بنات × بنات

عالم البنات مليء بالأسرار ولا يعرف تفاصيله سوى البنات لذا قررنا منح هذه المساحة للبنات ليعبرن فيها عن أنفسهن والحديث عن المشكلات والهموم والقضايا التى تشغل بالهن ويرفض المجتمع فى كثير من الأحيان الاستماع إليها. ويمكن التواصل والمشاركة فى هذا الباب عبر البريد الإلكترونى:
banatXbanatrosa@yahoo.com


خليك راجل وبلاش تعاكس

كلمنى اكتر عن ظاهرة التحرش فى بلدى..

كلمنى أكتر عنك وعن رجولتك وأنت بتقول دى كلها معاكسات بالكلام ومادام موصلتش لمد الايدين عادى إيه يا أخى مفيش احساس؟

ويا ترى لما بتشوف فيديوهات وصور تحرش فى كل حتة وتغمى عنيك عنها وتقول لا أنا عمرى ما شفت واحد اتحرش بواحدة وبتنكر حقيقة واقعة قدامك بتبقى مقتنع بنفسك كدة يعنى؟ ضميرك يبيقى مستريح؟

ولومفيش تحرش امال البنات اللى بتتكلم والصور والفيديوهات والجمعيات الحقوقية اللى اقرت أن ظاهرة التحرش انتشرت فى مصر فى الفترة الأخيرة؟ كل دا ايه فوتوشوب؟

ويا ترى مادام المعاكسات بالكلام عادى زى ما بتقول لو حد عاكس أختك أو مامتك أو مراتك أو بنتك بالكلام هتبقى عادى بقى؟

كلمنى اكتر عن عينيك اللى فضحاك وانت بتفصص جسم كل بنت بتعدى قدامك؟!

كلمنى اكتر عن بجاحتك وأنت بتبرر بكل بساطة لنفسك ان لبس البنات هو اللى بيستفزك؟؟ ويا سيدى لومش قادر تتحكم فى نفسك وتغض بصرك لأن جواك حيوان اقعد فى بيتك مش تنزل وتقرفنا.

أحب أقولك يا متحرش أن المشكلة مش فى لبسى المشكلة فى عينك المريضة.

البنت مش جسم ولا حتة لحمة البنت انسان زيك من حقها تنزل الشارع وتلبس وتتشيك كمان زى ما من حقك بالظبط.

عارف يعنى ايه البنت بقت حاسه أن من الطبيعى جدا تكون ماشية فى الشارع واى ولد يمسكها عادى ويسلام بقى لو شلة تلاقى عندهم متعة رهيبة فى إرهاب البنت واستغلال الموقف مسكة كدة ولا كدة بالمرة ميضرش..أقرب تشبيه لاحساس البنت حاليا وهى ماشية فى الشارع هو انها بتحس انها ماشية فى غابة وسط وحوش لازم معاها اليكتريك ولا سيلف دفينس ولا حتى سبراى عشان تحمى نفسها.

عارف ان البنت ممكن تعد تعيط طول الليل بسبب كلمة سمعتها من اللى انت بتسميه دى معاكسة بالكلام والموضوع مش مستاهل.

عارف أن البنت ممكن تعيش طول عمرها معقدة بسبب حادثة تحرش حصلتلها زمان.

عارف أن بنات كتير بتقتنع فعلا ان هى اللى فيها حاجة غلط من كتر ما اتعرضت للتحرش وأن هى اللى لبسها لافت مع أن العيب مش فى اللبس دا العيب فى العيون.

عارف إن معظم البنات تم التحرش بيهم ان مكانش كلهم ولسة بيكسفوا يقولوا عشان مجتمعنا المريض مفهمهم أن العيب عليهم وحتى لو لقيت ناس معترفة بان الغلط على المتحرش الجملة المعتادة بتاعتهم هو الغلطان آه والعيب مش عليكى بس برضو متقوليش الناس هتقول عليكى صايعة وأنك حد اتحرش بيكى قبل كدة.

عارف ان لسة فى ناس بتقول لوحد عاكسك اسكتى عشان لو زعقتيله هيقول عليكى صايعة.. عارف ان انا شخصيا ناس كتير جدا قالتلى بطلى كلام عن التحرش لاحسن الناس يقولوا عليكى معقدة ولاحد عملك حاجة...ولو انا حد اتحرش بيا ايه اللى يعيبنى فى كدة؟؟ هو ايه غلطتى أنا ضحية لكن مجتمعنا عنده هو ايه تحويل الضحية اللى جانى!


* كتبتها: إيرينى أديب،20 سنة، طالبة فى الفرقة الرابعة كلية التجارة قسم اللغة الإنجليزية جامعة الإسكندرية.
وتهتم إيرينى بحقوق الفتيات وترى أنه من الضرورى أن تدافع الفتاة عن حقوقها فى الحياة فالبنت تعيش طول عمرها تحت سيطرة أبوها أو أخوها ثم جوزها..البنات يرغبن فى الشعور بأن الأسرة تدعمهم فى أخذ حقوقهم دون الخوف من المجتمع أو الاستسلام للعنصرية.وتحلم إيرينى بأن يكون لها دور فى مؤسسة أو منظمة حقوقية وتتمنى تغيير وضع الإنسان فى مصر بشكل عام والفتاة بشكل خاص.