بالصور| غضب رواد مواقع التواصل بسبب حادث زهراء المعادي: "ده طريق شؤم"

أثار وقوع حادث طريق زهراء المعادي، غضب واستياء رواد مواقع التواصل الاجتماعي، والذي أسفر عن مقتل 3 شباب وإصابة آخر، لا يتعدى عمر أكبرهم 16 عاما.
وكان الحادث وقع في الساعات الأولى من صباح اليوم، بشارع الخمسين في حي زهراء المعادي، حيث دهست سيارة ماركة "كيا" حمراء اللون، ل4 شباب، توفي ثلاثة منهم في الحال، بينما خرج الرابع في حالة حرجة، حيث يتلقى العلاج اللازم في المستشفى.
وقال شاهد عيان يسكن أمام مكان وقوع الحادث بشارع الخمسين: "حادث رهيب في شارع الخمسين ربنا يرحم اللي ماتوا، عربية لانسر طلعت فوق الرصيف وعادي الناس نزلت عشان تساعد صاحب العربية، أنا خرجت البلكونة على صوت الحادثة".
وتابع الشاهد قائلا: "عربية هاتش باك حمراء ماشية بسرعة رهيبة سايقاها واحدة داست على ثلاثة شباب من اللي جايين يساعدوا وخبطت عربية كورولا وخليتها تخبط اتنين تانيين، أنا شفت الحادثة من فوق بس التفاصيل بتاعت الاتنين والتلاتة دي سمعتها لما نزلت، أربعة ماتوا والخامس الإسعاف خدته وكانت حالته حرجة".
وقالت إحدى سكان المعادي، وتُدعى هبة، من خلال حسابها على موقع التواصل الاجتماعي "فيس بوك": "أرجو أن رئيس حي المعادي يراجع نفسه بعد الكارثة دي ويقوم بعمل مطبات صناعية"، وأضافت مروة: "ده مش شارع سريع عشان الناس تمشي بسرعة عالية كده، الله يرحم لما كان الشارع مكسر ومدغدغ كان الناس بتمشي فيه زي.. خوفا على العربية".
وقالت أميرة بدر: "ده طريق شؤم، وهو بتعمل وبيوسعوا فيه، عيل ابن 16 سته بيعمل سباق مع صاحبه، وكانت النتيجة أنه صدم ابني وموِّته، حسبي الله ونعم الوكيل في كل اللي بيجري ولا يهمه الناس".
فيما قال شاهد عيان يدعى "طارق محمد": "الست اللي كانت سايقة العربية الريو ملهاش ذنب في اللي حصل بس كل واحد مشافش حاجة قال هي الغلطانة، أنا شفت الموضوع من أول حادثة والسبب في اللي ماتوا كان واحد بيعدي الشارع عشان يشوف اللي حصل من غير ما يبص فالست لقت واحد بيعدي الشارع قدامها بغباء ففدته وهي ماشية بسرعة فمعرفتش تسيطر على العربة، وطارت الناحية التانية وحصل اللي حصل، أقسم بالله هو ده اللي حصل والست دي هتروح في داهية بسبب غباء ناس قالت إن هي الغلطانة من غير ما يشوفوا اللي حصل".