لا تنسى الفنان هشام عبدالحميد راح قناة "الشرق"، وقال: "أنا مش إخوان ومش ها أسمح إن حد يشتم مصر ولا أنا ها أشتم مصر"، والحقيقة إننا مكبرين الموضوع أوي.. خلاص هشام راح تركيا وهيعمل برنامج في القناة الإخوانية.. طب وده عيب ولا حرام !.. أقولك أنا.. هشام مش عاجبه الحكم في مصر.. وماله.. ده ربنا مش عليه إجماع.. طب هشام بيدعم الإخوان.. وماله ما أنت عندك مئات الفنانين والنجوم بيدعموا النظام ومراحوش تركيا.. يا دوب محمد شومان وهشام عبدالله ووجدي العربي وهشام.. سيبهم وريحوا دماغكم ودماغنا من الصداع.
كده أوفر.. يعني اللي هيختلف معاك في الرأي تقول له: "إنت داعشي قاتل.. ويداك ملطختان بالدماء".. ارحمونا.. واللي عايز يروح يروح، وعشان جبنا سيرة اللي يروح.. أدي يا سيدي "شيرين" مبتروحش أهه ورجعت تغني.. بعدما طلعت تسجيلات صوتية تقول اعتزلت.. وتسجيل تاني تقول اعتزلت ليه.. وتسجيل ثالث لبنتها تقول: "مامي بتقولكم لوكلوك".. وتسجيل رابع تقول فيه: "أنا رجعت عشان جمهوري".. الفنان الصح يا شيرين ميعتزلش.. ويكتم آلمه وحزنه وحبه وهواه ومشاكله.. ويطلع.. غير كده يا ست الزمي دارك.. ميصحش كده.. وبلاش تحلمي تاني بالعنب اللي "بينزل" عسل أبيض.. ده مش حلو اليومين دول.. اللي بيسأل عن الممثلة ميرهان حسين.. فهي قالت في تحقيقات النيابة اللي نشرتها "الوطن" النهاردة كلام حقيقي "خطير جداً".. وقالت إن الضابط "إيهاب بحر" مسكها من مكان حساس جدا وقالها: "هو ده" طب أنا هاوريكي.. وقالت كمان.. ضربني ب"الشلوت" والأقلام وعورني في صباعي.. وأنا آه شتمت وخبطته غصب عني.
طب والضابط سكت.. قال: "ولا هتكت عرضها ولا لمستها.. هي ضربتني بالقلم وشتمنا بعض وقالت هخليكم تبوسوا الجزم يا.. يا.. وهاوريكم وضربتني بالقلم".. ولإننا شفنا جزء من الفيديو ومشفناش الفيديو كامل.. فكل الكلام اللي قالته وارد حدوثه.. ووارد تلفيقه.. والكلام اللي قاله الضابط وارد حدوثه ووارد تلفيقه.. والنتيجة.. هي هتروح محكمة الجنح.. والضباط الاتنين هيروحوا الجنايات. ولسه مع أهل "الفن".. واضح كده إن المثلة زينة "بتهرج".. إمبارح أقامت دعوى تطلع فيها الخلع من أحمد عز.. وتقول لي إزاي تخلعه وهما متجوزوش.. أقولك يا سيدي.. طالما نسب الطفلين تم.. فكده من حقها "تخلعه"، ده القانون اللي بيقول كده مش أنا.. بس إمبارح زينة قالت في دعوى الخلع: "وباتنازل عن حقوقي المادية والشرعية".. والنهاردة أقامت دعوى نفقة ل"عزالدين وزين الدين".. ما ترسي لك ع قارة يا ست "زينة".. عايزة حقوق ولا مش عايزة.. وأنت يا أحمد.. معملتش دي إن أيه ليه.. لو إنت واثق..ها. ونسيب أهل الفن ونروح ل "أهل الجزم".. النهاردة كمال احمد النائب اللي "لسع" توفيق عكاشة بالجزمة على رأسه بيتحقق معاه.. واحتمال يتمنع من حضور كام جلسة.. طب واللي بيسأل عن "عكاشة" أصلا.. أقولك خلاص.. مش من حقه يرشح نفسه في الانتخابات اللي هتتعمل في دائرته المقرر لها أبريل المقبل.. وممكن يترشح عادي في الانتخابات اللي بعدها.. يعني "عكاشة" بقى عاطل.. مفجر 30 يونيو و40 أيلول و17 شوال قعد جنب الحجة في البيت. وعشان جبنا سيرة البرلمان.. النهاردة النائبة هبة هجرس قالت لرئيس البرلمان: "والنبي يا ريس عايزين نعاقب الناس اللي بتحلف بالطلاق واللي بتقول ألفاظ نابية".. وطبعا مفيش حد بيحلف بالطلاق غير مرتضى منصور.. وفاكرين لما حلف بالطلاق في أول جلسة أنه ما يقول القسم.. وهب بعد شوية قال القسم.. والطلاق "بخ".. وبمناسبة مرتضى بفكرك بهاشتاج #بلوك_مرتضى.. متنساش، وعشان كله ميبقاش.. ضرب ضرب ضرب، قول: "مصر يا أمّة يا سفينة مهما كان البحر عاتي فلاحينيك ملاحينيك يزعقوا للريح يواتي اللي ع الدفة صنايعي واللي ع المجداف زناتي واللي فوق الصاري كاتب كل ماضي وكل آتي عقدتين والتالتة تابتة تركبي الموجة العفية توصلي بر السلامة معجبانية وصبية.. يا بهية.. حبيبتي إنت.