وجدي غنيم ل"مرسي": لماذا لا تطبق حد الحرابة.. حان وقت العقاب وانتهى وقت التهديد

غنيم: وزير الداخلية أول واحد يتشال "اللي قال إنه مش هيرجع ضباط الشرطة الملتحين

أعرب الشيخ وجدي غنيم، عن سعادته من خطاب الرئيس محمد مرسي، للشعب المصري تحت اسم "المصارحة والمكاشفة"، وقال غنيم، كنا ننتظر هذه الشفافية التي تحدث بها الرئيس مرسي، ونتمنى أن يستمر الوضع هكذا قائلاً: "الناس بتحبك".
وتابع غنيم، في فيديو بثه عبر قناته على موقع الفيديوهات "اليوتيوب": "أنت شيلت الجيش ورجعته لمكانه في الدفاع عن الوطن وشيلت طنطاوي وعنان، وكنا ننتظر الخطوة القادمة، فنحن نحتاج للعلاج".
وواصل: "لابد من القرارات الحاسمة، فقد انتهت مرحلة التهديد والوعيد وننتظر العقاب للناس المجرمة، أنت سايب القنوات الفضائية زي ما هي مستمرين في التخريب".
وهاجم غنيم، الإعلام المصري، قائلاً: "أنا لا أحب أن أشاهدهم أو القراءة لهم، اللي عاملين نفسهمم إعلاميين، وهتلاقي السخرية من الخطاب وأنت بتهدد، يا سيادة الرئيس انتهى وقت التهديد وحان وقت التنفيذ والعقاب، مفيش فرصة تانية أو إمهال، أنت هتمد إيدك لمين دول إيدهم ملطخة بالدماء لا ينفع أن تمد إيدك لهم".
وقال "الجيش يقوم بالتأمين والشرطة كذلك ضد مين، ضد اللي هيجوا يوم 30 يونيو ما تمسكوهم وتقبضوا عليهم مش دي دولة، إزاي حد يهدد دولة، وفي بروفات حصلت منها حصار الجوامع وما حدث في المنصورة أيه الدلع ده، ما كنتوا بتمسكونا قبل كده، بتهم التحريض وتكدير الأمن العام وتعطيل مصالح الدولة".
وتابع: "فين الكلام ده مع المجرمين دول سواء إعلاميين أو كتاب أو سياسيين، ولسه بتسمهيم يا سيادة الرئيس معارضة دول مش معارضة، هم بلطجية لازم قرارات حاسمة".
وتعليقا على قرار الرئيس بتشكيل وحدة مكافحة البلطجية، قال "الداخلية همّا اللي عاملين البلطجية، الداخلية هي اللي بتحمي البلطجية وبتدافع عنهم لماذا لا تُفعّل حد الحرابة وفقا لسورة المائدة، ليه وهذا الحد موجود وأنت حافظ القرآن، لماذا لا نفعّل هذا وهو حد الحرابة؟".
وقال "يا فخامة الرئيس لا تظلم مشاعرنا وتمجد في القضاء والداخلية، وأنت يا الريس بتقول "طلعوا براءة"، أنت الرئيس وأنت المسؤول إزاي يطلعوا براءة وعندك وزير العدل، منظومة القضاء أيام حسني مبارك كانت فاسدة، بعض القضاة نحطهم فوق دماغنا رجال في الحق، وشايفين نماذج تانية حاجة تكسف، لسة حد بيناقش إن الرئيس كان في السجن، كان مغيب أصله كان ضباط شرطة ومن أمن الدولة، ناس لسه بتناقش إن الرئيس نجح ولا منجحش".
وقال: "فين وزير العدل وفي لجنة الصلاحية، أنت بتمجد وزارة الداخلية، دا وزير الداخلية أول واحد يتشال، اللي قال إنه مش هيحترم القانون، وذلك لما قال إنه مش هيرجع ضباط الشرطة الملتحين، مينفعش يبقى ده وزير، وفي ناس بتموت في الوقت اللي بتمجد فيه".
وتابع "نفسي توجه رسالة واضحة للقضاء والداخلية والإعلام، وتقول أنا رئيس الجمهورية واللي مش عجبه ألف سلامة المركب اللي تودي، اللي مش عجبه الريس يمشي، قاعدين على قلبي وبتخربوا في البلد وبتاخدوا كمان فلوس، أنت ذكرت بعض أسماء البلطجية ومقولتش مصيرهم أيه، فين الأمن العام والأمن القومي".
وواصل "كنا ننتظر إنشاء محاكم ثورية، الريس السابق قاعد على قضية واحدة، ممكن يجي قاضي ويطلعه وولادة كمان، مينفعش القضاة، دول رجالة حسني مبارك، متتوقعش يكونوا معاك، أنت مستني رجالة حسني مبارك، وختم كلمته "شد حيلك اشتغل جامد شوية زي ما شيلت طنطاوي وعنان ياريت متبصش في الورقة وعايزين التلقائية".