وجودك اللى كان

خواطر

فاكر..
يوم فرحنا اللى حلمنا بيه كتير وعينيك اللى تلمع لما أقولك "أنا مش عايشة عشان مستنيه فرحنا، أنا مستنية اليوم ده عشان أبدأ أعيش"
فاكر ..
كنا أكتر إتنين مقتنعين أن اللى بيحبوا لازم تبقى روحهم من بعض، وأنا عارفة إن كان فيا حاجة منك، إن أنا مخلوقة عشانك إنت، الناس لما تشوفنى يقولوا أنى شبهك كأنى أختك، حاجة غريبة ربطانا ورابطة الحاجات الحلوة بينا، حافظين قلوب بعض بطريقة تخوف.
فاكر ..
لمعه عينيك لما تشوفنى! كانت بتخلينى أتحدى كل حاجة عشان أفضل معاك، كنت عارفة إن طول ما إحنا مع بعض حنقدر نتغلب على أى وجع وإننا لو يوم افترقنا حتبقى الحياه أصعب.
فاكر..
لما قولتلك إننا عمرنا ما حنفترق طول ما فينا الخير و الحب يبقى حنتقابل، وإن مفيش حد بيقدر يمشى طريق من غير التانى وحذرتك من التوهان و البعد، لأن حضنك هو الجنة بالنسبالى وإن أنا مش حمل الفراق.
فاكر ..
وقوفك جنبى!، طول عمرك ساندنى و مش بتسمح لحاجة تكسرنى، دايما بتمسكنى قبل ما أقع وألمس الارض، و تفهمنى أنى لازم أبقى أقوى عشان أعرف أعيش.
فاكر..
ضحكك عليا لما كنت بحاول أقنعك إن كل اتنين بيحبوا بعض عندهم نجمة فى السما باسمهم، وإنها بتفضل تلمع طول ما حبهم لسه موجود، كنت عارفة من ضحكة عينيك إنك شايفنى بريئة لأبعد الحدود.
فاكر ..
كنت بتحب تسمع صوتى، مكنش مهم عندك تعرف أنا بقول إيه قد ما كان سماع صوتى هو الأهم، وإنك بتحب حكاياتى وخيالى الواسع اللى بيعيشك فى دنيا تانية بعيد عن الواقع.
أنا لسه فاكرة كل الحاجات بتفاصيلها، زى ما نكون لسه بنعشها مع بعض، زى ما تكون لسه هنا جنبى و مش بعيد.. بس يا ترى إنت لسه فاكر..!
_ بحبك .. وحشتنى .. ربنا قادر يخليك مبسوط عنده. _