أيمن وتار: "محتاج قرض علشان تعمل عزومة في رمضان"

خصص أيمن وتار الحلقة الأولى من برنامجه الإذاعي " مغلق للصيام" على راديو إينرجي تردد 92.1 للحديث عن العزومات في شهر رمضان.

وقال وتار بطريقته الساخرة :" العزومات هي اكتر حاجة الناس بتستنها في رمضان علشان الأكل ببلاش، أنت ممكن تقابل في العزومة أقارب ليك أول مرة تعرف حاجة عنهم".

وسخر وتار من أنواع الأكل المقدم في العزومات ، حيث قال :"على السفرة تلاقي اكتر من شكل للبانيه وللنشويات، مش معقول رجيم السنة يضيع في شهر".

وتابع انتقاده للعزومات، وقال: " في الأول تحية شكر لكل أم وسيدة مصرية قررت أنها تعتزم الناس في رمضان، فبعد ما تفضل الأم طوال اليوم في المطبخ تعمل الأكل و مع مدفع الإفطار تعقد تريح تبدأ تفكر في المواعين، ولازم نشكر صاحب البيت الراجل اللي صارف كتير على العزومة".

وواصل وتار سخريته قائلا: "أنت محتاج ميزانية دولة في المحيط الهادئ لو قررت تعزم عشرة أشخاص في رمضان، ممكن علشان تعمل عزومة تقدم على قرض العزومة زي ما في قرض السيارة والقرض الشخصي".

وكشف وتار عن أنواع الأشخاص في العزومات:" شخص بيحب يبدأ الفطار بالتدخين، شخص متخصص في القضاء على اللحوم الموجودة على السفرة، وشخص ناقد للأكل، شخص مجامل لصاحبة العزومة، شخص عامل دايت ولكن متعفف بيحب الناس تعزم عليه اكتر".

وتطرق إلى أنواع العزومات في رمضان حيث قال: " في رمضان هتلاقي في عزومات الأهل، عزومة الخبرة لربة منزل قامت بتربية أجيال، عزومة إثبات الذات وتكون خاصة بعروسة جديدة، عزومة واحد من الأقارب جاي من الخليج يقرر يعزمكم في مكان برا البيت، وفي عزومة الصحاب".

وواصل سخريته، قائلا: " بعد الفطار لازم نتكلم على الحلويات، و تتفاجىء أن الكل اشتري كنافة بالمانجو، وبعدين نتكلم عن الخناقة على الريموت كل واحد عايز يتفرج على حاجة محددة".

وختم وتار أول حلقات برنامجه بالحديث عنه اختصار العزومات في الأيام الأولى من شهر رمضان، حيث قال:" مش معقولة أول عشر أيام عزومات وباقي العشرين يوم محدش يعزمني أنا شخص طفس".