ردا على نوت"موقع اباحي " مش كلنا متحرشين فيه مننا محترمين

رداً على نوت " موقع إباحي
Chérine Thabet
أنا قريت النوت اللي كتبتيها من كام يوم عن التحرش الجنسي في شوارع القاهرة .. وكلامك كان معقول ومنطقي جداً .. وكلنا عارفين إن ظاهرة التحرش في مصر بقت عادة منتشرة جداً و بنشوفها ونسمع عنها كل يوم ، ولكن لاحظت في النوت إنك مش بس بتهاجمي المعفنين اللي بيتحرشوا بالبنات ولا كمان الناس اللي بتتفرج على واحد بيتحرش بواحدة .. لا إنتي هاجمتي كل شباب ورجالة مصر بالكامل .. حلوهم بزفتهم .. اللي بيتحرش فيهم واللي بيتفرج واللي بينضرب عشان إتدخل وحاش عن واحدة .. طبعاً مقدر شعورك وإحساسك وشكلك بيبقي إزاي لما حد بيتحرش بيكي وإنك بتشوفي كل الشباب والرجالة لأموأخذة سيس .. ولكن مش ده اللي حاصل بالظبط .. وبصفتي شاب مصري عايش في البلد اللي بتتكلمي عنها .. ومتهم بالتحرش أو ع الأقل بالسكوت عن اللي بيتحرشوا .. خليني أقولك :
هل تعلمي إن مش كل الشباب في شوارع مصر بتنزل عشان تتحرش بالبنات . بالعكس في ناس بتتهزأ وتتشتم وتتبهدل عشان بس حاولت تساعد بنت حد بيتحرش بيها ؟
هل تعلمي إني أكتر من مرة كنت هترن علقة سخنة عشان شوفت ناس بتتحرش بواحدة وإتدخلت أحوش عنها ؟
هل تعلمي إنهم سابوها وفرضوا عضلاتهم عليا .. واللي يقولي إنت بقه الراجل .. وإنت بقه اللي عاملي فيها سبع رجالة ؟
وهل تعلمي إني ببقي متغاظ ومخنوق وقرفان أكتر منك لما بشوف واحد بيتزنق وبيفعص في واحدة أو بسمع عن حالة تحرش ؟
هل تعلمي إن الضحكة أو الإبتسامة اللي بتشوفيها علي وش حد بيتفرج علي واحدة الناس بتتحرش بيها بتكون تعبير مخالفاً تماماً عن اللي جواه لإنه حاسس إنه مش هيقدر يعمل أي حاجة لإنه لو فتح بوئه هيتروق ويتعمل عليه أحلى لحن ؟
وهل تعلمي إنه مش كل اللي بيسكت عن التحرش خايف بس مش عارف يعمل إيه ؟ لإن الدولة وقوانينها وتشريعاتها أصلا ساكتة علي قرف زي ده ؟ وبتعكس لا مبالاة وسكوت الشرطة ومؤسسات الدولة التشريعية والتنفيذية و الرقابية عن مواجهة الموضوع كله ؟
هل تعلمي بردو إن سكوت الدولة عن سن قوانين للتحرش مش مبرر خاااالص عشان الناس تسكت لما تشوف واحدة يتتهرس في أتوبيس ولا طابور عشان تجيب ملزمة ؟ بس بردو مش لاقيين حل جزري ؟
هل تعلمي إنه ليا واحد صاحبي كان بيتعمد يجيب الملزمة في أكتر وقت زحمة عشان يعرف يتزنق ويحسس براحته ؟
هل تعلمي إن صاحبي ده إسمه أشرف ؟ وكان بيجيب ملازم كلية الحقوق من مكتبة المتحدة أدام باب تجارة – جامعة القاهرة ؟
هل تعلمي إني كنت بقف بعيد أستناه .. وأشوفه بيعمل إيه بالظبط بيخليه مستمتع أوي كده .. بس اللي كان بيلفت إنتباهي أكتر نظارات البنات والشباب عليه وإشمئزازهم منه ومن حركاته المكشوفة ؟
وهل تعلمي إني كنت كل مرة أتخانق معاه بسبب الموضوع ده وبردو كان يحلقلي وينفضلي ويقولي ملكش دعوة يا عم أنا كده .. ونعمل مصيبة وخناقة ؟
وهل تعلمي إن في بنات كنت بشوفهم ولا كأنهم في الدنيا وبينهم وبين أشرف حيطة مع إنه حاضنها ؟ وناقص يخلع بنطلونه ؟
وهل تعلمي إني مكنتش بعرف أفسر سكوت البنت عن اللي بيعمله أشرف ده إيه بالظبط .. حاسه ولا مش حاسة ولا خايفة تتكلم لتتفضح ولا بتقول عدى الدقيقتين دول وخلاص ولا ايه في دماغها ؟
وهل تعلمي إني ببقي مش عارف أعمل إيه وقتها فعلاً والله العظيم .. مش خوف ولا لا مبالاة .. بس ببقي مش قادر أفكر ؟
وهل تعلمي إن أشرف لو قرأ النوت ده هييجي يفتح دماغي ؟
وهل تعلمي إن نص الشباب ليهم صاحب زي أشرف صاحبي وبيخرجوا ويروحوا وييجوا بس عمرهم متحرشوا ببنت ولا قل أدبه عليها ؟
هل تعملي إن أغلب الشباب " المحترم " إبن الناس المتربي لما بيشوف واحدة إياً كان لبسها ومشيها وعقله بيوزه ييجي جنبها ويحط إيده .. بيسمع صوت جواه بيقول ما انا عندي أختي وأمي وأكيد هيتعمل فيهم كده ؟
وهل تعملي إن أي حد بيتحرش بواحدة بيبقي عارف ومتأكد إنه أخته وأمه بتندعك في الشوارع بمزاجه أو من ورا ضهره بس مش عارف يتكلم .. فيتحرش ببنات الناس عشان يحسس نفسه إنه راجل ؟
هل تعلمي إن الناس اللي بيفضوا أي حالة تحرش بيكون همهم الأكبر إنهم يمشوا البنت من الموقف المقرف اللي هيا فيه خوف عليها ليحصلها أكتر من اللي حاصل مش كسل ولا مبالاة منهم ؟
هل تعلمي إنه ممكن تكون دي أقصى حاجة ممكن يعملها في بلد زي دي وأوضاع إجتماعية مهببة زي دي ؟
وهل تعلمي إنه بيفكر في مليون هم وهم مستنيه لما بس بييجي في دماغه إنه يروح معاكي القسم يشهد ويضيع وقته المليان بخمسومية حاجة أهم بكتير جداً " من وجهة نظره " من إنه يروح ويقول فعلا الولد ده مسك البنت دي ؟
وهل تعلمي إنه لو إستنجدتي بواحد في الشارع وأخد الكلب اللي إتحرش بيكي وراح القسم هيتعامل نفس معاملة المتحرش بالظبط ويمكن أكتر ؟
وهل تعلمي إنه بردو لو طلع من القسم كويس من غير ما يتعلم عليه .. هيستدعوه كل يومين في شهادة وتحرير محاضر ؟
وهل تعلمي إنه ممكن يفكر إن المتحرش ده بلطجي ويخرج بعد العلقة أو الكام يوم سجن يستناه أدام البيت ومش بس يتحرش بأخته ولا بنته لا دا يعمل عليهم حفلة ؟
هل تعلمي إن إحنا الشباب والرجالة زهقنا وقرفنا من موضوع التحرش بالبنات والله العظيم ومش عارفين نعمل إيه ؟ وحاسين بالضعف والإهانة من اللي بنشوفهم ونسمعه منكم ؟
وهل تعلمي إن أغلب الناس مبتعرفش تفرق بين التحرش والحاجات التانية اللي بتتعمل في الشوارع والحدايق والجامعات .. لإن الأمور بقت سلطة والناس واخدين راحتهم ع الأخر .. ويقولولنا حرية ؟
هل تعلمي إن الشباب والرجالة والعيال اللي بتتحرش لما بتسمع كلام واحدة زي عزة الجرف دي .. بيقولوا هنعمل أكتر ويستاهلوا ؟
هل تعملي إني لما قريت النوت بتاعتك حسيت إني متضايق جداً ومش عارف ألاقي رد ؟
وهل تعملي إني عارف إنك لما تقري الكلام ده ممكن تقولي أهو جاي يدافع عن اللي بيتحرشوا بالبنات في الشوارع ؟ وتلاقيه واحد منهم ؟
وهل تعلمي إني مش خايف إنك تقولي كده عليا .. لإن ربنا عالم بكل واحد وتصرفاته ؟
هل تعلمي إنك لو عملتي مبادرة أو حملة ضد التحرش هتلاقي فيها شباب محترم كتير جداً منضمين ليها وبيدافعوا عن حقوقكم ؟
هل تعلمي إن كلامي مش دفاع عن الشباب بقدر ما هو إنصاف لناس إنضربت وإتشتمت عشان إتدخلوا وحاشوا عن بنت حد إتحرش بيها في شارع حتى ولو كانوا واحد ولا إتنين