حوار مع صديقي الطبيب

عيادة الطبيب النفسي هي أصعب مكان رجلك بتقدر تخطيه، أصله برضه إحساس صعب أوي إنك تعترف بأنك مريض ومحتاج تتعالج من أكتر حاجة تكسف في الدنيا أو عشان أكون دقيق في ألفاظي أكتر حاجة تكسف في بلدنا.
بلدنا بلاد الأي حاجة على رأي ميدو زهير... ميدو زهير هو اللي كاتب أغنية إنسان بتاعت بلاك تيما، مبقتش أحب فرق وسط البلد –أنا بسميها كدة- تحس إنهم امسخّوا كدة... شوف أهو أنا بقيت كدة من موضوع لموضوع لا بركز في الأولاني ولا بكمل في التاني.
أنا بحب الناس جداً لكني بكره التكنولوجيا... حقيقي بكره الواتس أب والفيبر والبي بي إم والفيس بوك وتويتر وغيرهم، إحساس المراقبة وإن مفيش أي خصوصية إنت بتمتلكها، شيء سخيف جدًّا أكتر من جرافيتي سيسي كاتل وتسلم الأيادي.
هو صحيح مين صح ومين غلط، هي دي ثورة ولا انقلاب ... بس أنا شايف إن المسمى مش هو الفيصل في الموضوع والإخوان كان لازم يمشوا ... لأ بس إنت مش فاهمني ... مفيش حد يرضى لناس تموت من غير ذنب... بس ما هو اللي قال لازم نضحي ب 100 ولا ب 1000 عشان الباقي يعيش...هو أنا ممكن أولع سيجارة؟
التدخين ممنوع في العيادة أكتر من الكلام في السياسة.
شوفت فيلم فرش وغطا حلو بس في حاجة ناقصة ... لا بوسة ولا حضن ده يا مؤمن مفيش في حتى أغنية للأستاذ مدحت صالح وكلمات الدكتور مدحت العدل.
منظر العيال وهما رايحين المدرسة الصبح يفرح، بنات بضفاير وماسكين في إيدين بعض وصوت الراديو ملازمهم وأغنية لمحمد فوزي في الخلفية، الكلام ده كان في أواخر التمانينات وأوائل التسعينات، أيام آيس كريم في جليم ومحمد هنيدي كان كومبارس.
أنا مرة حلمت بأني كنت ماشي في شارع فاضي فجأة طلع ناس معرفش منين قعدوا يزعقوا لي ويقولوا إحنا عملنا الثورة في 30-6 ورجعنا بلدنا تاني وفضلوا يشتموا فيا، ومعاهم كلاب بتجري ورايا، جريت كتير لحد ما نفسي اتقطع، فجأة لقيت نفسي في شارع زحمة عديت نصه بالعافية وبعدي النص التاني حسيت نفسي بأمان لكن ملحقش قلبي يطمن، رجلي التانية قبل ما أعدي الشارع خبطتها عربية معدية بسرعة فطرت في الهوا وأنا شايف نفسي يوم 28 يناير في الميدان بعد ما صوتي راح من الهتاف... صحيت يومها خايف جدًّا لكن شربت سيجارة فهديت.... هو أنا ممكن أولع سيجارة؟
خلاص مش مهم ومش المهم العمر يجري ولا إن اللي ببات فيه بصبح فيه، ولا أن الأيام شبه بعض والملل هو الصفة المشتركة والحزن هو السمة الدائمة والإحباط الصديق المفضل، لكن المهم اللمة الحلوة الكدابة والضحكة من ورا القلب والابتسامة الصفرا هي اللي بتدوم في مجتمعنا، مش مهم شباب في العشرين شكلهم وهمهم أصبح أكبر من سنهم أضعاف.... مش مهم.
شكرًا يا دكتور أنا برتاح في الكلام معاك .... زي النهاردة الأسبوع الجاي هاجي ومعايا ال 250 بتوع الجلسة عشان أشتري حد يتكلم معايا.