م الآخر| إحساسك

عن إحساسك..
بالعمر بيجري قصادك
وبيسبق حتى سمار الشَعره
اللي حرقها الحِمل
فاتحول لونها في راسك
للأبيض
مع إن اللون دا بعيد جدًا..
عن واقع حالك!
عن إحساسك..
اللي الوقت بيستخسر مرة
يفكر روحك بيه
فاتعدى سنينك زي الثورة ماعدت
وف غمضة عين
تلاقيك مش فاكر إن إمبارح
كان عمرك لسه
معداش العشرين
وإنك كنت بتحلم..
نفس الحلم الحالي الوقت
يجوز كان سنك سابقة في يوم
وعيونك دي اللي إمبارح
كانت تقدر تلمح بكرة بأسهل نظرة
مابقتش بتلمح غير فنجان القهوة
طشاش
إتغير كُل ما فيك
مش فاضل منك
غير نفس الحِمل المنقوش فوق الخدين
ونفس الحلم اللي استنيته سنين
ومعاده مجاش!