مع هاجر ناجي.. خلي سعادتك في إيدك!

استطاعت بموهبتها الرائعة أن تؤرخ حياة جيل كامل بكل تفاصيله من خلال رسومات صغيرة على ميداليات وهدفها خلى سعادتك فى إيدك..هاجر ناجى وقصتها أبطال السطور القادمة.
عنها تعرف نفسها هاجر وتقول أنا خريجة كلية تجارة تخصص نظم ومعلومات وبرمجة، بس كان نفسى أدخل فنون جميلة ولكنه النصيب أولا وأخيرا، ولكن لم أستسلم للأمر الواقع ومن أول سنة فى الكلية بدأت أدرس مع نفسى جرافيك ديزاين وعملت ويب سايت واشتغلت جرافيك ديزاينر فترة الكلية.. وفى آخر سنة قررت أعمل مشروع خاص بيا والمشروع كان كاريزما آرت.
أساسه بيعتمد على النوستالجيا والسعادة اللى بتيجى من حبنا لذكرياتنا،
ممثلين وإفيهات أفلام، ألعاب ومجلات كتب ميكى والسلم والتعبان والشمعدان وكرونا، وحاجات كتيير أوى بتضم كل ذكرياتنا خلال الزمن الجميل ولحد التسعينيات من قبل ما هوجة الناستولجيا دى تنتشر كده. والحاجات دى كلها بعملها مصغرات بالصلصال الحرارى.. زى التشكيل والنحت كده.
وتكمل هاجر اكشتفت أنى بجانب كاريزما أرت أنا بحب جدا كل الحرف اليدوية، الموضوع مش مقتصر على ميداليات وإكسسوارات بس، بس بحب أعمل إعادة تصنيع لحاجات كتير عندى.. أعمل حاجات بإيدى، واكشتفت أنى بحب التصوير بوجه عام، وفى أوقات فراغى بحب أعمل مشاريع تصوير صغيرة بأفكار مختلفة عشان أقضى على الروتين والملل، ودايما أفضل أحب اللى بعمله.. ومزهقش منه لما يتكرر.
أما عن فكرة الميداليات فتقول هاجر: الميداليات فكرتها جاتلى بسبب السعادة.
إزاى نقدر نشيل السعادة معانا فى كل مكان.. ومن هنا بدأت فكرة الميداليات والأشكال المصغرة اللى فيها ذكريات، اللى فيها الحاجات اللى بنحبها وغيره
وعن أهم الحاجات اللى عملتها ميداليات تقول هاجر: أنا تقريبا عملت كل حاجة ميداليات.. يمكن أكتر حاجة لما نزلت عملت سيط جامد أوى هى فكره ميداليات الكتب، ومجلات ميكى وفلاش وغيره.
الشباب فى العموم بيحبوا الميداليات اللى بتعبر عن شخصيتهم والحاجات اللى بيحبوها موجودة كلها فى ميدالية واحدهة، أما عن مشروعها الخاص بمزج صور الفنانين العرب مع الأجانب تشرح هاجر فكرة الموضوع وتقول
مشروع الصور كان بسبب هاشتاج مشهور على إنستجرام.. وفكرته بتكون أن مثلا انت جبت صورة فنان وبتكمل جسمك عليه وأنت ماسك الصوره مكان وشك.
فأنا حاولت أعملها بشكل مختلف شوية وتكون نفس الوش مقسوم نصين لاتنين فنانين.. اللى ف الغالب مش شبه بعض شكلا، لكن الكاريزما بتكون واحدة ف بتلاقى الشبه بقى واضح بشكل ما، ممكن يفاجئ أى حد.
الخدعة والميزة فى الموضوع إنه من غير استخدام أى برامج لتعديل الصور، الموضوع مقتصر على شاشة موبايل وشاشة لاب توب.
أما عن آخر مشروعتها وهى فكرة تزيين وتشكيل الأكل ليصبح ماركات مواقع التواصل الاجتماعى تقول هاجر: فكرة الأكل هى بسبب لعب السوشيال ميديا دور كبير فى حياتنا حاليا.. وأصبح الناس ممكن تنسى حتى الأكل قدامهم.