أنا خايف .. بجد خايف ومش بهرتل .. هو ده ممكن يحصل يا جماعة؟! .. خايف على ثورتنا ..على كل حاجة حلوة حصلت .. خايف على فرحتنا .. خايف على دم شهدائنا.. وعلى بلادنا يا رب كل الخوف ده يبقى بسبب إنى مصرى .. يعنى متعودتش أفرح من غير ما أخاف .. بعد تلاتين سنة خوف هى عمرى كله. خايف برضه .. بس ليرجع لغاية إمبارح كنت بتكلم مع نفسى بصوت منخفض وأقول هو ممكن يرجع، يا نهار أسود! بس النهاردة لأول مرة ابتدى اسمع الكلام ده من ناس تانية مش عارف أفكر ولا أشتغل ولا أعمل أى حاجة السيد الرئيس السابق موجود فى مصر .. فى شرم الشيخ .. تحيط به قوات الحرس الجمهورى .. ويعمل معه إلى الآن السيد زكريا عزمى والسيد عمر سليمان ويقدمان له تقارير يومية .. " خبر من مصراوى" يا نهار أسود هو ده معناه أيه؟!! ويعني أيه؟! وإمتي وإزاى كمان؟!!! قريت النهاردة على موقع الكتروني واحد بيتكلم عن الثورة المضادة .. يعنى يا أفاضل إزاى يعرفوا يعملوا ثورة ضد الثورة ويرجعوا النظام القديم. يا نهار ..... حاجات كتير مخوفانى 1 الفيس بوك فجأة امتلأ بناس ضد الثورة وبقيت اسمع كلام غريب عن البلد إللى رايحة فى داهية وجروبات غريبة زى " أنا آسف يا ريس" أو جروب سموه " وائل غنيم ضيعك يا مصر" أيه الكلام ده .. من إمتى .. وائل غنيم بقى ماسونى .. وناس مش عاجبها شكله وهو بياكل أو وهو بيرقص بعد قرار التخلي بتاع الرئيس السابق .. هو أيه العيب في ده .. وتى شيرتات أيه وعلامات أيه وحظاظات أيه إللى الناس مابقتش فاضية غير ليهم .. دلوقتى أدمن " كلنا خالد سعيد" بقى هو إللى ضيع مصر .. الكلام ده من إللى بيعمله على الفيس بوك؟ .. سؤال ملوش عندى غير إجابة واحدة.. في ناس لسه بتلعب وفى خطط بتتحضر لينا. 2 النغمة إللى شغالة اليومين دول بتاعة عفا الله عما سلف، ويا جماعة افتكروا محاسن الراجل وللأسف إبتديت أسمع الكلام ده من ناس زمايلى فى الشغل .. محاسن .. هو الراجل ده طلعلوا محاسن وإحنا مش عارفين .. ده على أساس إن الواحد كان مسافر ورجع ولا أية بالظبط؟؟ 3 -- الإشاعات التي امتلأت بها الدنيا فجأة عن صحة الرئيس السابق وإنه بيحتضر ومقالات بتتكتب ومبارك الإنسان يتألم والفارس وقع ودى مش أخلاق المصريين .. هو انتوا لسة فاكرين الأخلاق دلوقتى .. كانت فين الأخلاق دي يا جدعان فى التلاتين سنة إللى فاتوا مش ممكن نكون في غيبوبة للدرجة دى.. 4 - الدعوة إلى مسيرات تلبس أسود وتخرج بعد صلاة الجمعة من مسجد مصطفى محمود تأييدا للرئيس السابق وعرفانا بجميله .. طيب المرة إللى فاتت طلعوا بالجمال والحمير والخيول والسنج والمطاوى .. المرة دى حيطلعوا بأيه بأة .. لا وكمان بعد صلاة الجمعة التى سيحتفل بها الثوار فى ميدان التحرير برحيل الطاغية .. أيه المقصود من ده ؟؟ فى الوقت الذى سيمتلأ به ميدان التحرير بالملايين التى تحتفل برحيل مبارك تخرج مسيرات أخرى من مصطفى محمود تعبيرا عن التعاطف مع الرجل .. ما هو السيناريو المتوقع حدوثه مرة أخري ؟!! 5 - أيه إللى بيحصل فى البلد، وأيه كم الاعتصامات والوقفات الاحتجاجية غير المبررة التى تمتلأ بها البلد هذه الأيام خاصة مظاهرات الشرطة التي خرجوا فيها بنظاراتهم الشمسية!! هل المقصود هو تركيع البلد حتي يتمنى الناس رجوع أيام الرئيس السابق؟!! 6 - الذي دفع مليونا ليخرج البلطجية في يوم الأربعاء الدامي يدفع مليارا ليعود النظام الذي كان يحميه من الحساب .. ويؤمن له حياته وثروته. 7 جمال مبارك لا يزال إلى الآن عضوا في الهيئة العليا للحزب الوطني ولم يستقل (مثلما لا يزال مبارك الأب إلى الآن هو رئيس الحزب الوطني) .. يعنى ممكن يترشح في الانتخابات الرئاسية المقبلة .. هتقولوا ما يدخل .. وإحنا مش هننتخبه .. طيب مين فينا يضمن في بلد نصف أهلها أميين لا يقرأون ولا يكتبون، ويعيشون تحت خط الفقر أن لا يأتى جمال مبارك بفلوس الأصدقاء أو بفلوسه هو شخصيا.. ( مليار من المليارات مش هيفرق معاه بس ممكن يدفع أكتر من نصف شعب مصر ينتخبه بالثلث( 7 - السيد أنس الفقى قال فى التحقيقات أن التليفزيون كان ينقل صورا لميدان التحرير عن طريق كاميرات الأمن لرفض الثوار دخول كاميرات التليفزيون المصري إلى داخل الميدان .. إذاً جهاز أمن الدولة المصري كان يصور ويتابع كل ما يجري داخل ميدان التحرير .. وبالطبع كل هذه التسجيلات والصور لازالت وزارة الداخلية تحتفظ بها حتى الآن .. أنا خايف علي الثوار ومش مآمن لأحد.. أو أي جهة .. وإنتوا فاهمين. أنا لا أأمن مكرهم.. دي كل الحكاية .. ولا أملك إلا أن أدعوا الله عز وجل الكريم الرحيم أن لا تضيع دماء الشهداء سدى. وأن يحمى ثورتنا من كل فاسد وكل حرامى وكل من يريد أن يمكر بها وبنا.
