أعوذ بالله السميع العليم من الشيطان الرجيم.. بسم الله الرحمن الرحيم.. أهلاً بيكم يا شباب ويا بنات اسكندرية.. وحشتوني كتير، ووحشتني لقاءاتي معاكم ومع كل الناس في مصر..أدينا ما بنتقابلش بقالنا 8 سنين لكن يشاء ربنا اننا نتقابل النهاردة في اسكندرية.. واسكندرية غالية عندي أوي يا جماعة وناس اسكندرية غاليين جداً عليا، ويعني .... مش عارف عندي عاطفة.. ووووخاطرة.. ووووكنت محضر كلام كتير انما أمام الحضور الغفير والكبير ده مش عارف اتكلم وانا شايف في عيونكم يا شباب الجدعنة.. هااا يا شباب.. متجدعنين واللا لأ..، بتذاكرم كويس وبتعملوا اللي عليكم عشان ربنا يفرح بيكم واللا لأ؟..ها يا بنااات.. متجدعنين في موضوع الحجاب ومتفوقات وفي دراستكم واللا لأ.. حتى اللي مش محجبة بقول لها ان وجودك معانا النهاردة دليل ان جواكي نقطة نور يا رب ياااا رب تملا قلبك كله.وياااارب نتجمع كلنا عند النبي صلى الله عليه وسلم في الجنة ونفرحوا بينا ان شاء الله. أنا جاي النهاردة اسكندرية من خلال بوابة راجل محترم.. أنا جاي عشان خاطر الراجل ده.. مش عشان أي حاجة تانية..اللوا عبد السلام المحجوب( تصفيق حاد).. عارفينه طبعاً.. هاااه.. فاكرينه يا أهل اسكندرية.. فاكرين الراجل اللي كنتم مسميينه عبد السلام المحبوب لما كان محافظ ( تصفيق شديد ويقف عبد السلام المحجوب ليحيي الجميع) يا سلام.. هي دي المحبة يا جماعة، وتعالوا نتكلم الكلام المهم اللي جاييلك عشانه. فيه ناس كتيرة استغربت من ندوتي دي وانها أول ندوة تكون في مصر بعد 8 سنين واتقال كلام ع النت وعلى عمرو خالد دوت نت.. هااااه.. مشتركين على عمرو خالد دوت نت واللا لأ يا شباب.. وكمان على صفحة عمرو خالد على الفيس بوك.. عارفينها.. اللي ما اشتركش يا ريت يشترك عشان الثواب العظيم وعشان نعرف نتقابل ونتكلم زي ما احنا عاوزين. المهم اني جاي النهاردة .. إنتو سامعني يا شباب ياللي ورا.. طب والبنات.. هاااااه.. صوت المكروفون واصلكم.. جميل جميل.. أنا جاي النهاردة عشان أقول اني لو بحب اللوا المحجوب فهو ليه عندي النصيحة، وانا جاي النهاردة عشان اقابلكم وعشان انصحه.. اللوا المحجوب غالي عندي أوي وجميل ان يكون عندك إنسان غالي عليك تقدم له النصيحة عشان يمكن يكون هو السبب في دخولك الجنة. يا سيادة اللوا انت راجل محترم..والآلاف اللي موجودين عارفين ده.. لكنك راجل محترم نازل في انتخابات ما عنديش كلمة أقدر أوصفها بيها..يا شباب ياللي خرجتم عشان تسمعوني أديكم بتسمعوني وانا بقول بلاش الحزب الوطني يا سيادة اللوا.. بلاش بلاش بلاااااش.(تصفيق شديد والمحجوب وشه ميت لون).يا جماعة ياللي بتسمعوني وياللي زمانكم نزلتم كلامي ده ع الموقع وع المنتدى وعلى الفيس بوك، ولو ما عملتوش كده اديني بقول لكم اعملوا.. يا شباب اعرفوا ان الحزب الوطني ده خد فرصته كاملة والنتيجة انتو عارفينها. يا شباب ياللي خرجتم عشان خالد سعيد.. هو فين خالد سعيد.. حد فاكر خالد سعيد؟.. صومتوله ودعيتوله واللا لأ؟..هااا يا شباب.. خرجتو في مظاهرات ونسيتو الموضوع والموضوع نام. لأ .. المظاهرات عيب انما مقاطعة الانتخابات هي أقوى رد ع اللي حصل لخالد سعيد. أنا عمري ما اتكلمت في السياسة واستحملت كتير اليومين اللي فاتوا واتهموني اني بقيت تبع الحزب الوطني واني بعت نفسي للحكومة وانا مستحمل.. صحيح بتقطع من جوة انما مستحمل.. وكل ده يا اخواننا عشان اجي اقول لكم الكلمتين دول سامعني يا شباب ياللي ورا.. هه.. هه.. طفوا السماعات.. مش مهم الصوت هيوصل واللي قدام يبلغوا اللي وراهم والمحاضرة دي موجودة دلوقتي على عمرو خالد دوت نت ولو مش عاوزين تكملوا وقفة روحوا اقروها وابعتوها لكل اصحابكم. هي كاملة هناك دلوقت. التزوير في الانتخابات بيتم وهيتم وهيفضل يتم يا شباب ويا بنات طول ما احنا بنشارك فيها.. احنا كده عاملين زي الكومبارس في مسرحية.. ويا ريت بس كومبارس ده احنا كومبارس صامت. الحزب اللي خرجني برة مصر هو الحزب الوطني. الحزب اللي لغالي مشروع مساعدة القرى الفقيرة عشان ينفذ هو برنامج تافه اسمه الألف قرية هو الحزب الوطني. الناس اللي بتموت في العبارات بيموتوا بسبب مين؟.. هاااه.. مين يا شباب يقول وهيطلع معايا عمرة.. آه.. صحيح هي موتة ربنا إنما مين السبب؟؟..ماشاء الله ما شاء الله.. مذاكرين.. هوووو الحزب الوطني، فيبقى يا سيادة اللوا إوعى تنزل تبع الحزب الوطني.إنزل مستقل والناس دي كلها هتبقى برضه معاك، وهجيلك تاني ونعمل ندوة تانية ( إن عشنا وكان لنا عمر يعني) والناس كلها حاضرة عشانك مش عشاني. هاااه يا شباب.. النور اتطفى ورا.. طب وقدام سامعين؟..ولا شايفين؟..خشوا بسرعة على عمرو خالد دوت نت النهاردة وهتلاقوا كل كلامي ده بالنور المقطوع بهااا يا شبااااب بكل حاجة. يا شباب ويا بنات.. مستوى الرعاية الصحية ف مصر دلوقت يقرف..ده مش مستوى يليق ببني آدمين . ده ما يرضيش ربنا ..والله والله والله ما يرضي ربنا.. مش سامعين برضه..ولا شايفين؟..خلاص بقى هعلي صوتي أكتر وانتو تتجدعنوا وتبعتوا الكلمة دي لكل الناس في كل مكان من على عمرو خالد دوت نت. انتو عارفين الاسبيلينج..ولو مش عارفينه اكتبوه بالعربي. حرام اللي بيحصل في مصر ده.حرام اللي بيحصللي واللي هيحصلي وكلكم عارفين، وانا والله والله ما جيت عشان اكون تبع الحزب الوطني.إحنا ناس عايزة تعمل نهضة.ناس جايين نتعايش..عايزين نمشي على خطى الحبيب.مالناش دعوة بقى لا بإخوان ولا بحزب وطني وعايزين الاتنين يسيبونا ف حالنا ومالهمش دعوة بينا وكفاية بصراحة لحد كده.احنا ناس صناع حياة.ناس بنحاول نكون مجددون.ناس عايزين بلادنا تبقى أحسن بلاد في الدنيا من غير تعذيب، ولا معتقلات، ولا استهانة بالبني آدم اللي ربنا كرمه، ولا حجر على الآراء، ولا نفي للناس برة بلادها بأوامر غير مكتوبة، ولا فساد، ولا عبارات بتغرق، ولا ناس بتعمل هجرة غير شرعية عشان تعبت، ولا أكل فاسد، ولا خضار مسرطن، ولا اكياس دم ملوثة، ولا سرقة ونهب ف أراضينا، ولا كرامة بتداس بالجزم كل يوم، ولا بطالة حاوجانا للي يسوى واللي ما يسواش. فاهمني يا شباب.. يا شباب..يا شباب.. رحتو فين يا شباب..معقولة كلكم بتابعوني على عمرو خالد دوت نت..طيب كلمة أخيرة. كلمة.. أخيرة هنعمل إيه واجب عملي النهاردة عشان ما نبقاش قلنا كلام ع الفاضي؟. هنخش كلنا ونقول لا للانتخابات المزورة، ولا للحزب الوطني إذا كان هيزور، ونعمل جروب على الفيس بوك..جروب يعني حاجة ببلاش اهه مش هتكلفك غير انك تروح السايبر لو ماعندكش نت وتروح عامل جروب اسمه لا للحزب الوطني وجروب تاني اسمه انزل مستقل يا محجوب عشان ترجع تاني محبوب . مش هنسكت بعد كدة للظلم والفساد يا شباب، وروحوا اعملوا داونلود للمحاضرة دي عشان تبقى حاجة تفكركم بيا، والله أعلم هنتقابل تاني واللا لأ، ولو هنتقابل هيبفى في مصر والا برة مصر، وهنتقابل أصلاً في الدنيا واللا في الآخرة..أنا قلت كل اللي نفسي أقوله من زمان، وكل اللي كان نفسكم تسمعوه مني، ولو ده آخر كلام هقوله هبقى مبسوط مبسوط مبسوط وياللا ندعي يا شباب إني داع فأمنوا يا رب ياذا الجلال والإكرام.. يا ذا الجلال والإكرام..يا حنان يا منان ارفع مقتك وغضبك عنا . يا رب إن في هذا الصوان شباب زي الورد يا رب.. زي الورد يا رب.. احرسهم لغاية ما يوصلوا لبيوتهم.نجيهم من اللي مستنيينهم برة.إكرمهم بوصلة نت يخشوا بيها على عمرو خالد دوت نت.يا رب ياااا رب الكابل البحري بتاع النت ما يتقطعش قبل ما يعملوا داونلود للمحاضرة يا رب.يا رب ترى مكاننا وتسمع كلامنا وتعرف من يراقبنا الأن ومن ينتظرنا خارج هذا الصوان فاخسف بهم الأرض وأرسلهم إلى قديم الزمان وارجع بيهم يا رب لأيام الكفار.. يا رب يا رب سلط عليهم ذبابة النمرود تخض ودانهم ما تخرج شالا بالضرب بالقباقيب. يا رب اهلك اللي بالي بالك كما أهلكت عاداً الأولى. يا رب اخسف بهم الأرض كما خسفتها بقارون.أغرقهم كما أغرقت آل فرعون.إرميهم في بطن الحوت من غير ما يرجعوا تاني يا رب.اللهم حسن ترتيب عمرو خالد دوت نت على أليكسا ياااا رب .. إجعله قبل موقع أوباما وموقع أوبرا وينفري. وارزق مواقع الحزب الوطني ومن عاونهم بهاكرز يروننا فيهم آية من آياتك يا رب.يا رب ارحمني وخرجني منها على خير يااااارب..يااارب.آاااااامين آاااااااامين آااااامين..، وصلى الله وسلم على سيدنا محمد وإنا لله وإنا إليه راجعون.
