تحل غدًا الذكرى الرابعة لثورة 25 يناير 2011، والتي قضت على حكم الرئيس الأسبق محمد حسني مبارك، وإدخاله السجن، ليخرج منذ وقت قريب براءة من جميع ما نسب إليه من تهم كقتل المتظارهرين أو الفساد المالي، وكذلك براءة رموز نظامه، الأمر الذي يثير تساؤلات عدة بشأن حقوق الشهداء الذين ضحوا بأرواحهم من أجل أمل في التغيير وتحسين أحوال المصريين ليكون الرصاص هو هديتهم. قالت ميري دانيال شقيقة الشهيد مينا دانيال أحد شهداء أحداث ماسبيرو، "مفيش جديد في موضوع أهالي الشهداء، ومفيش أي ضغوط بتمارس علينا دلوقتي، مفيش حد من أهالي الشهداء خد حقه وكل اللي خدناه من الدولة ال100 ألف والمعاش الشهري". وأضافت "ميري" ل"الوادي": "بخصوص المستحقات اللي قالوا إنهم هيدوها لأهالي الشهداء مثل اشتراكات المستشفيات واشتراكات مواصلات وكل حاجة لم نأخذها حتى الآن، نافية أن يكون هدفهم في الخروج بمظاهرات السابقة هو الحصول على هذه الامتيازات فقط". وأشارت إلى أن "حق الشهداء هو تحقيق حلمهم الذي خرجوا من أجله، وبعد الأربع سنين وبراءة مبارك الثورة لم تنتهي وأكيد هيجي يوم والقضايا اللي مبارك طلع براءة فيها تتفتح تاني وتتعاد محاكمتهم، ومش هنخرج في الذكرى الرابعة لثورة يناير". ومن جانبه يقول والد الشهيد أحمد فوزي، "بعد أربع سنوات من الثورة مفيش جديد في حقوق ولادنا اللي ماتوا، وعمالين يودونا ويجيبونا في المحاكم ويأجلوا، في الوقت اللي مبارك ورجالته طلعوا براءة، وأول ما سمعنا خبر براءة مبارك ورجالته وآخرهم براءة جمال وعلاء جالنا إحباط كبير ومقدرناش نتكلم". وتابع ل"الوادي"، "منقدرش بعد ال4 سنين غير إننا نقول حسبنا الله ونعم الوكيل، ومش هننزل بكرة في أي مسيرات علشان كتير قبلنا نزلوا ومعملوش حاجة وفيهم اللي بيتقبض عليهم وفيهم اللي بيتقتل وملوش دية وفي الآخر مش بيحصل حاجة". ومن ناحيته أوضح والد الشهيد إسلام الجنيدي، أحد شهداء السويس، إن براءة مبارك ورجاله، أنهت مقولة وجود عدالة في بلدنا وإن دلوقتي بقينا احنا المتهمين، وإن عمرنا ما هننسى حق أولادنا اللي ماتم أبدًا في الدنيا أو الأخرة، وإن كل ذكرى للثورة هنحييها بالتظاهر وهنخرج بكرة في مسيرة لإحياء ذكراه". وفي ذات السياق أبدت والدة الشهيد أحمد الشريف أحد شهداء جمعة الغضب حزنها الشديد على ما وصلت إلى مصر الآن، وعدم تحقيق أي شيء من القصاص العادل ممن قتل ابنها، "بعد أربع سنين من العذاب والمحاكم يطلع مبارك وأولاده ونظامه براءة ودم ابني يروح هدر ليه كل ده؟ مافيش أي حاجة اتحسنت في البلد ماشيين في اتجاه ملوش معالم، ومش كل ذكرى هنخرج مظاهرات تعبنا بجد من الحاجات دي معندناش أمل في أي حاجة".
