6 نصائح من "ياسمين عز" للسيدات قبل شهر رمضان

وجهت الإعلامية ياسمين عز، مجموعة من النصائح إلى الزوجات مع اقتراب شهر رمضان المبارك.
وقالت "ياسمين عز" خلال تقديم برنامجها "كلام الناس" المذاع على فضائية "إم بي سي مصر" مساء اليوم السبت. "مبدئيًا كده زي ما هتعزمي أهلك لازم تعزمي أهل جوزك".
وأضافت "هتقولي أصل عزومتهم ثقيلة على قلبك. هقولك ليه يا حبيبتي هو معمولين بسمنة بلدي وبعدين ده اسمه شهر الخير حاولي تصلحي فيه علاقتك بأهل جوزك وحماتك".
وتابعت "فرعونك قبل عزومة أهله بيكون صاحي ومركز دماغه بتودي وتجيب عايز يعرفهم أنك الاختيار الصحيح. وعايزهم يحكوا ويتحاكوا عن استقبالك وترحيبك ونظافتك وحلاوتك".
واستطردت "مينفعش تعزميهم بره العزومة لازم يكون فيها تفاصيل ولازم نفسك وروحك تطلع فيها ويتأكدوا أنك تعبتي علشانهم".
وأردفت "عايزاكي تقللي من الفطار والسحور برة البيت وكل قرش بيصرفوا فرعونك جوزك وبيتك وأولادك أولى به. وبعدين عايزة تخرجي ليه وفرعونك قاعد جنبك هو المنتزه".
وأكملت "شوفنا الموضة الجديدة يعني ايه تسييبي جوزك فرعونك يفطر من غيرك أول يوم رمضان وتروحي تفطري عند مامتك مين هيصب له العرقسوس والتمر الهندي مين هيقطعله المكرونة البشاميل مين اللي هيعمل ده".
واستكملت حديثها "في عزومة حماتك بلاش تروحي قبل الفطار بخمس دقائق. ويعني ايه متأكليش الأكل البايت لازم تعرفي أننا عندنا في الحياة نعمتين الأولى الرجل وبعدها الأكل والشرب".
وأوضحت "حرام الأكل المهدور وبراحة على جوزك وبلاش طلبات كثيرة. واحذفي سؤال اعملك أكل ايه على الفطار وبلاش تحرقي لزوجك أحداث المسلسل لأنها حركة مستفزة".