م الآخر| الكلمة دي حرام.. ليه؟

حاجة وبنشوفها في حياتنا تقريبًا كل يوم، لو مش عايز حد يعمل الحاجة دى قدامك قوله: "دي حرام"، ولو واحد بيشتمك قولة "حرام"، ولو لقيت أكل في الشارع أوعى تدوس عليه.. لية؟ عشان حرام.
والأغاني حرام.. والأفلام حرام.. والتليفزيون كمان حرام، وعلى رأى ياسمين عبد العزيز "ولبسك ده حرام"، و"الكلمة اللي انتا قولتها دي حرام، قول استغفر الله بقى عشان متتكتبش في كتابك".
طب مسألتش نفسك قبل ما تقول حرام وحلال هو دة حرام لية؟، قاعدة في حياتنا ماشيين عليها من ساعة ما اتولدنا.. أصل انا سمعتهم بيقولوا كدة.. مين متعرفش؟!،
دايمًا بنعمل فيها فلاسفة، ونردد كلام مش فاهمينة، مشكلة أغلبنا واقعين فيها إن احنا حافظين مش فاهمين، طب تعالى نتخيل كدة لو واحد أجنبي سمعك بتقول كده وسألك.. هو لية حرام؟، ومعرفتش ترد هيبقى شكلك ايه ساعتها.. بلاش.. هو هيعتقد إن انت أصلًا مش فاهم حاجة في دينك.. إسم وبس يعني.
حلو إن يبقى عندك وجهة نظر مستقلة، بس قبل ما يبقى عندك وجهة النظر دي لازم تبقى عارف معنى الكلام اللي بتقوله ايه.. الدين مش ترهيب ولا خوف.. الدين حب، ولو رجعت لأي كتاب سماوي هتلاقي إنه بيحثنا على الحب.. مش بيحثنا على الخوف.
حتى وانت بتعبد ربنا، أيًا كانت عبادتك في الوقت ده.. انت بتعبده عشان بتحبه، واللي بيحب حد بيخاف يزعله منه؛ عشان كدة بتبقى خايف يوم القيامة إنك تقف قدامه وتلاقيه غضبان منك.
قبل ما تقول دة حرام.. اعرف هو حرام لية؟