م الآخر| عن معاناة جيل "متعلم"

جيل خايف م الكتاب ليعضه
جيل يسمع عن الدراسة.. يزعل
كلمة "امتحان" بتخضه
و ياما نفسه من التعليم.. يخلع
الدراسة بالنسبة له غصب واقتدار
بيروح مدرسته مكشم وشه
وساعات يتمني الموت أو الانتحار
ويفضل يقعد في البيت أو حتي يشارك طير في عشه
عن إنه يصحي الصبح و يروح علي مدرسته
يقعد علي الدكة يسمع تلقين وكلام ممل
محدش بيسمع آراؤه و لا حتي يرد علي أسئلته
إيه اللي فرقه طيب عن الكرسي اللي قاعد عليه؟
أنا ليه اتحبس في فصل وأقفل بؤي.. ليه؟
وليه فكري كله يبقي حصة و كتب خارجية؟
وليه أحلم بامتحان وقصص تاريخية؟
ليه طموحي الوحيد يبقي الدرجة النهائية؟
و لو نقصت درجة تبقي النهاية هي ديه؟
ليه؟
ليه أنسى ان الحياة مش ورق ولا موسوعات
وإن الناس مختلفة القدرات
وأن طز.. أكبر طز في الدرجات
طالما انت بتركز وتفكر وتحلل
عمرك ما تخلي غيرك يخليك تقلل
من نفسك وفكرك وشطارتك
ياما ناس قفلت امتحانات..
وقاعدة دلوقتي في البيت بتخلل!