صباح الخير يا عم أحمد

صباح الخير ياعم أحمد. وألف تحية، لروحك الحلوة..
أنا واحد بيحبك، من بين ملايين، يمكن عمرى ما كلمتك، «وش لوش» وما افتكرش قعدت معاك قبل كده، عارف قعدتك حلوة، بس اللُقا كما تعلم قدر ونصيب. لكن كنا سوا فى الميدان، وفى «طلعت حرب»، كنت فى وسطنا شمعة، ناخد منك النفحة، ونكمل مسيرتنا.
صباح الخير على الورد اللى فى خدودك، على اللمعة اللى فى عيونك، على الفقراء فى قصايدك..
صباح الخير على قلبك الدافى، وصراحتك، على لسانك الساخر اللاذع اللى اتعود يقول الحق..
صباح الخير على مصر تنده عليك، تجاوب شعر، تسمع نداها تقول: نعم يامّه.
صباح الخير على صوتك، مجمّع الأحبة فى الميدان والشارع، صباح الخير على قصايدك، هتاف يطلع، يهز الكون.
صباح الخير عليك، فى أول أيامك فى دار الحق. الورد اللى فتّح فى جناين مصر بيقول لك «صباح الفل».
صباح الخير، من أهلك ومن ناسك، من العمال والفلاحين والطلبة، والحرافيش، والفقراء، والدراويش، والمجاذيب.
صباح الخير يا أبوالنجوم، يا فاجومى، يا مصرى يا عربى يا أصيل.
صباح الخير عليك وأنت بتحضن عبدالناصر، وبتقول له «كل الجراح طابت».
صباح الخير عليك وأنت وسط حبايبك الشهداء، متشوقين يعرفوا منك، يسمعوا عنا وعن حالنا، أمانة عليك تبلغهم، تطمنهم: ثورتنا وثورتهم لسه مستمرة. قل لهم يا نجم: مصر الثورة راكبة الموجة العفية، وماشية فى سكتها لبر السلامة.. معجبانية وصبية.
صباح الخير على روحك، هتفضل عايشة حوالينا، طول ما الشموع قايدة، وبتنور لنا السكة، طول ما مصر غنوة مفرّعة فى الحلق، طول ما البقرة حلوب.. تحلب قنطار، طول ما إسكندرية ماريا عروسة البحر، طول ما الثائرين ع العهد، طول ما عامل مصر المجدع عارف دوره فى الوردية، طول ما الفلاحين بيرووا الأرض بعرقهم، يزعقو للريح يواتى، طول ما عبدالودود، رابص ع الحدود ومحافظ ع النظام، طول ما الجدع جدع والجبان جبان، طول ما شقلبان.صباح الخير يا عم أحمد.
الأخبار المتعلقة:
رايح مشوار وراجع!
«بهية» تودع «الفاجومى»
«نجم» لن يسقط أبداً
هتوحشنا يا عم نجم
ليت «نوارة» تعرف أن أباها لم يمت
نجم الوطن خَفَت..
بالفيديو| جنازة الفاجومى: انهيار وبكاء فى وداع «شاعر الفقراء»
بالصور| رحل جسد «نجم» وترك «كلمة وصورة»
«عيسى»: «نجم» كان متفائلاً.. و«30 يونيو» إحدى نبوءاته
من «الغورية» إلى «مساكن الزلزال».. حياة «نجم» على «السطوح»
آخر كلمات الفاجومى: «ماتخافوش على مصر»
كلمتين لمصر
نجم فى السما