أمير مرتضى: "إحنا مبنامش علشان المدرب الجديد وهناخد أفريقيا"

كشف أمير مرتضي، المشرف على قطاع الكرة بالفريق الأول لكرة القدم بنادي الزمالك، عن هروب الفرنسي باتريس كارتيرون، مؤكدًا "جماهير الزمالك أصبحت مركزة مع التعاون وهو فريق صغير ما بيتحملش الضغوط".
وقال المشرف على قطاع الكرة بالزمالك، في تصريحات تلفزيونية عبر فضائية "الزمالك": "كارتيرون قرر يفجر نفسه واحنا في فترة حساسة جداً".
وأكمل أمير مرتضى: "كلنا مستنين بطولة إفريقيا، فيه مدربين اعتذروا و شايفين إن التوقيت بالنسبالهم مخليهم مش مركزين".
وواصل أمير مرتضى: "في مدربين قبلوا التحدي، احنا بنشوف مين اللي مستعد وعنده خطة للشهر ده لحد بطولة إفريقيا، مشددًا: "استقرينا على المدير الفني الجديد، وموعد وصوله مرتبط بالطيران".
وتابع المشرف على الزمالك: "احنا مش بننام عشان الموقف اللي اتحطينا فيه، وتركيزنا كله ناخد بطولة إفريقيا، خاصة بعد موقف كارتيرون الإصرار زاد".
وأردف "أمير": "احنا محظوظين إننا عندنا مجلس إدارة ولاعيبة واثقين فيهم، وممكن كاريترون كان يبقى معانا ونخسر البطولة، زي ما خسر مع الأهلي".
واستطرد "امير": "دي كورة في الأول وفي الآخر، مالهاش لازمة نتكلم في رحيل عواد دلوقتي، الكلام على مين طالع إعارة ومين ماشي مش دلوقتي خالص".
وتحدث: "طارق يحيي عارف إنه جاي مدرب مؤقت ماتش أو ماتشين أو 3 ماتشات بالكتير".
واختتم "أمير تصريحاته": "بخصوص إري بابل، الزمالك هو اللي بيعلن عن الصفقات، ودي السياسية بتاعتنا، والنادي هو اللي له الحق اللي يعلن ده، وشغل الوكلاء والسماسرة والكلام ده مش بيمشي مع نادي الزمالك".