نشر موقع "قل" خلاصة الخلاصة في قصة الطلاق, وحرض جميع السيدات المنزعجات من حياتها الزوجية بالطلاق، ونشر ما أسماه ب"البرشامة الصغيرة" مطالباً الفاشلات فى حياتهنب أن يجعلونها نصب أعينهم دائماً، بقوله بطريقة ساخرة: "تخليها في شنطتكِ طول الوقت وبقولكِ طول الوقت" ومن ثم كتب ما وصفه بقواعد الطلاق الأربعون وكانت كالأتى: 1- محدش بيطلق عند المأذون من أول مرة 2.أول مرة في كل حاجة بتبقى أصعب مرة 3.مش هينفع تفضلوا صحاب لو في أولاد هتفضلوا معارف 4.في شرط تحطيه في عقد الجواز يديكي الحق تطلقي نفسك طلقة بائنة خليكي فاكراه المرة الجاية 5.مفيش راجل بيتغير...أطلقي 6.مش هينفذ حاجات من الي اتفقتوا عليها عادي عديها 7.في ناس كتير هتبدي إعجابها بيكي مباشرة دول غالبا كانوا مبيحبوش طليقك وعايزين يعلموا عليه مش أكتر....نفضيلهم 8.في ستات بردو هتغير علي رجالتها فجأة حتى لو كان في بينكم عيش وملح دول بقى بالجزمة 9.ربنا في السما وشغلك في الأرض 10.متصبغيش شعرك أصفر 11.عيشي حياتك ومتخافيش من حاجة إذا كان هو كان عايش حياته وهو معاكي صعبان عليكي تعيشيها بعد ما سبتوا بعض 12.العبي رياضة وياحباذا لو بوكس 13.هتخسي لوحدك متعمليش دايت 14.هتحلوي أوي متحطيش ميك اب كتير 15.متقلقيش في ناس شغلتها تغير اللمبة لو اتحرقت مش هتفتقديه أوي ده لو مكنتيش أنتي الي بتغيريها أساسا 16.الشقة من حق الزوجة 17.الخلع والمحاكم مش سهلة حليها ودي 18.ماتدخليش في علاقة علطول 19.ما تقصيش شعرك 20.ماتصبغيش شعرك أصفر 21.كل حاجة بتتنسي اذا كان الي بيموتوا ببنساهم مش هننسي الي اطلقنا منهم 22.لما طليقك يدخل علاقة كل الناس هتبقى متخيله إنك متغاظة سيبيهم, أنتي الوحيدة اللي عارفة اللي فيها وبتقولي من أعماق قلبك..البسي 23.أتعلمي عزف أله موسيقية أشتركي فورشة تمثيل...غني طبعا لو صوتك حلو ولا لو حتي وحش غني واتبسطي هى جت عليكي 24.ابتسمي في وش كل الناس في الشارع واضحكي بصوت عالي مع صحابك اضحكي أوي....لا مش أوي كده هنتسور 25.أنتي قوية مش حاسة كدة دلوقتي بس أنتي قوية في ألاف كل يوم الصبح بيقولوا لنفسهم 100 حجة علشان مش قادرين يبقوا مكانك 26.ما تقوليش مطتشلقة بالتش كدة, انطقيها صح 27.ما تشليش هم العيال العيال كده كده بتتربى وأحيانا بتتربى أحسن 28.أطبخي لنفسك أكل حلو وكليه احنا مش بنطبخ علشان الرجالة بس 29.روحي لدكتور نفسي مش عيب ومش علشان اطلقتي علشان كلنا مرضى 30.وماتسبغيش شعرك أصفر 31.اتعلمي رقصة بتحبيها وأرقصي كتير 32.مترديش على أسئلة الناس لو مش عايزة هزري وغيري الموضوع 33.اشتري فساتين.....كتييررر 34.أكتبي كل حاجة تحسيها حتي لو هترمي الورق ده بعدها في الزبالة 35.المجهول مبيخوفش استمتعي بالاكتشاف 36.متتصوريش سلفي كتير خلي صحابك تصورك أنتي مش لوحدك انتي حواليكي ناس كتير بتحبك 37.في ناس هتخسريهم عادي دول كان لازم تخسريهم دول ماكنوش موجودين أصلا دول زومبي 38.أوعي تخافي م الوحدة محدش بيموت م الوحدة 39.وما تصبغيش شعرك أصفر 40.وفي الاخر عيطي...عيطي كتير علي سريرك في أوضتك بس بعدها قومي أغسلي وشك وألبسي أحلى حاجة عندك ابتسمي واخرجي....لسه ألف طريق وسكة لسة ألف وألف صحكة....أة متنسيش أغسلي سنانك علشان الألف ضحكة