- عم صيام: إيدين الناس نشفت.. الهدوم اللى جمعناها قليلة أوى.
- سامى: أصحاب المحلات بيشتكوا م الظروف والأحوال.. وبيقولوا إن البيع والمكسب موش زى الأول.
- عم صيام: طيب ما يتبرعوا بقى عشان ربنا يفكها عليهم.. عمر ربنا ما هيبارك لهم طول ما بيبخلوا بالطريقة دى.
- محمد: ممكن نحرك جزء م الفلوس اللى فى صندوق التبرعات ونشترى منها شوية هدوم.. عشان نعرف نكفى ع الناس.. أسر كتير جداً بتسأل عن هدوم العيد؟
- عم صيام (بغضب): إنت مفيش على لسانك غير صندوق التبرعات؟!
- محمد: أمّال هنعمل إيه؟.. نتصرف باللى فى إيدينا.. وربك يكرم بغيره.
- سامى: لأ طبعاً.. إنت ناسى إن العيد داخل علينا إحنا كمان.. يعنى نفرح عيال غيرنا.. وننكد على عيالنا؟!
- عم صيام (ضاحكاً): تعجبنى فيك أنويتك النادرة يا سامى.. دكتوراه فى الوطيان يا واد.
- سامى (ساخراً): تلميذك يا صيام بيه.
- عم صيام: اخرس يا واطى.. شوفوا بقى إحنا هنضرب عصفورين بتغريدة واحدة.
- محمد: إيه تغريدة دى؟!
- عم صيام (ضاحكاً): ميزتك إنك مالكش فى شغل الأرض.
- سامى (ضاحكاً): ولا السما وحياتك.
- محمد (بغضب): سامى!
- عم صيام: هنغنى ع الناس بأغنية واحدة «ليه تسيب عيلك يعيط.. ما دام ممكن تقسّط».. شوية الهدوم اللى عندنا دول واللى هنقدر نجمعه من تبرعات المحلات.. هنعمل بيه معرض فى حتة فى الجامع.. ونرفع شعار التقسيط.. نقسط للناس هدوم العيد.. وهناخد منهم فايدة صغيرة أوى.
- محمد: أنا أسمع إن الشغل دا حرام.
- عم صيام: اغسل ودنك.. واضح إنك ما بتسمعش كويس.. كل حاجة دلوقتى بالقسط.. يا راجل دا حتى ياميش رمضان بيتباع بالقسط.. عاوز حاجة أكتر من كده؟!.. إحنا بنريح الناس.. وبنيسر للى ممعهوش سيولة يكسى عياله ع العيد.. ويدفع بعدين.
- محمد: طيب دا أول عصفور.. والعصفور التانى؟!
- سامى (ضاحكاً): الفلوس اللى هتيجى هتدخل على صندوق التبرعات.. وتزود نسبة «العاملين عليها».
- عم صيام: فهمها الواطى.. (متحدثاً إلى رجل يظهر فجأة): صباحك رضا يا أسطى رضا.. اتفضل.
- رضا: صباح الفل يا باشا.
- عم صيام: حسبت حسبتك وعرفت العربية محتاجة إيه؟.. بقول لك إيه أنا عاوز أخلص م الحدوتة دى ع العيد.. ما يرضيكش أعيّد حافى.
- رضا: طبعاً ما يرضينيش.. شوف يا سعادة الباشا.. إحنا محتاجين حاجات بحوالى 3000 جنيه.. وعاوزين 4000 جنيه دوكو وسمكرة.. ودا طبعاً غير المصنعية.. وخلى بالك كل بند من دول تحت العجز والزيادة.
- عم صيام: ليه كل دا يا أسطى.. إنت هتفصل لى عربية جديدة؟!
- رضا: الخبطة بشملت العربية يا باشا.. وخلى بالك أنا عشان أخلص ع العيد هحتاج أشغل صنايعية أكتر.. يعنى هتدفع أكتر.
- عم صيام: يعنى المشوار كله هيتكلف كام تقريباً؟!
- رضا: اعمل حسابك على 12 ل15 ألف.
- عم صيام: يا نهار أسود.. دا كتير أوى يا أسطى رضا.
- رضا: براحتك.. أنا ما ضربتش مفك فيها لحد دلوقتى.. عشان عامل حساب كده.. (وهو يقف): عربيتك ملقحة بره فى مكانها اللى اتخبطت فيه.
- عم صيام (وهو يُجلسه): إنت عارف يا أسطى.. الناس داخل عليها عيد.. والكل محتاج مصاريف قد كده.. بقول لك إيه.. ما ينفعش تقسط لى.
- رضا (مستغرباً): أقسط لك؟!
- عم صيام: أيوه.. فرصة أعيّد بالقسط!