عيد الفطر على الأبواب وفاضلة أقل من أسبوعين.. إجازة 3 أيام من الثلاثاء للخميس أو من الإثنين للخميس، ولو أخدت الأحد والإثنين "ممكن تحتاج تاخد الثلاثاء كمان" هيبقوا 9 أيام إجازة.. طبعا أغلب الناس بتطلع الساحل أو بتطلع أي منطقة خارج القاهرة والمدن الكبيرة للاستمتاع وأغلبها بيبقى زحمة.
ليه الزحمة؟.. ليه متطلعش بره مصر وأرض الله واسعة؟، طبعا مفيش وقت تطلع فيزا، بالتالي هستعرض بعض المدن اللي مش محتاجة فيزا من المصريين وبعض التفاصيل عن الرحلات ليها، باعتبار إن الرحلة في الفترة من يوم 1 يوليو إلى 9 يوليو.
هنبدأ بماليزيا.. جنة آسيا، تقدر تعيش فيها 3 أشهر من غير فيزا.. التذكرة لكوالالامبور من القاهرة رايح جاي في الفترة دي ثمنها 5900 هتوصل السبت "وفي رحلات لو عايز توصل الجمعة" على الطيران التركي وهتمشي السبت.. ولو هتاخدها من برج العرب هتبقى أوفر ألف جنيه.
وتكلفة الأوتيل في الفترة دي بتبدأ من 620 للفردين في أوضة مزدوجة في أوتيل اسمه Ranting Guesthouse للسبع ليالي، وطبعًا ممكن تزود شوية وتاخد حاجة أنظف، ممكن تاخد حد معاك وتكلفة الرحلة والإقامة أسبوع هتكلف الواحد بداية من 6300 جنيه.
لو بتفكر تسافر بلد عربي، وتعيش أجواء العيد ممكن تروح الأردن.. تذكرة رايح جاي على مصر للطيران ثمنها 3400 جنيه توصل الجمعة الصبح، وتمشي الخميس بالليل.. وتقعد في أوضة مزدوجة أنت وصاحبك تبتدي من 1300 جنيه لمدة 8 ليالي للفردين في Mansour Hotel.. يعني تكلفة الرحلة كلها 4100 جنيه 8 ليالي.. ومتنساش تزور البتراء.
في بلاد عربية تانية زي لبنان مثلا، في الوقت ده التذكرة تبدأ من 2300 جنيه على طيران ميدل إيست وطبعا ممكن تقعد إنت وصاحبك في غرفة مزدوجة السبع ليالي ابتداء من 2600 جنيه في تالال أوتيل.. يعني الرحلة كلها للفرد أسبوع في لبنان ب3600 جنيه في العيد.
المالديف.. هدوء وجمال المالديف، بندخلها من غير فيزا برضه.. صحيح التذاكر غالية شوية بس تستاهل.. هتسافر على الطيران التركي الخميس بالليل وتوصل الجمعة الصبح، وترجع الأحد الصبح بدري التذكرة ب7725 جنيها، هتقضي 8 أيام هناك الغرفة المزدوجة بتبتدي من 2000 جنيه للفردين في Mathiveri inn يعني رحلة 8 أيام في الجنة تكلفة الفرد نحو 8700 جنيه وترجع حاجة تانية!.
في بلد مشهورة أوي بجبالها وطبيعتها الخلابة وموجودة في أوروبا، ومش محتاجة فيزا وهي جورجيا.. التذكرة من القاهرة ل"تيبليسي" عاصمة جورجيا بنحو 5800 جنيه على الطيران التركي من القاهرة هتوصل الجمعة بالليل، وترجع السبت الصبح، البلد دي رخيصة جدا وهتستمتع فيها بفلوس قليلة.. العملة اسمها لاري وتساوي 4.17 جنيه مصري.. هتاخد أوضة مزدوجة ب1102 للفردين 8 ليالي، ويعني تكلفة الرحلة 7000 جنيه.
وفي بلاد تانية كتير مش محتاجة فيزا، وبلاد كتيرة في إفريقيا هتكلم عنها في مقالي اللي جاي وعن أسعارها.. علشان فعلا تبقى إجازة العيد سعيدة ومختلفة.
طبعا أسعار التذاكر ممكن تختلف مع اختلاف وقت الحجز، وكمان أنا بتكلم عن أرخص الأوتيلات فلو بتحب الرفاهية ممكن تختار حاجة أعلى شوية.
أتمنى ليكم رحلة سريعة جميلة موفرة وموفقة ترضي جميع الأذواق.
لمعلومات أكثر عن رحلاتي وسفري زور صفحتي