"أمينة" تحارب التحرش ب"مش ساكتة ومش قابلة لحد ما البلد تنضف"

ترى هي وأصدقاؤها أن العيب ليس في المتحرش.. العيب في اللي بيسكت له

"مش خايفة، مش ضعيفة، مش مكسوفة، مش قابلة، مش ساكتة"، ملصقات وضعتها أمينة محجوب في شوارع مصر الجديدة، اعتراضًا على واقعة التحرش الجماعي "الشهيرة" بطالبة في كلية الحقوق، ولمحاربة صمت الفتيات على هذه الجرائم "مش هسكت ولا هخلي أي بنت تسكت تاني، وهفضل أكتب وأعلّق الكلام ده في كل حتة عشان اللي عايز يتحرش يبقى عارف إننا هنفضحه".
أوضحت الشابة العشرينية، أن فكرة الملصقات هدفها محاولة إقناع الفتيات بضرورة التجرؤ في الإبلاغ عن المتحرش "مهما اتكلمنا وكتبنا وقولنا هيفضل اللي بيتحرش يتحرش طول ما هو شايفنا ساكتين، لازم البداية تكون فينا ونعرفهم إننا مبنخفش وإن مش جريمة على البنت إنها تقول اللي حصلها"، مضيفة "أصحابي رحبوا بالفكرة جدًا وبدأوا ينزلوا معايا ويشركوني إننا نحط الورق ده في كل مكان عشان البنات متسكتش على حقها".
ترى "أمينة"، أن هذا النوع من التوعية سيقضي على التحرش نهائيًا "لو فضلنا نستنى إن المتحرش يتحاكم، أو ياخد حكم بأكتر من خمس سنين عشان يتربى هيكون كل بنات مصر اتحرش بيها"، مؤكدة "من ساعة ما علّقت الورق في المنطقة وشباب الحتة معايا وبيساعدوني عشان ننشر الفكرة في كل المناطق، ونساعد البنات متسكتش على حقها تاني، عشان العيب مش في اللي بيتكلم العيب على اللي هيسكت تاني".
وأضافت: "إحنا مش هنقف بس على مصر الجديدة، كل واحد فينا اتفق مع أصدقائه في مناطق تانية إننا ننتشر ونحاول على قد ما نقدر نعلّق الورق ده عشان الناس تعرفنا أكتر وتنضم لينا وتساعدنا إننا نقضي على الخوف اللي جوانا، والبلد تنضف بقى".