المتهم: تاجرت عشان أعيش وكنت ناوى أتوب بعد العمليه الأخيرة «اشتغلت فى المخدرات عشان مفيش شغل فى البلد»، لا يعدم الإنسان مبررًا لأى فعل، حتى لو كان جريمة. (محمد.ص - 36 سنة)، المتهم بحيازة ربع كيلو هيروين، قال فى اعترافاته أمام المستشار باهر حسن رئيس نيابة إمبابة، «هو أنا يعنى لقيت شغل وقلت لا، أنا دورت كتير على شغل فى البلد، بس كنت باشتغل يومين والدنيا تقف، وأرجع تانى أدور على أى شغلانة عشان أجيب منها لقمة عيشى، وأعرف أكفى نفسى، لكن البلد حالها واقف، فملقتيش قدامى غير أنى أشتغل فى كار المخدرات، وخصوصا الهيروين عشان شغله حلو وسهل وفلوسه كتيرة وحاله مهما حصل مابيقفش». وأضاف «كنت عارف إنه هيجى يوم ويتقبض علىّ فيه، بس أعمل إيه، أكل العيش مر، والمكسب فى تجارة المخدرات يخلى الواحد ما يتنازلش عن الشغل فيه بسهولة، بس كنت مضطر عشان أعرف أعيش». وأكمل «بدأت الشغلانة كموزع صغير للهيروين باليومية، وشوية بشوية بدأت أكبر وأتاجر لصالحى، بعد ما لقيت أن التجار بيكسبوا فلوس كتيرة فى وقت قليل، بس كنت فى كل مرة بخاف لحسن يتقبض علىّ وأدخل السجن». واستطرد «عشان كده أنا قلت لنفسى إنى أشتغل فى الهيروين وأبيع الكمية اللى معايا وبعدين أتوب وأبطل تجارة وأشتغل فى أى حاجة تانية حلال بعد ما أكون عملت فلوس حلوة تخلينى مارجعش للتجارة دى تانى عشان الشغل فيها كل مخاطر والواحد فيها ممكن فى ثانية يضيع حياته كلها وعمره كله يقضيه فى السجن». واختتم المتهم «كانت بحوزتى كمية المخدرات اللى اتقبض علىّ بها، وكنت خلاص اتفقت على بيعها ورايح عشان أخلص فيها وأقبض فلوسى، وكنت بعدها خلاص هابطل ومش هارجع للمخدرات تانى، لكن فوجئت بضباط من القسم بيهجموا على الشقة وقبضوا على بالهيروين قبل ما ألحق أوزعه». وكان قد وصل مجموعة من المعلومات للنقيب كريم أبوالعباس من مباحث قسم شرطه إمبابة، مفادها بأنه تم رصد عدد من متعاطى المواد المخدرة، على مسكن المتهم لشراء مخدر الهيروين. وكشفت التحريات أن المتهم من أكبر تجار المخدرات بإمبابة، وسبق اتهامه فى قضية تجارة لمخدر الهيروين وصدر ضده حكم بالسجن، وبعد انقضاء فترة عقوبته بالسجن عاد مرة أخرى إلى تجارة الهيروين، وبالحصول على إذن من النيابة تم إعداد كمين له والقبض عليه بمسكنه وبحوزته 250 جرام هيروين، تم تحرير محضر بالواقعة وأمرت النيابة بحبسه 4 أيام على ذمة التحقيقات.
