دعوة مجانية للتصوير مع الأم فى «الأزهر بارك»: الحب فى صورة

رغبته فى أن تستعيد الأسرة المصرية ترابطها الذى كان قوياً قبل ظهور «السوشيال ميديا»، جعلت «جون مجدى» يطلق دعوة لمن يرغب فى التصوير مجاناً مع مَن يحبه مِن أفراد عائلته بمناسبة عيد الأم. «جون»، 21 عاماً، احترف مهنة التصوير مبكراً خلال دراسته فى الجامعة، مؤكداً أن احتفالات عيد الأم تشهد الكثير من المواقف الإنسانية غير المتوقعة التى رآها بنفسه: «أعرف ناس بيتحرجوا يشتروا هدايا لأمهاتهم فى عيد الأم، فأعتقد أن صورة حلوة مع ست الحبايب هتكون أحلى هدية».
الدعوة التى أعلن «جون» أنها ستقام فى حديقة «الأزهر» هى محاولة لمساعدة من لا يستطيع إحضار هدية لعائلته بسبب الظروف المادية: «هى مش مقتصرة على الأم بس، ممكن الأب أو الأخوات، مبدأ العيلة فى حد ذاته ده مهم، والصورة هنا وسيلة للتعبير عن الحب».
ردود الفعل التى تلقاها «جون» على دعوته كان بعضها مشجعاً، والبعض الآخر غير مؤيد لها: «ما ركزتش قوى فى الناس اللى رافضة الدعوة، بس الفكرة كلها إنه الناس اعتادت على فكرة التصوير مع الناس اللى بيحبوهم زى واحد وخطيبته، اتنين مرتبطين، مجموعة أصحاب، لكن إنه حد يختار يوم مخصوص علشان يتصور مع والدته أو مع حد من عيلته دى ما بقتش منتشرة كتير، أو مش موجودة أصلاً، مع أن والدته دى هى اللى تعبت فيه وربته لغاية ما كبر».
يصف «جون» ما فعله بمحاولة لرد الاعتبار أيضاً للأسرة، فبعد ظهور وسائل التواصل الاجتماعى صار كل فرد فى العائلة مقتصراً على عالمه الافتراضى: «ممكن الصورة اللى باخدها ترجع العلاقة بين أب وابنه، أو أم وبنتها، بعد ما الأب والأم زهقوا من كتر ما ولادهم بعاد عنهم بسبب النت والموبايل لكن عمرهم ما بيشتكوا ولا بيقولوا لولادهم».