احتار دليلي ( فقه بدون الكتاب والسنة)

أنا كتبت الكلام ده بعد ما احتار دليلي ، فبعد ما كان دليلي من الكتاب والسنة وأنا السلفي الذي ادعوا الناس للتمسك بهما وجدت مشايخي الأفاضل في غمضة عين كلهم سابوا الكتاب والسنة وراحوا يستنبطوا الأحكام من حاجات تانية خالص كلها سياسة لا علاقة لها بالكتاب والسنة ، وذلك عندما سافر المفتي للقدس قالوا إنه فعل حاجة حرام ، وكأنهم يطالبوني بنسيان ما تعلمته من أن كل استدلال بغير الكتاب والسنة باطل وضلال ، وهنا عرفت أني أمام فقه جديد ملوش علاقة بالكتاب والسنة ، وهو فقه بدون كتاب ولا سنة .
وأصول الفقه الجديد ( اللي بدون الكتاب والسنة ) هي :
1- الحرام ما حرمته السياسة ولو كان اللي حرمته السياسة من أصول سنة النبي صلي الله عليه وسلم ، فالسياسة لما تقول زيارة الأقصى حرام، يكون هذا مقدم على قول النبي صلى الله عليه وسلم " لا تشد الرحال إلا لثلاثة مساجد " ، يا ناس حد يترك سنة رسول الله صلى الله عليه وسلم ويقول على سنته حرام حرام حرام . يرضي ربنا الكلام ده .
يا ناس اتقوا الله ده الحديث ده هو اللي حرمنا به السفر للصلاة في مساجد بعيدة عني في محافظات تاني ، وفي الآخر يطلع الحديث مش صح .يا ناس أنا قلت لكو احتار دليلي .
2- الإجماع الوطني أصبح أهم دليل ولا يجوز مخالفته ، هو الإجماع الوطني كتاب ولا سنة ، هو كده يبقى ( حكم بغير ما أنزل الله لأن الإجماع الوطني مش في الكتاب ولا السنة ).
3- خليها تكمل شوف الدليل ده ( يعرف الحق بالرجال ولا يعرف الرجال بالحق ) ، بعد ما تركنا الكتاب والسنة أصبح الحق ما رآه المشايخ لا كتاب ولا سنة ، وأصبحت الأحكام بهوى المشايخ يعنى زي ما كنا بنعيب على الناس التانيين ، يعني المشايخ معندهمش لا آية ولا حديث ويبقى المفتي هو من أهل الحديث . يا جماعة ينفع الكلام ده . ومش عايزني اتجنن .
4- شوف الأصل ده كمان الحديث بيكون له معنى على أيام النبي ومعناه لا يصح على أيامنا ، فحديث " لا تشد الرحال إلا لثلاثة مساجد " ده كان أيام النبي صلى الله عليه وسلم ، وكذلك لا يصح أن تستنبط من زيارة النبي للبيت الحرام وهو تحت حكم كفار قريش أنه يجوز زيارة المقدسات تحت الكفار ، يا هار أسود ، يا ناس ده الكعبة كانت تحت أيد الكفار والوثنيين مش تحت إيد المشركين زي القدس اللي تحت اليهود .
يا ناس مش هينفع كده نبيع مبادئنا وأصولنا عشان بنكره المفتي ، حسبنا الله ونعم الوكيل في كل اللي يعلمنا حاجة وبعدين يخالفها زي اللي حرموا زيارة الأقصى . إيه رأيكم أنا نفسي أزور القدس وأنا قلبي بيقلي أني أنا كده بعمل بسنة النبي وأن زيارة القدس سنة وهتفضل طول عمرها سنة .