م الآخر| أغنية أطفال.. للكبار فقط

ماهي مقاييس أغنية الأطفال؟
تتحدث عن موضوع يخص الطفل
أن يتعلم الطفل شيئًا ولو ضئيل من موضوعها
ليس شرطاً على الإطلاق أن يغنيها أو يشارك في غنائها طفل
أن تكون موجهة للطفل
أما لو تحدثنا عن أغنية (بابا فين) فما هي المقاييس التي على أساسها أدرجناها تحت بند (أغنية أطفال)؟
تعالوا نتناول كل عنصر من العناصر التي ذكرناها أعلاه ونطابقها على هذه الأغنية
تتحدث عن موضوع يخص الطفل
تعالوا نتعرف على الموضوع الذي تتحدث عنه الأغنية من خلال كلماتها
سأضطر في هذه النقطة أن أتحدث بالعامية، لكي يتناسب الحديث مع مستوى الأغنية
الطفل: بابا فين؟
الأم: بابا نام
لحد هنا كويس
الطفل: يا سلام
يا ترى الطفل يقصد إيه ب(يا سلام)؟.. هو ليه متصور إن أمه بتكذب عليه؟
الأم: عايز إيه؟
الطفل: عايز أدخل الحمام
ماشي.. هوافق إن الأب هو اللي مسؤول عن المسائل دي، رغم وجود الأم.
الأم: بطل يا واد انت شقاوة بقى
شقاوة ليه؟ الواد مزنوق.. ده انتي أم رخمة صحيح
ولاّ عشان روحي فيك متعلقة
منين وانتي مش عايزة توديه الحمام؟
الطفل: يا ماما يلا بسرعة افتحي بقى
ده انتي قافلة من جوا كمان
الأم: ما تبطل يا واد انت شقاوة بقى
بتكرريها تاني؟ ده انتي بتأكدي اللي فهمناه بقى.
إيه هو ده بقى اللي فهمناااااااه؟
لو حللنا الموقف هنفهم إن بابا مش نايم ولا حاجة، ده بابا عايش حياته ومش عايز إزعاج، بأمارة الباب اللي قافلينه ومش عايزين يفتحوه، لأ وكونها بتقوله (ما تبطل شقاوة) ده معناه إن الواد فاهم وإنه مش عايز يعمل حمام ولا حاجة لأ ده فاهم اللي بيحصل جوا وبيغلس عليهم كمان.
الأم: حبيبي عمل الواجب ولا اتنسى
الطفل: يا ماما بكرة الجمعة مافيش مدرسة
هي بتوزعه وهو مصمم يغلس عليهم، وعشان يكمل الغلاسة يفضل يخترع في ألعاب عايز يلعبها مع مامته وهي في وسط مابيتكلم كده تقوم قايلة: يوووه.. وده وقته؟
هييجي واحد يقولي: ياجدع بلاش افترا، مش معقول طبعاً يكون ده المقصود انت اللي دماغك مريضة ونيتك مش ولا بد، مايمكن يكونوا عايزين يأيلوا شوية
أقوله: طب فسر انت المقصود من الكلمتين دول
الأم: أبداً ياخواتي مش معقولة.. تكون دي دماغ طفل في سنة أولى
فسروها انتوا دي بقى
هيكون إيه المقصود باللي (مش معقول يكون في دماغ طفل في سنة أولى) في حالتنا دي؟
وأخيراً
الطفل: بابا فين؟
الأم: بابا نام
الطفل: يا سلام
الأم: عايز إيه؟
الطفل: عايز أضربله سلام
طبعاً بناءً على ما سبق، يبقى الواد عايز يضرب لأبوه سلام على إيه؟
آدي موضوع الأغنية!
ليس شرطاً على الإطلاق أن يغنيها أو يشارك في غنائها طفل
بالطبع كان من الممكن أن يصاغ موضوع كهذا كأغنية فردية، أو دويتو بين الأب والأم، إلا أن الموضوع كان سيبدو صريحاً للغاية، ما يجعل موافقة الرقابة على الأغنية شبه مستحيل، فالحل هو أن يصاغ الموضوع كدويتو بين الأم و الابن فتمرر من الرقابة على أنها أغنية أطفال، ولكي تحبك الخدعة تم إقحام الجزء الذي نسمعه قبل بداية الأغنية:
اللي يزعل ماما.. نوتي
واللي يزعل بابا.. نوتي
واللي مايسمعش الكلام
نوتي نوتي
وبهذا الشكل أصبحت أغنية أطفال.
تبقى النقطة الأخيرة والأهم
أن تكون موجهة للطفل
هذا لو افترضنا أن هناك أطفال فوق سن الرشد.
بعد أن حللنا الأغنية ، هل لا زلتم على قناعة بأنها أغنية أطفال؟
إن كنتم كذلك.. فالمشكلة إذن ليست في صناع الأغنية
بل فيكم أنتم.