حوار «مسلسلاتى جدا»

هذا الحوار كشف إنتاج لمعظم مسلسلات رمضان
أنا: صباح الورد يا بابا فين ماما؟
بابا: «ماما فى القسم» بتجدد بطاقتها وبتعمل بطاقة اختك
أنا: كنت هقولكم حاجة بس هقولك أنت الأول بابا أنا «عايزة أتجوز»
بابا: ومين «طوق النجاة» ده اللى هينتشلك من بحر العوانس
أنا: ابن الجزار اللى فى «الحارة» أظن مفيش عليه كلام، يعنى لحمة كل يوم ولبس حرير فى حرير، ونومة على «ريش نعام»
بابا: دى سمعتهم على كل لسان، ده يجى من كام يوم محلهم اتشمع «بالشمع الأحمر» انتى تستهلى إللى أحسن منه.
أنا: ليه يا بابا إنت شايفنى الأميرة ديانا ولا «كليوباترا» وبعدين ده كويس ومؤدب.
بابا: إنت متعرفيش تحكمى على حد أنتى لسه «قطة مغمضة»
أنا: يابابا ما أنا لو فضلت مغمضة علطول كده هنسى الشوف وأبقى «قطة عميا» والنبى تقابله.
بابا: امتى؟!
أنا: هو كان عازمنى على الغدا إمبارح وقال لى إنه هيقول ل«الجماعة» عشان هيزورونا يوم الخميس أو الجمعة.
بابا: ماشى مع إنى مش مرتاح
أنا: يووه أنت شفته؟! كلمته؟! احكم بعدين إنت ليه عايز تعذبنى؟!
بابا: أعذبك!! ليه هو أنا جوز أمك.
أنا: أكيد طبعا يا جميل «جوز ماما» إنت مش كاتب على الحاجة دى ولا إيه يا شقى.. أهى ماما جات قولها بقى.
- وبعد ما قالها -
ماما: أهم حاجة بتحبيه؟
أنا: ده «أغلى من حياتى»
ماما: خلاص يجيلنا الخميس
- يوم الخميس - وبعد ما فطمته يقول لأهلى بابا وماما بدلا من عمى وطنط لتقريب أواصر الحوار اقصدى أواصر الحب».
العريس: أنا يسعدنى يا «بابا نور» أنى أخطب بنتكم «زهرة» بابا: طيب با ابنى كلمنى عن نفسك والشبكة والشقة والحاجات دى.
العريس: الشقة فى «بيت العيلة» فى المهندسين وأنا والعروسة اتفقنا.
- أقاطعه بالحديث بدل ما يخرف -
أنا: اقترحنا يا بابا مش اتفقنا إن تكلفة العفش مقسوم علينا أحنا الاتنين «نص أنا ونص هو»
بابا: هسأل عنك وأرد عليك الأسبوع الجاى. - تانى يوم.
بابا: يا زهرة عايز أقولك إنى مش موافق على الجوازة دى. أنا: يا بابا أنا ما صدقت أحب، يرضيك أفضل أنا وهو متصاحبين وأجيبلكم «العار». بابا: عينيه بتطق شرار، ويهم يضربى بالمقشة. «بوم.. تك.. طاخ.. طوخ» مؤثرات صوتية تدل على الضرب.
أنا: آآآه.. خلاص.. «حرمت يا بابا».؟