه المرحلة " الزفتية " اللي بنمر بيها دلوقتي .. مع انها متشوهة لوحدها مش ناقصة .. انما الغبي ابن الغبي اللي قرر اختيار فيفي عبده كأم مثالية " ده لو كان حسن النية ومش قاصد حاجة من ورا الحكاية دي ".. مش المفروض يتحقق معاه .. المفروض يتقدم لمحكمة عسكرية .. وخلال اسبوع مش اكتر يصدر حكم بسجنه على الأقل سنتين عشان يحسبها صح قبل ما يقلب الدنيا ويثير مشاعر الناس بهذا الاستفزاز غير المسبوق .. وطبعا فرصة على طبق نمن ذهب للإخوان " ولاد الكلب " عشان يقولوا أدي مصر اهه بعد مرسي ما خلعوه .. أدي مصر اهه وهى تستعد لاستقبال السيسي.
وعندي شك كبير ان اللي عمل الدوشة دي إخواني " ابن لئيمة " .. ضربها صح وحققت اللي هو عايزه .. فتخيّلوا بقى ان الأمر كله يصب على دماغ السيسي .. كأنه هو اللي اختار فيفي عبده .. او مسك عليه مرة عبد الرحيم علي تسريبة من التسريبات " الوسخة " اللي شغال عليها بقاله 3 شهور ، والسيسي مثلا بيقول في قعدة روقان انه بيجب يتفرج على فيفي عبده .. زي السادات ماكان بيحب نجوى فؤاد .. عايز اقول الجو كله بقى مقرف .. والتلكيك شغّال الله ينّور .. ولو اى حاجة تافهة حصلت يبقى السيسي مسؤول عنها .. مع انه لحد دلوقتي .. ما اعلنش صراحة انه حيرشح نفسه.
بقولكم انا شايف ان المسالة دي مقصودة بهدف تهييج الناس اللي ضد الجيش والحكم العسكري المنتظر .. واللعب في دماغ اللي هما مع الجيش وفي انتظار المنقذ العسكري .. زي بالضبط قبل شهر .. لما الاقي مؤسسة في قيمة وقامة مؤسسة الاهرام بعد ما افتكرنا انها نضفت برحيل زبالة الصحفيين اللي كانوا بيبوسوا جزمة مبارك وجمال ابنه .. الاقي حفلة لتكريم توفيق عكاشة كأحسن إعلامي حر ساهم بدرجة خطيرة وغير مسبوقة في ثورة 30 يونيو .. خلاص .. المذيعين المحترمين انقرضوا ومش لاقي غير توفيق عكاشة عشان اكرّمه .. وبرضه تحصل مشكلة في الأهرام .. ومين اللي قالك تعمل الحفلة دي ، ومين قالك تختار توفيق عكاشة .. وكأننا مش في مؤسسة محترمة .. كأننا في زريبة بهايم .. الجاموسة اللي عايزة تتبول ولا تتبرز مش بتاخد اذن من العجل اللي جنبها ولا بتقفل عليها باب .. اللي عايز يعمل حاجة يعملها .. خدت انا ايه من التحقيق مع المخبول اللي كرّم توفيق عكاشة .. ولا ابن المجنونة اللي اختار فيفي عبده ام مثالية .. اللي حصل حصل ورد الفعل المنتظر وقع خلاص .. وكسبنا بنط جديد على قفا النظام الجديد اللي لسه مجاش.
ونمشي مع الاستفزاز لنهايته .. ومن 4 شهور فاتوا .. نُفاجأ برئيس وزراء مصر الببلاوي قبل مايمشي بيكّرم لميس الحديدي .. اعيدها تاني بيكّرم لميس الحديدي كنموذج يُحتذى في محاربة الفساد .. لميس الحديدي يا رجالة الإعلامية الفذة اللي كانت بتحارب الفساد .. " اشكر .. ولا حد غيري يشكر لان زوري تعبان " .. والناس فاهمة كويس ده ايه .. ودي ايه .. وكانت ايه وبقت ايه .. وحبة فوق وحبة تحت وكله على كله ولما تشوفه قوله.
عشان كده كتبت من سنة فاتت مقال كان عنوانه " فيه حاجة غلط " .. مش ممكن بعد ثورتين يبقى ده حالنا ابدا .. اعلام " رقّاص " وجاهل .. ايوه جاهل .. لمّا احمد موسى يبقى مذيع وهو مبيعرفش يكتب خبر من سطرين .. يبقى اعلام جاهل .. لما شريف عامر يستضيف من باب التغيير صافيناز ساعتين والبلد بتتحرق .. يبقى اعلام جاهل وغبي .. ولمّا باسم يوسف يمسك اماني الخياط في حلقة كاملة وهاتك ياتريقة لأنها كانت في فترة ضد الحكم العسكري ايام طنطاوي .. ودلوقتي مش بتمانع في عودة الحكم العسكري لصعوبة المرحلة وحساسيتها .. يبقى اعلام جاهل ومُغرض كمان .. ولمّا محمود سعد وقبله عمرو اديب يجيب عمرو حمزاوي ساعة واكتر ويعمل له قيمة بعد كل الناس ما كشفت حقيقته ، يبقى اعلام جاهل واعيدها ومغرض .. وعايز يتنسف م الوجود.
انا كل املي بل من اهم اولوياتي وطلباتي كمواطن مصري من الرئيس الجديد " ان كان حيجي لمصر رئيس جديد " انه ينضّف الإعلام وشاشات الفضائيات من الزبالين " مع احترامي للزبالين اللي بيشيولوا وساختنا ويلموها " .. انما زبالين الفضائيات " اللهم الا قليل منهم " بيرموا في وشنا قاذواتهم و " خراهم " كل يوم .. واخر الشهر كل واحد يقبض له يجي مليون على القرف بتاعه وفجاجة ريحته.
مش حاطول اكتر من كده .. بس حاختم واقول .. مش اختيار فيفي عبده كأم مثالية هو المستفز .. ده يمكن أقل الأخبار استفزازا .. على الأقل فيفي عبده مهنتها رقاصة ولا تخجل .. انما لميس مهنتها المكتوبة في الرقم القومي إعلامية وصحفية ، لكن الفعل " رقاصة " .. وعشان متقلش اني بسبها ولا حاجة من دي .. رقاصة بمعنى الرقص ع الحبال والأكل على كل الموائد .. وادعاء البطولة والفروسية وانا اساسا تاريخي اسود " يعر ميشرفش" .. وتوفيق عكاشة برضه مهنته إعلامي .. لكنه " رقّاص " الى جانب انه متخلف عقليا .. ولولا القناة بتاعت امه .. مكناش شفنا وشه واتحرمنا من طلعته البهية.
اخر حاجة بقى " بجملة " الاستفزاز .. مش فاكر مين عمل مداخلة امبارح مع لميس الحدبدي .. بس واحد مسؤول كبير .. بيبارك لها على تكريمها كأحسن إعلامية في محاربة الفساد " .. وقال لها بالحرف الواحد : شرّفتي كل ستات مصر ... والله العظيم قالها كده ومسؤول كبير بس مش فاكر اسمه .. وبعد كده زعلانين اوي ان فيفي عبده الام المثالية ؟ .. اذا كانت لميس الحديدي شرّفت كل ستا ت مصر .. تبقى" فيفي " هى امي .. نيلها هو دمي .. شمسها في سماري .. شكلها في ملامحي .. حتى لوني قمحي .. لون " وسطك " يامصر!!