حسام خضر: جبهة الإنقاذ لا تمثلني.. والإخوان والسلفيون سرقوا ثورة الشباب

أكد الشاب السكندري حسام خضر، أنه ليس ضد الرئيس مرسي ولا حزب الحرية والعدالة، ولكنه يريد إنجازًا على أرض الواقع.
وقال خضر، في حيدثه لبرنامج "آخر النهار" على فضائية "النهار"، "يا سيادة الرئيس أنا مش ضدك. أنا عاوز أشوف خير في البلد. معنديش مشكلة مين يقعد على الكرسي. أنا مش شايف لا حرية ولا عدالة. يا ريس مش قلت لما اغلط قوموني. احنا مطلبناش حاجة غلط. الإعلان الدستوري قلنا لا للإعلان. نزلت ناس قدامنا قالت نعم لتطبيق الشريعة. ليه تخلي حد ينزل قدامي يضربني وأنا بقول لا للإعلان الدستوري. يا ريس احنا وقفنا مع مرشحي الإخوان في انتخابات 2005. ليه بتعملوا فينا كده دلوقت؟".
وأضاف "بيتهمونا إننا حاصرنا الشيخ المحلاوي. انتو لحد النهاردة مجبتوش حق الشهداء ولا حقوق الشباب اللي ماتوا في بورسعيد. جيتوا النهاردة وبتهجموني، أنا يا غلبان أنا عملت إيه؟".
واتهم خضر، الإخوان والسلفيين بأنهم سرقوا الثورة من الشباب الفعلي لها، وتابع "مش الإخوان طلعوا قبل 25 يناير وقالوا احنا مش مع الثورة، والسلفيين قالوا الخروج على الحاكم حرام، ليه جايين يقولوا إنهم اللي حموا الثورة، انتوا سرقتوا الثورة.
وأنكر خضر، صلته بجبهة الإنقاذ بقوله "أنا الجبهة مبتمثلنيش والبرادعي مبيمثلنيش لأنه عاش طول عمره بره، ودور حمدين صباحي مهمش ومش باين، وعمرو موسى للأسف محسوب على نظام سابق ويا سيد يا بدوي حزبك مفكك من جواه، أنا تابع لثورة شباب وناس بتتكلم باسم مصر، ليه معملتش مشروع اقتصادي ناجح يا ريس ولا خطة شفتها في ستة شهور".
وأكد خضر أن "مصر بتضيع والرئيس يطلع يقول من يتحدث عن الإفلاس هم المفلسون".