كلمتين لمصر

كل عين تعشق حليوة
وانتى حلوة فى كل عين
يا حبيبتى أنا قلبى عاشق
واسمحيلى بكلمتين
كلمتين يا مصر يمكن
هما آخر كلمتين
حد ضامن يمشى آمن
أو مِآمن يمشى فين
■■■
شابة يا أم الشعر ليلى
والجبين شق النهار
والعيون بحرين أمانى
والخدود عسل ونار
واللوالى بابتسامتك
يحكوا أسرار المحار
يللى ساكنة القصر عالى
إمتى يهنالى المزار
كلمينى يا صبية
طال علىَّ الانتظار
كلمتين يا مصر يمكن
هما آخر كلمتين
حد ضامن يمشى آمن
أو مِآمن يمشى فين
■■■
قصرك المسحور غيلانو
أغبى من دود الغيطان
بعد مص الغصن الاخضر
ينحتوا عضم العيدان
واللى خلى الأرض خضرا
واللى خلى الدار أمان
عاش بجور ملو جوفه
مات بخوفه من الغيلان
طوّع الغلبان
ما قالش عن شقا العمر اللى كان
كلمتين يا مصر يمكن
هما آخر كلمتين
حد ضامن يمشى آمن
أو مِآمن يمشى فين
■■■
آدى كلمة من عذابى قلتهالك
باقى كلمة
من حنينى صنتهالك
فى الضلوع من دنيا ضلمة
كنت خايف يلمحوها
يقتلوها فى سكة ضلمة
سقسقت والنور بشاير بشاير
زهرة الصبار يا سلمى
يا نسيم الشوق يا طاير يا طاير
خد لمصر فى الصبح كلمة
طول ما يبقى الركب ساير
بالبصاير والعينين
يبقى ضامن يمشى آمن
يبقى عارف يمشى فين
الأخبار المتعلقة:
رايح مشوار وراجع!
«بهية» تودع «الفاجومى»
«نجم» لن يسقط أبداً
هتوحشنا يا عم نجم
ليت «نوارة» تعرف أن أباها لم يمت
نجم الوطن خَفَت..
بالفيديو| جنازة الفاجومى: انهيار وبكاء فى وداع «شاعر الفقراء»
بالصور| رحل جسد «نجم» وترك «كلمة وصورة»
صباح الخير يا عم أحمد
«عيسى»: «نجم» كان متفائلاً.. و«30 يونيو» إحدى نبوءاته
من «الغورية» إلى «مساكن الزلزال».. حياة «نجم» على «السطوح»
آخر كلمات الفاجومى: «ماتخافوش على مصر»
نجم فى السما