حد يغير أسم أمه ؟! /عصام سرور

حد يغير أسم أمه ؟!


* عصام سرور

مش مصر هيه أمى ؟ ينفع حد يغير أسم أمه أول ما سمعت الكلام دة قعدت اضرب كفا بكف يانهار اسود ومنيل بقى مصر اللى الواحد اتولد واتربى وعاش فيها طول عمره هيغيروا اسمها يادى المصيبة السودة وبعدين والعمل اية طيب والأغانى الوطنية اللى الواحد اتربى عليها وعلمتة يدوب فى عشق مصر يعنى الست شادية ربنا يطولنا فى عمرها لما قالت يابلادى يااحلى البلاد يابلادى فداكى انا والولاد يابلادى ياحبيبتى يامصر يامصر كانت بتنبح فى حسها اونطة .


والاستاذ محمد ثروت لما قعد يقول مصريتنا قوميتنا وطنيتنا حماها الله الله الله والمرحوم فريد الاطرش لماقال سنة وسنتين يا مصر يا عمرى يانور العين والشيخ سيد لما قال قوم يا مصرى كل الاغانى دى هنعمل فيها اية .


-طيب كل دول مش مشكلة هنعمل ايه مع اخونا الفنانين العرب اللى جملوا مصر وعملوا اغانى بأسمها نقول اية للست فيروز لما تيجى تقولنا بقى انا اتعب نفسى واغنى مصر عادت شمسك الدهب وتيجوا حضراتكم تتضيعوا مجهودى وتغيروا أسم مصر ابقوا تعالوا قابلونى لو عملتلكوا اغنية بأسم البلد الجديد وغيرها كتير زيها .


- المهم قلت ياواد اهوا اللى عمل كل الاغانى دى لمصر البركة فى الفنانين الموجودين يعملوا اغانى جديدة للأسم الجديد بس رجعت افتكرت اغنية المرحوم فؤادالمهندس مصر هيه أمى يانهار كوبيا دى مصر هيه أمى بقى أنا هغيير أسم أمى طيب أزاى المهم قلت أجس نبض أمى فى الموضوع ده بس انا عارف أمى لو فاتحتها فى الموضوع دة مش بعيد تتضربنى تسعة وتسعين قفا على سهوة .


المهم استبيعت وخلتها واقفة مشغولة فى المطبخ ووقفت لها على باب المطبخ وقلتلها

انا : ماما كنت عايز اخد رأيك فى موضوع


ماما : يعنى ده وقته يامنيل


انا : اصل الموضوع مهم جدآ .


ماما : خير يا أذكى اخواتك .


انا : اية رأيك لو لو لو .

ماما : انتى هتفضل تلو لو انطق .

انا : اية رأيك لو نغير اسمك .

ماما : سكتت شوية وقالتلى وهتسمينى ايه بابا ويبقى عندك اتنين بابا مينفعش صح ولا اقولك سمينى عمتى ماهو ابوك معندوش اخوات بنات ونفسه فى عمة انت ياابنى هتفضل عبيط كدة طول عمرك ورفعت ايديها للسما وقالت يارب ياتشفية ياتخده وتريحنا من غباءة .


- قلت مفيش غيره طبعآ أبراهيم المنجد صاحبى عديت علية صباح الخير يا هيمة وكان قاعد بيددق فى كرسى صالون وقلتلة سمعت آخر الاخبار ياهيمة قاللى مش عاوز اسمع حاجة .قلت له : لية دى اخبار مهمة اصل انا سمعت انهم هغيروا اسم مصر . لقيت الراجل بطل دق وراح بصصلى وقاللى مين همة اللى هيغيروا اسم مصر . قلتلة المصريين . قالى واما المصريين يغيروا اسم مصر هيبقى اسمهم ايه. اكيد هيبقى اسمهم على الاسم الجديد .


وبعدين يا استاذ دانا مسافر اعمل عمرة فى رمضان أفرض سافرت وهيه مصر جيت ارجع لقيتهم غيروا الاسم ارجع ازاى .

ياعم ابراهيم متقلقش من حاجة زى دى تذكرة الطيارة بتبقى ذهاب وعودة .

انت غبى ليه يااستاذ مين قالك انى هقطع عودة يعنى فى العودة يكون الاسم اتغير يروح عليه ثمن نصف التذكرة انا هقطع ذهاب بس بس لو وانا هناك غيروا اسم مصر اروح شركة الطيران اقولهم انا عاوز ارجع فين يادى النهار الاسود يعنى ممكن معرفش ارجع مصر ازاى ياعالم اخرج من بلدى وهيه مصر اجى ارجع ملقهاش .


بصراحة لقيت الراجل ابتدى صوتة يعلى وهوهبيكلم نفسة قليت اخلع ياواد .


- طلعت اتمشى على الكورنيش بصيت للنيل قلت مش ممكن لو غيرنا اسم مصر دول المنبع تاخد النيل مننا مش همة كانوا متفقين مع دولة اسمها مصر ويقولك هيرودت قال مصر هبة النيل دلوقتى مفيش مصر يبقى مفيش نيل نعمل ايه ساعتها نشرب مياه ساقعة ازاى .


طيب انا اتعودت اشجع منتخب مصر لما يلعب اشجع مين دلوقت .


طيب العيال اصحابى اللى مسافرين بره هشفهم تانى ولا لأ وهيرجعوا ازاى لو غيروا اسم مصر واهلهم هيعملوا ايه لما يعرفوا ان ولادهم مش هيعرفوا يرجعوا مصر . واهل ابويا فى بحرى واهل امى فى الصعيد هيجولنا ازاى دول كانوا لما بيبقوا جايلنا كانوا بيقولوا نازلين مصر .


فى الأخر قلت اكتب كلمة للناس اللى عايزة تغير اسم مصر اقولهم فيها والنبى سيبوا مصر زى ماهية احنا بنحبها كدة سيبوها فى حالها خلوها حضنانا وسيعانا ومدفيانا ليه عايزين تولعوا فيها هيه مش امكم زى ماهية امنا ربنا يحفظها وتفضل مصر مصر دايمآ مصر . - على اسم مصرالتاريخ يقدر يقول ما شاء و انا مصر عندى احلى واجمل الأشياء .



*كاتب من مصر
البريد : essam.sror@gmail.com