أنا وفنجان القهوة ..

بعد العصاريبيجي ساعه وقبل المغارب بشويه
قعدت أفكر ف بتاعه سموها شمس الحريه
تحت الشباك وأستنيتها أشوفها وهي معديه
لقيتها ماشيه وبتروح مع وعد بكره أنها جايه
*****
قلت ح أصبر وأستني وعملت فنجان القهوه
وشربته شفطه ورا شفطه لقيتها خلصت علي سهوه
وعشاني متشوق أفهم عملت الفنجان التاني
وقعدت أفكر ومسهم وأنا لسه بأشرب ف القهوه
*****
أيه معني كلمة حريه ونفسي بيتعد عليا
وكلمة حق تورطني تنفض الناس من حواليا
وعملت الفنجان التالت وشربت منه العبوديه
ورجعت أحلم واستني ف طلوع الشمس المخفيه
*****
الشمس نازلته وبتميل وأنا لسه بأشرب ف القهوه
والدنيا تضلم وتليل شمس الحريه بقت شهوه
وبدال ما أحزن وأتألم ولا أقعد أصرخ وأتكلم
حاولت أشرح وأعلم ف قلوبنا أيه معني الصحوه
أبص ف فنجاني الفاضي أشوف نفسي بقيت قاضي
قاعد باحكم سيف ماضي وباوزع الرزق علي اولادي
والكل بياخد علي قده والحرامي يلزم حده
والكل فيها يبات شبعان ولا واحد فيهم مش راضي
*****
وقعدت أفكر من تاني وعملت الفنجان الرابع
وتحت الشباك أستهواني أشرب فنجاني واراجع
أفكار غريبه وشداني لدنيا مليانه مواجع
واتمني ياريت الظلم ياناس بين ولادي ماهوش راجع
*****
أحاول أنام مش عارف وعيني بتدور ع النوم
وأشرب ف القهوه وشايف السما مكسيه غيوم
وعشاني سهران مستني أعمل فنجاني الخامس
وأرجع أبص من الشباك يمكن تطلع شمس اليوم
*****
وأرفع أيدي بالفنجان وأنا لسه قاعد بأشربها
أحس بمراره علي شفايفي ما سبقش ليا أجربها
نار ف حلقي بتكويني علي حق ضاع قدام عيني
لبناني ولا فلسطيني أهي دعوه والرب كتبها
*****
وأسهر لوحدي ومن تاني أعمل فنجاني السادس
وعشانه ده اللي ف أمكاني أتمني بطعمه أكون حاسس
مش عارف أيه اللي بيجرالي والشمس مش راح تصحالي
مفيش ف الدنيا غير أحزان لساني منها يروح لاحس
*****
من كتر همي وكلت الرحمن وشربت فنجاني الناقص
ولو ح أشرب ميت فنجان بتنزل ف البطن كوارث
وقلت أزود ف الفناجين عشان تصحصحني القهوه
بصيت ف البرطمان لقيت البن كمان خالص