كل سنة وأنتم طيبين، اللي جرب يقضي رمضان بره مصر عارف إن رمضان في مصر ليه طعم مختلف رغم الحر.. لدرجة إنك تحس إنك سافرت بلد تانية!، رمضان في مصر يعني اللمة على الفطار والعزومات، يعني متبقاش قادر تقوم من على السفرة من كتر الأكل، يعني أنواع الكنافة الجديدة والمسابقة غير المعلنة بين أماكن بيع الحلويات على التجديد والابتكار.. كل سنة ونلاقي أشكال الكنافة بالنوتيلا والمانجة وال"ريد فيلفت".
رمضان في مصر يعني الإبداع في إنتاج الإعلانات والمناقشة المستمرة إذا كان الإعلان الفلاني ولا الإعلان التاني أحسن، وشركات الاتصالات كأننا بنتفرج على ماتش كورة. يعني الشكوى من الإنتاج الكثيف للمسلسلات وتحليل عميق لأكبر عدد منها، وآخد رأي الناس في اختيار المسلسلات اللي هتتابع، وبعدها الدفاع المستميت إن دي أحسن مسلسلات أصل مش معقول بعد كل التعب ده يطلع وحش!، وفي النهاية الشكوى من إن نهاية المسلسل مكانتش قد كده، والحلقة الأخيرة مكانتش بالإثارة المطلوبة، وإن المسلسل طلع وحش فعلا!.
رمضان في مصر يعني السحور في خان الخليلي والحسين وتروح شارع المعز وتقعد على أي قهوة هناك.. رمضان في مصر ليه طعم تاني للإخوة المسيحيين مش أقل فرحة، أوقات عمل أقل ومصايف فاضيه، وعروض أوتيلات وسفر مغرية، وكمان خيم وأكلات جديدة، خير مثال للوحدة الوطنية وسعادة لجميع الأطراف.
عموما الناس الرايقة هي اللي بتعرف تضاعف استمتاعهم في رمضان بالسفر جوه مصر، ولو بصيت للعروض ولأسعار الأوتيلات فبيبقى أرخص وقت في السنة، وكمان بتبقى فاضية ورايقة.. ممكن تنزل المياه قبل الفطار على طول وكمان بيبقى فيه مساجد فيها صلاة تراويح.. وتكون بعيدة عن الزحمة والحر.
لو عايز هدوء وطبيعة ومكان هادئ جدًا في نفس الوقت من أحلى أماكن الغطس في العالم اطلع على «دهب».. وبالليل ممكن تسهر في أي كامب زي "كامب بندق" في الصحرا.. ممكن تصلي هناك وممكن تتعبد براحتك وتتسحر وتشرب الشاي البدوي.
كمان في أوتيلات كتير على البحر زي أوتيل غزالة، وأسعارها قليلة جدًا وفي أوتيلات عاملة عروض في رمضان زي دهب بلازا، سعر 5 ليالي للفردين في أوضة مزدوجة بالفطار 887 جنيه.. تقدروا تحجزوا من هنا http://www.booking.com
وطبعًا إسكندرية وأحلى جو وأحلى أكل وأجمل بحر سافر الخميس، وارجع يوم الأحد.. ممكن تقعد فى شيراتون المنتزه ال3 ليالي لفردين 1693 جنيها في أوض شايفة البحر بانوراما أو رمسيس أوتيل ب600 جنيه 3 ليالي لفردين، وفيه كمان أسعار أقل من كده بكتير، أو لو بتفكر في شقة، ولو هتسافروا عدد كبير ففي شقق بأسعار كويسة في الوقت ده احجز من هنا http://www.booking.com
مبتفكروش في الغردقه؟؟ ممكن تغطسوا فيها ومتنسوش تاكلوا ستيك لحم الجمل في موبي ديك وتدعولي.. في شقق تبع الماريوت سعر الشقة الاستوديو خمس ايام من 15-6 ل20-6 ب1286 جنيها، وفي حاجات أرخص من كدة بكتير بس اعقدوا النية احجزوا من هنا http://www.booking.com
أما عن الجونة، 4 ساعات سواقة بالعربية بتلاقوا نفسكم في مكان من أرقى الأماكن اللي ممكن تزوروها.. هتقعدوا في ترتلز مارينا الجونة، وسط كل حاجة ب1500 ال5 ليالي لفردين.. وبرضه في حاجات أرخص من كدة بكتير في أماكن مختلفة.
عن تجربة شخص مش قاعد في مصر في رمضان، استمتعوا بكل لحظة فيه، قربوا من ربنا وادعوا لإنه شهر فرص الرحمة والغفران.
أتمنى لكم حياة سعيدة زاخرة ورمضان كريم.. لمعلومات أكثر عن رحلاتي وسفري زور صفحتي