محمد حسن يكتب :الثورة كما يجب أن تكون...

محمد حسن


ما تيجى تستثمر عندنا




- بقولك إيه: ما تيجى تستثمر عندنا
- لا يا عم هو أنا مستغنى عن فلوسى
- ليه بس كده تفاءلوا بالخير تجدوه
- أيوه بس ربنا قال إعقلها و توكل. يعنى لازم أفكر و أحسبها قبل ما أتخذ قرار
- يا عم متقلقش ده إحنا قامت عندنا ثوره سلميه و البلد حالها هينصلح و هتبقى فل بأمر الله
- أيوه بس إنتوا عندكم مشاكل و أنا خايف.
- والنبى يا أخى ما تقلق ده إحنا عندنا نهضة هتبدأ و البلد إقتصادها قوى جداً
- طيب أمال ليه عمالين تاخدوا قروض من هنا و هناك
- أصل الإقتصاد منهار و محتاجين مستثمرين علشان نشغل الناس
- بس أنا سامع إن الأمن عندكوا مش مستقر
- لا دى إشاعات مغرضه بيروجها أعداء الثوره
- غريبه! أمال سمعنا إن فيه ناس حاصرت المحكمة الدستورية و محدش منعهم
- دول الشعب كانوا بيعبروا عن رأيتهم و إحنا بنحترم حرية الرأى
- ممتاز.. طيب إيه اللى حصل عند الإتحادية ده
- دول جماعه بلطجية كانوا بيتظاهروا ضد الرئيس و الجماعه اللى بتحكم و طلع الشعب ضربهم و فهمهم معنى الديموقراطية.
- معقول!! هو عندكم الشعب هو اللى بيتصدى للبلطجية؟!! أمال الداخليه بتعمل إيه؟
- الداخلية بتحمى المؤسسات و الهيئات. و بعدين مينفعش الداخلية تضرب فى الشعب.
- طيب ليه الداخلية محاولتش تمنع التظاهر عند دار القضاء العالى و المحكمة الدستورية و مدينة الإنتاج الإعلامى؟
- ما أنا قلتلك دول كانوا الشعب بيعبروا عن رأيهم و مينفعش الداخلية تتعرضلهم. إحنا بنحترم حرية التعبير
- أمال مين اللى كان بيضرب الشعب اللى تظاهر عند مكتب الإرشاد
- الداخلية طبعاً... مش قلتلك إن دور الداخلية إنها تأمن المؤسسات و الهيئات
- هو مبنى الإرشاد ده مبنى حكومى؟!!!!
- لا طبعاً بس ده مكتب الإرشاد بتاع الأهل و العشيره. و مينفعش حد يقربله
- بس أنا سمعت إن كان فيه حكم قضائى بحل الجماعه اللى بتتبع مكتي الإرشاد ده
- آه فعلاً بس طبعاً ده القضاء الفاسد هو اللى كان أصدر الحكم ده
- إيه ده.. هو القضاء كمان عندكم فاسد. أمال مين اللى هيحفظلى حقى كمستثمر لو حصلت لى مشكله؟
- لا يا راجل إحنا القضاء عندنا نزيه و شامخ.
- إنت هتحيرنى معاك ليه.. طيب لما هو قضاء نزيه أمال الشعب اللى بتقول عليه كان بيتظاهر ليه عند القضاء العالى؟؟!!!!!
- أبداً.. كانوا بيطالبوا بتطهير القضاء.....
- يطهروه من إيه.. إنت مش بتقول إن القضاء عندكم نزيه و شامخ؟
- إحم... آه والله شامخ جداً و مستقل كمان
- ممتاز.. قضاء شامخ و مستقل. طيب إيه حكاية الإعلان الدستورى ده
- ده صدر لتحقيق مطالب الثوره
- أمال الناس تظاهرت ضده ليه؟
- دول أعداء الثوره اللى تظاهروا إحتجاجاً على تعيين النائب العام الجديد بالإكراه و تحصين قرارات الرئيس من الطعن عليها أمام القضاء.
- بس فيه ناس من اللى تظاهروا ضد الإعلان الدستورى كانوا أصلاً من ضمن المشاركين فى مظاهرات يناير 2011 زى بعض أعضاء جبهة الإنقاذ.
- قصدك جبهة الخراب
- خراب؟!!! ليه هم بيخربوا فى البلد؟ بيخربوها إزاى؟
- بيطالبوا بلجنة تأسيسية تمثل كل أطياف المجتمع و كمان دستور محترم.
- طيب و جبهة الضمير؟
- دول بيمثلوا تيارات الشعب و الأحزاب و القوى السياسية
- سمعت إن فيهم قضاه. إنتوا عندكم مسموح للقضاه المشاركه فى السياسه؟
- آه طالما القاضى من الشعب يبقى من حقه يشارك فى السياسه
- بس أنا سمعت إن فيه ناس بتهاجم المستشار الزند علشان بيعترض على الإعلان الدستورى و قانون السلطه القضائيه و بيدافع عن إستقلالية القضاء؟
- آه طبعاً لازم يقف عند حده و ميشاركش فى السياسه لأن إحنا عندنا مبدأ الفصل بين السلطات.
- طيب لما عندكم الفصل بين السلطات. ليه تم تعيين النائب العام الجديد بدون ترشيح من المجلس الأعلى للقضاء وفقاً للقانون.
- يا سيدى ما أنا قلتلك إنه مطلب ثورى. أنا مش قلتلك إن قامت عندنا ثوره
- والله ما فاهم طيب ليه بتحبسوا الثوار؟!!!
- لأنهم بلطجيه.
- طيب ما داموا بلطجية ليه النيابه بتفرج عنهم؟
- بيقولوا إن مفيش أدله عليهم و كمان اللى سلمهم الشعب مش الشرطه... تلاكيك يعنى
- طيب لما الشعب هو اللى قبض عليهم. أمال الداخليه بتعمل إيه؟!!!
- إنت غبى ليه؟.... ما قلتلك بتأمن المؤسسات. و كمان كلام فى سرك بنعملها إعادة هيكله
- طيب ليه الناس بتعترض على الحكومه؟
- لا أبداً دول أعداء الثوره بس هم اللى بيعترضوا على الحكومه مع إن وزير التموين بيأكلهم عيش..
- طيب و باقى الوزارات؟
- متخنقنيش.. ما قلتلك وزير التموين شغال بإيده و سنانه
- بص يا عم واضح إن عندكم مشاكل كتير و أنا خايف على فلوسى
- يا عم سيبها على الله... و لا إنت مش مؤمن؟
- يا عم إنت هتكفرنى؟!! مؤمن و الحمد لله
- طيب يا عم...... و آهو بالمره تاخذ ثواب المشاركه فى المشروع الإسلامى.
- عباره عن إيه المشروع الإسلامى ده؟
- إبقى تعالالى المكتب و أنا آوريهولك............

الخلاصة يا ساده أنه لن ينصلح الوضع الإقتصادى الا بالعمل الجاد و جلب إستثمارات خارجية. و المنطق يقول أن المستثمرين لن يغامروا بأموالهم فى ظل عدم الاستقرارالامنى. و لن يكون هناك إستقرار أمنى الا عندما يتسم النظام الحاكم بالصراحه و الوضوح و إحترام المعارضه و القانون.