كلام مسئول

محمد صلاح: يا مساء الخير ، في مصر أكتر شعب متدين في العالم – مش أنا اللي بقول – دا نتيجة استطلاع رأي لمعهد Gallop الأمريكي قاس تدين 143 دولة فلقى كل المصريين مسلمين ومسيحيين متدينيين كان سؤال المعهد "هل يمثل الدين جزء هاما في حياتك اليومية" كانت الإجابة .. نعم
لما رئيس القوة العظمى الوحيدة في العالم النهاردة باراك اوباما حَب يوجه كلمة إلى العالم الإسلامي اختار مصر ، مش سر إن الاختيار تم بعد دراسات وأخد رأي مؤسسات نصحته يقول الكلمة منين ، من القاهرة من عاصمة الدور والتأثير ، من قلب العالم العربي والإسلامي ، طبعا مكناش مستنين كلمة اوباما من هنا عشان نحكم على حجم ومكانة مصر أو مستنيين استطلاع Gallop عشان نتأكد من تديننا كل مظاهر الشارع بتقول إننا متدينين ، من سلام الناس وكلامهم ، من لبسهم وأكلهم واحتفالهم واحتفائهم بالمناسبات الدينية ، من ترددهم على المسجد والكنيسة المسّحة الدينية دي موجودة وملمسّه مع كل حاجه كل تصرف كل خطوة كل جملة الحلال والحرام يمكن عندنا لوايح بيها عند كل واحد لايحة سواء بالحق أو بالباطل الاهتمام بالسؤال عن حرمانية تصرف أو سلوك معين نلجأ على طول لإمام مسجد أو لشيخ فضائية المهم الفكرة في الوجدان
الإحساس بالله في حياتنا اليومية رؤيا حاضرة والمصريين كده طول تاريخهم كنا باحثين دائمين عن الإله ، لما نزلت العقائد السماوية كنا من الشعوب الأكثر تمسكا بها وإلى الآن لكن المشكلة مش هنا المشكلة هل إحنا متدينين في الجوهر زي المظهر ، قولا وفعلا ، نمارس سلوكيات دينية حقيقية بنطبق مبدأ الدين المعاملة ولاّ بنرفع شعارات وبس إحنا متجانسين متراحمين متكاتفين محافظين على ما أمرنا الله به من الأخذ بالعلم ومكارم الأخلاق والتفكر والسعي ولاّ اهتمامنا بالحجاب والنقاب واللحية وبس يبقى كده عملنا اللي علينا ، الدين شعار بنرفعة في مكروباص ولاّ حياة بنعشها بإحساس
البعض بيسأل ليه التدين المظهري انتشر في بلد فيها الأزهر وفيها مائة ألف مئذنة وزاوية يمكن علماء الدين الحقيقيين تخلوا عن دورهم وأفسحوا المجال أو تركوا الساحة لمدعين انتهازيين أو متطرفين ، يمكن الخطاب الديني كله عاوز غربلة ، عاوز غربلة عشان ما نخلطش الأوراق ونحرم الحلال ونحلل الحرام ونمسك بالقشور ونشغل بصغائر الأمور وننسى كبيرها أو المهم فيها عشان كمان تبقى أسئلتنا على درجة التحدي اللي إحنا عايشينة
ليه أتخلفنا وأتقدم غيرنا ؟ ليه الأزمات الطاحنة في دول العالم الإسلامي أكتر من غيرها ؟ ليه متحاصرين ؟ ليه تهمة التطرف لزقت فينا ؟ ليه بعض اللي أسلموا في الغرب قالوا الحمد لله اللي خلانا نعرف الإسلام قبل ما نعرف المسلمين بتوع اليومين دول ؟
عشان نجدد الخطاب الديني لازم نجدد الدعاة وأئمة المساجد دي مسئولية وزارة الأوقاف صاحبة الملفات المثيرة والقضايا الشائكة والأزمات اللي أحيانا بتضيق وأحيانا بتنفرج ، ملفات الأوقاف مفتوحة على طول وما تثيره أو يثار حولها متنفعش فيه قرارات إدارية تنهي الجدل لأنها بكل بساطة تعمل في منطقة غاية في الحساسية .. منطقة الدين .. صحيح مش مؤسسة إفتاء أو فضائية بتضخ فتاوى ليل ونهار لكن هي المسئولة عن مائة ألف مسجد في مصر المسئولة عن دعاتها وعن أئمتها وعن منع أي فكر متطرف يتسلل لها ، تنشر الإسلام الوسطي اللي بيعوا لنبذ العنف والدعوة إلى الله بالحكمة والموعظة الحسنة وقبول أتباع الديانات الأخرى ، مسئولة عن الأذان اللي قررت إنه يكون موحد ، مسئولة إنها تطلع على المنابر دعاة يصبوا الخير مش النار في أذن المصلين يفتوا باللي يعرفوه واللي ما يعرفهوش "منَ قال لا أعرف فقد أفتى"
تجديد الخطاب الديني ، دعوة وزير الأوقاف للمسلمين بزيارة القدس ، الدعاة والأئمة ، كلمة الرئيس الأمريكي اوباما من القاهرة مدينة الألف مئذنة كل ده حيكون لينا عنه النهارده كلام ....... مسئول
فاصل تقرير وثائقي
وزارة الأوقاف واحدة من أقدم الوزارات المصرية وهي المسئولة عن نشر الوعي بصحيح الدين ورعاية الأيتام والاهتمام بالأمور الفقهية كما أنها ترعى ما وهبة المصريون من خير عبر الأزمنة كصدقات جارية وعليها في الوقت ذاته الحفاظ على قيمة الوقف واستثمار أمواله في استصلاح أراضي زراعية وبناء مساكن وتشغيل عِمالة كما أن عليها أن ترد على من يحاول تحميلها مسئولية انتشار الإرهاب والأفكار المتطرفة وأيضا عليها مواجهة من يريدون السيطرة على عقل الأمة بنشر فتاوى خاطئة لا تخدم أحد ، كما أن عليها مواجهة المد الشيعي خصوصا المتدثر في عباءة سياسية سوداء لكن الأوقاف ليست فحسب وزارة رد فعل إنما هي تتحرك وتقترح وتبادر فقرر وزيرها في مفاجأة غير متوقعة أنه مع زيارة المسلمين للقدس لدعم أهلها حتى ولو بتأشيرة إسرائيلية
كما تقوم الوزارة بحركة تجديد واستكمال لنقص الدعاة المؤهلين في مصر فالداعية هو الخطوة الأولى للسؤال في مصر وهو الحائط الأخير للنجدة الفقهية والمنير إذا ما تم استخدامه فإنه يحرك الجبل ,الدعاة في مصر أصناف وأنواع ومدارس لكن القضية الخطيرة أن الدعاة من خريجي الأزهر في تراجع فلم يعد الدعاة الأزهريون نجوما ولم يعد تأثيرهم واسعا بعكس دعاة آخرين ليسوا من خريجي الأزهر ولا من معاهد إعداد الدعاة وأصبحوا نجوما لامعين في سماء الدعوة والسؤال هو لماذا ؟ وما هي أوضاع الدعاة ومشاكلهم ؟ ما الذي أدى إلى تراجع تأثيرهم في الناس؟ تجربة الآذان الموحد في المساجد إلى أين وصلت ؟ ما المسافة التي قطعتها جولات الحوار بين الأديان ؟ هل فشل الحوار ؟ ولماذا ؟
إذا كان الرئيس الأمريكي باراك أوباما اختار القاهرة ليوجه كلمته للعالم الإسلامي فما الذي يعكس هذا الموقف ؟ وإلى أي مدى يمكن أن يحول صراع الحضارات لتعاون وصدام الأديان إلى تفاهم ليسود السلام والوئام العالم ؟ .
فاصل
محمد صلاح: احنا مش بس الدين بيمثل عندنا قيمة اساسية احنا بنتنفس دين املنا كلنا الجنة ونعيمها لكن النوايا الطيبة وساعات الحماس الزايد يفرشوا طرق كتيرة لجهنم سواء في الآخرة أو في الدنيا نفسها .. ساعات البعض بتاخده الحماسة والوهم انه يقدر يطوال الاخرعن طريق العنف فيحسس العالم اننا ارهابيين عايزين قضي عالحضارة بينما احنا العرب والمسلمين يعني ضحايا كل تطلعات الرجل الابيض بمعناها الاستعماري ، مفيش حوار مع الاخر رفضناه ومش احنا بتوع صدام الحضارات والاديان ولا رسمنا ولا اتكلمنا بسوء من قريب او بعيد عن انبياء الاديان الاخرى .. عندنا التسامح اصل والتعصب استثناء يمكن من اللي شفناه من مظالم وانحيازات لكن الاسلام واسع ودايما قادر على انه يعدي ويتسامح ويتجاوز ويستمر في الحوار لانه دين الحوار حتى نصل إلى كلمة سواء وزير الاوقاف الدكتور محمود حمدي زقزوق هيكون لينا معاه النهاردة كلام مسئول ومن كلام الدكتور محمود حمدي زقزوق " هناك اهمية قصوى للحوار بين الاديان وضرورته لازالة العقبات والمفاهيم المغلوطة والافكار الخاطئة وباعتبار ان الحوار هو اللغة الحضارية التي تليق بالانسان والاديان" ، " سلام العالم المعاصر يتوقف على السلام بين الاديان ولن يتحقق السلام بيب الاديان الا بالحوار بينهما وادعو الى تشجيع الحوار القائم على الاحترام المتبادل لازالة الكثير من سوء الفهم والقضاء على الاحكام المسبقة والمفاهيم المغلوطة لدى كل طرف ازاء الطرف الاخر" ، "العلاقات الطيبة بين المسلمين والاقباط في مصر ليست مجرد شعارات بينما هي واقع ملموس وهناك بعض الخلافات لكنها امر طبيعي قد يحدث بين افراد الاسرة الواحدة ولا يعني وجود انقسامات طائفية ..وقال الدكتور زقزوق "ادعو المسلمين لزيارة القدس لان قضية القدس قضية اسلامية تهم كل المسلمين وزيارة المسلمين للمسجد الاقصى ستؤكد هذا المعنى ويجب على المعارضين لهذه الدعوة تحكيم العقل والمنطق وحساب الارباح والخسائر من هذه الزيارة وتجنب الانفعال الزائد والحماس الذي ليس له عائد ايجابي على القضية الفلسطينية "..
العالم بيتغير والوقت حان عشان نعيد طرح مفاهيم ومبادئ ديننا الاسلامي الصحيحة نغير خطابنا اللي اتفهم غلط بصورة جذرية خطأ الفهم مسئولية مشتركة مش بس مسئولية اللي مفهمش وعشان نحقق الغاية المطلوبة عايزين نعيد تركيب البيت الديني من الداخل وزير الاوقاف محمود حمدي زقزوق هيكون لينا معاه النهاردة كلام مسئول
محمد صلاح: ارحب بوزير الاوقاف الدكتور محمود حمدي زقزوق اهلا سيادة الوزير ..سيادة الوزير شفت أزاي اختيار الرئيس الامريكي باراك اوباما لكي يوجه منها كلمة الاسبوع المقبل الى العالم الاسلامي؟
د/محمود حمدي زقزوق- وزير الاوقاف: هو في اعتبارات طبعا الامر لم يأت اعتباطا ولكن دا درس دراسة وافية من الجانب الامريكي ، اولا مصر اكبر دولة عربية ولها ريادة في العالم العربي ومصر لها الريادة في العالم الاسلامي بتاريخها المعروف ان فيها الازهر الشريف اللي بيدرس فيه النهاردة مسلمين من 104 دولة موجودين في مدينة البعوث الاسلامية ، العالم الاسلامي كله يعترف لمصر بهذه الريادة كل العالم الاسلامي فيه آلاف مؤلفة موجودة ففي مصر النهاردة بتدرس على مدى هذا التاريخ العريق فمصر معروف ان لها ريادة في العالم الاسلامي وبالتالي من الطبيعي ان الرئيس اوباما اذا اراد ان يتوجه بحديثه الى العالم الاسلامي ان يختار الدولة التي لها ثقل في العالم الاسلامي ومعترف بريادتها في هذا العالم الاسلامي
محمد صلاح: بعد احداث سبتمبر 11 سبتمبر ثار السؤال في الغرب وعند الامريكان خصوصا لماذا يكرهوننا إحنا بنسال دلوقت لماذا يحبوننا ليه متوجهين لنا
د/محمود حمدي زقزوق : هو مرة واحد صحفي اوروبي سألني هذا السؤال ليه بتكرهوا الامريكان قلت له وضع السؤال بهذه الطريقة خطأ قول ليه بتكرهوا السياسة الامريكية احنا لا نكره الشعب الامريكي على الاطلاق ولا نكره أي شعب من الشعوب لكن السياسة نفسها لدولة ما اذا كانت متعارضة مع مصالحنا فاحنا لازم نعبر عن وجهة نظرنا وبالتالي مفيش في السياسة حب وكره ولكن السياسة فيها مصالح فمصلحتنا فين ومصلحتهم فين تقدير المصلحة دي بتكون من وجهة نظر احيانا خاطئة او من وجهة نظر متحيزة يعني انا اذكر ان اول ما الرئيس بوش اتى منذ 8 سنوات او اكثر أنا كنت متوقع انه يقول القضية رقم 1 عنده هي قضية الشرق الاوسط لكن لقيته بيقول القضية رقم 1 هي العراق فين وفين بعد 7 سنين في الوقت الضايع بقى بدا يتكلم على فلسطين وهو متأكد تماما انه لن يصل الى حل وهتنتهي مدته دون ان يكون هناك حل ودا اللي حاصل تماما لكن هو الرئيس الامريكي اوباما هو من اول ماجه وهو بيتكلم عن القضايا الساخنة وعايز يعمل حاجة فاحنا لازم نتجاوب معاه فاحنا لا المسالة مسالة حب ولا كره
محمد صلاح: يعني حضرتك شايف انه فيه تغير في الفكر السياسي الامريكي مع إدارة اوباما ولذلك حدد القاهرة لكي يتحدث منها الخميس المقبل الى العالم الاسلامي وحدد ايضا فكرة الخطاب الى العالم الاسلامي ؟
د/محمود حمدي زقزوق : اه طبعا هو تغيير كبير جدا في السياسة الامريكية ولذلك هو اتى مفيش عنده أجندة حرب ان هو يحارب ويبعت الجيوش الأمريكية هنا وهناك بل بالعكس هو قال انا عايز اسحب الجنود الأمريكان من العراق وعايز يلغي معسكر جوانتنامو وعايز يتوجه إلى العالم الإسلامي هو حتى في الكلمة بتاعته يوم تنصيبه اتكلم ايضا عن العالم الاسلامي ان هو يريد علاقات طيبة مع العالم الإسلامي وفي هذ ا الخطاب هو حدد بالضبط ايه اللي عايز يعمله يعني
محمد صلاح: طيب سيادتك مجرد انه يتحدث بخطاب او بكلمة الى الشعوب الاسلامية فكرة ملفتة جدا يعني كان ممكن من البداية يمارس سياسات يترجمها العرب المسلمين على انها سياسات عادلة مثلا ثم بعد ذلك يكون الحديث لكنه اختار بعد فترة وجيزة من توليه منصبه انه يتوجه الى العالم الاسلامي بكلمة من القاهرة مش ممكن دا يكون نوع من الاستعطاف الديني انت عارف ان الشعوب العربية والاسلامية طيبين يعني نابلين لما جه مصر فيه ناس قالوا عليه اسلم يعني ؟
د/محمود حمدي زقزوق : اه..هو اوباما لما اراد ان يخاطب العالم الاسلامي هو اللي انا متوقعه ان خطابه في القاهرة لن يكون مجرد كلام عاطفي ان هو يستدر بيه عطف العالم الاسلامي ولكن هو عايز وارجو ان يتحقق هذا ان هو يقول ايه الاستراتيجية بتاعته التي ينوي تنفيذها فيما يتعلق بمنطقة الشرق الاوسط ولذلك هو يتوجه الى العالم الاسلامي مش بكلام معسول ولكن هيحدد بالظبط يقول ايه اللي هو عايز يعمله
محمد صلاح: طب خلينا نقرب شوية من الملفات اللي حضرتك قائم عليها في النهاية كلمة باراك اباما موجهة من رأس الغرب الى العالم الاسلامي مش شايف انه دا يستدعي رد فعل ايجابي ايضا من العالم الإسلامي إلى الغرب بمعنى حديث او احاديث او تصرفات او سياسات تعكس انه الاسلاميين او المسلمين ليسوا ضد الامريكان وليسوا ضد الغرب وانهم ليسوا ضد الحضارة وليسوا ضد التحضر وانهم مش همجيين ومابيكرهوش حد ايه اللي المفروض نعمله كمسلمين ؟
د/محمود حمدي زقزوق : هوطبعا لابد انه يكون فيه تجاوب من الجانب الاسلامي بعد هذا العرض يعرض ويقول انا عايز يكون لينا علاقات كويسة ما بنكرهكوش احنا لابد ان نتعاون في سبيل حل هذه القضايا فهذه دعوة لابد ان العالم الاسلامي يتجاوب معاها وهو العالم الاسلامي في الحقيقة بينتظر صوت عاقل منذ فترة طويلة من الغرب ان هو يميل الى الحوار وليس الى الصدام كما كان قبل ذلك وصدام الحضارات ونهاية التاريخ والكلام دا كله دا كان بيستفز العالم الاسلامي ومع ذلك العالم الاسلامي مستعد للحوار في أي وقت
محمد صلاح: ايه اللي ممكن نعمله احنا دلوقت ردا على كلمة باراك اوباما او التغيرات اللي حاصلة في السياسات الامريكية؟
د/محمود حمدي زقزوق : احنا برضه لابد ان نتجاوب معاها احنا نقولهم ان احنا ليس بيننا وبين الشعب الامريكي أي عداوة على الاطلاق بل بالعكس احنا نحترم الشعب الامريكي ونقدر الانجازات الكبيرة التي قامت بها الولايات المتحدة الامريكية هي قائدة العالم النهاردة هي زعيمة العالم كل التقدم اللي احنا شايفينه الآن عملته امريكا في خلال كام سنة يعني 3 قرون فدا طفرة تستحق التقدير فاحنا بنعبر عن كل هذه المشاعر ومن ناحية تانية نبدي استعدادنا التام للتعاون
محمد صلاح: يعني كله كلام يافندم يعني نعبر بالكلام ولا مطلوب منا اجراء يعني الراجل خد اجراء وجه قلب الشرق الاوسط وجه الى مصر ووجه كلمة ثم أيضا لاحظنا تغيرات في السياسات زي ماحضرتك قلت موضوع جوانتانامو موضوع التغيرات في العراق ربما هناك مؤشرات على تعاطي او على تصرفات امريكية مختلفة في القضية الفلسطينية.. احنا الاجراءات اللي نعملها ايه التصرفات اللي نعملها ايه احنا بنتكلم عن شعب امريكي انضرب في 11 سبتمبر وكانت وجهة نظره في الاسلام اتكونت في اليوم دا ازاي نغير الصورة الذهنية دي ؟
د/محمود حمدي زقزوق : الصورة الذهنية دي هي في الحقيقة صورة ظالمة للعالم الاسلامي احنا لما يكون فيه مليار ونص مليار مسلم موجودين في العالم وانا قلت الكلام دا في اكثر من مناسبة في بعض البلاد الاوربية قلت لهم اذا كان هناك متطرفين او ارهابيين في العالم الاسلامي عددهم الاف مؤلفة حتى ولو قلنا ان عددهم 100 الف نصدقهم ولا نصدق مليار او مليار ونص مليون مسلم .. دا ناحية، الناحية التانية المسلمين مش ارهابيين بطبيعتهم الاسلام ضد الارهاب لكن احنا لوحبينا بقى نشاكس نقولهم هم اتعلموا الارهاب من اروبا وانا الحقيقة باواجه اخوانا الاوروبيين بهذا الكلام مين اللي عمل حربين على راح ضحيتهم اكتر من 60 مليون من البشر بكل الفظاعات التي عرفها الانسان هل هو الاسلام ولا المسلمين ..؟ الغرب.. من الذي قتل منذ 14 سنة فقط 8 الاف مسلم تحت سمع وبصر العالم كله وتحت اشراف جنود الامم المتحدة اللي هما كان المفروض ان يكونوا حارسين على هؤلاء
محمد صلاح: الصرب ؟
د/محمود حمدي زقزوق : اندبحوا 8 الاف دا ارهاب ودا دموية ودا عنف ولا لا ..يعني اذا هناك حقائق لابد ان احنا نواجه بها لكن مش احنا اللي متهمين دايما حكاية الارهاب دي ماظهرتش الا في السنوات العقود الاخيرة لكن قبل ذلك مكانش حد بيسمع ان مسلم يروح يفجر نفسه وبعدين انا دايما اقول فيه ارهاب دا صحيح بس معالجة الارهاب حتى الآن خاطئة يعني العالم وعلى رأسه امريكا بالذات عالجت هذا الارهاب بطريقة خاطئة هي بتعالج الظاهرة من السطح لكن لاتبحث عن الجذور طب ايه سبب هذا الارهاب لابد ان تكون هناك اسباب.. انا دايما كنت اقول لاخواننا الاوروبيين انه لو اتحلت القضية الفلسطينية على الاقل 90% من الارهاب في العالم هيزول
محمد صلاح: يعني حضرتك شايف ان مشاكلنا مع الغرب سياسية مش دينية ؟
د/محمود حمدي زقزوق : لا لا مش دينية على الاطلاق ابدا دا الاسلام بيعترف باليهودية والمسيحية والمسلم اللي يقولك انا اعترف بالقران وبمحمد صلى الله عليه وسلم فقط ولكن ماليش دعوة بالمسيحية ولا اليهودية من وجهة النظر الاسلامية مايبقاش مسلم لان الإيمان بالله وملائكته وكتبه ورسله واليوم الآخر احنا دلوقت بنقول للغرب وبنقول لأمريكا وبنقول للرئيس اوباما احنا مسلمين لكن الاسلام بتاعنا بيقولنا ان اقرب الناس الى المسلمين هما المسيحيين "ولتجدنّ اقربهم للذين آمنوا الذين قالوا انا نصارى ذلك بأن منهم قسّيسين ورهبانا وأنّهم لايستكبرون " واحنا على اتم استعداد للحوار والتعاون في كل ما من شانه أن يعود بالخير على العلم اللي احنا فيه لان العالم دا ماهوش عالم امريكا ولا عالم اوروبا ولا عالم افريقيا ولكن عالمنا جميعا معنى ذلك ان احنا برضه لابد نتأمل في أحوالنا طب ليه العالم بيعاملنا كده لان إحنا ضعاف العالم مابيحترمش الا القوي لو العالم الاسلامي دا قوي والله ماحد يقدر يقترب منه على الاطلاق والكل يقوم له ويعمله تعظيم سلام لكن احنا فيه اسباب الضعف عندنا كثيرة ويعني العالم الاسلامي هو مشتت جزر منعزلة مفيش تضامن وبعدين تشوف حضرتك مشاكل العالم النهاردة فين هي مركزة في العالم الاسلامي في الصومال في افغانستان في العراق يعني أدي مشاكل العالم الاسلامي الساخنة في فلسطين اذا هذا الوضع بيستدعي ان العالم الاسلامي كله يتضامن يبقى يد واحدة لو العالم كله شاف ان العالم الاسلامي دا قوي بهذه الطريقة ويبحث عن باقي اسباب التقدم ماهو العلم بكل ابعاده يعني فالعالم هيحترمنا ولذلك احنا مانقعدش ننعى حظنا ونقول الناس دول هما بيكرهونا هما كذا وهما كذا..لا ..خليك قوي هيحترموك
محمد صلاح: سيادة الوزيرعندنا وجهة نظر في مسالة الحوار دي نسمعها .
د/محمود حمدي زقزوق : اه اتفضل
محمد صلاح: نسمع الاستاذ سعيد
فاصل
سعيد حلوى- رئيس القسم الديني بجريدة الاهرام: بالنسبة لقضية الحوار بين الاديان انا مختلف تماما مع الرأي اللي بيقول ان هي قضية أتت ثمارها انا شايف ان هي ما أتتش ثمارها النهاردة بعد اكتر من 30 سنة او 35 سنة من الحوار بين اصحاب الاديان، المسلمين ماشيين في شارع الغرب لايتلقى الا اللي هو عايز يتلقاه فقط مع تقديري لكل المسئولين وكل القيادات وكل القطاعات اللي بتنادي ، انا بنادي بالتقارب بين اصحاب بين الاديان سواء اصحاب الاديان او الرسالات لكن شرط انه يكون المرسل والمستقبل على نفس الاتجاه ونفس الشارع ونفس الخط هناك تعصب يمين هناك تعصب يسار لكن في النهاية دول ما يتحسبوش على الدين فانا كل اللي انا اطلبه من اللي هما بينادوا بقضية الحوار بين الاديان قضية خطيرة جدا انا معاهم ان هي قضية خطيرة لكن بشرط انه يكون فيها تفاعل بين الطرفين مش طرف واحد بس الان نحن نرسل والاخر لايستقبل فانا أرجو ان احنا نعيد نظر كل فترة في اللي وصلنا له هل احنا وصلنا لنفس النتيجة اللي احنا عاوزينها ولا احنا بننادي في صحراء ومحدش معانا بيسمعنا
فاصل
د/محمود حمدي زقزوق : شوف حضرتك انا هاقول احنا ليه بنعمل حوار اولا القران نفسه هو اللي قالنا اعملوا حوار بيقول للنبي صلى الله عليه وسلم " قل يا أهل الكتاب تعالوا إلى كلمة سواء بيننا وبينكم "فدا دعوة للحوار ليس فقط دعوة القران ولكن النبي صلى الله عليه وسلم نفسه اول من اجرى حوارا مع المسيحيين استقبل في مسجده في المدينة المنورة وفد من نصارى نجران بقيادة اسقفهم ابي الحارث كان الوفد من 15 واحد ودخل الوفد على النبي صلى الله عليه وسلم في المسجد وبعدين عمل تصرف استفز الصحابة ، خدوا ركن في المسجد وبدءوا يصلوا صلاتهم فالصحابة قالوا الله ايه الحكاية فالنبي صلى الله عليه وسلم قال اتركوهم حتى ينتهوا من صلاتهم تركوهم حتى انتهوا من صلاتهم وبدءوا حوار مع النبي صلى الله عليه وسلم عرضوا عليه مايؤمنون به وعرض عليهم النبي صلى الله عليه وسلم الاسلام وتعاليم الاسلام بروح من المودة ليس فيها أي مشاكسات ولا شئ من هذا القبيل احنا لاننطلق من فراغ ولكن بننطلق من قاعدة اسلامية اصيلة في القران الكريم وفي السنة النبوية الصحيحة والنبي صلى الله عليه وسلم نفسه قال" تركت فيكم ما ان تمسكتم به لن تضلوا بعدي ابدا كتاب الله وسنتي"..اذا القاعدة موجودة محدش بقى يقدر يكح ويجادل في الاسلام دا بيمنع الحوار او بيرفض الحوار دا نقطة.. النقطة التانية بقى جهود الحوار اللي قامت في لسنوات وفي العقود الاخيرة وحتى الان وانها لاتجدي وانها هناك طرف يمين وطرف يسار وكذا ..لا ..انا من خبرتي حضرت مؤتمرات حوار على مدى 30 سنة في كثير من البلاد الاوروبية احنا بنعرض وجهة نظرنا بتكون فيه قضية مطروحة بنعرض وجهة نظرنا والاخرين بيعرضوا وجهة نظرهم ثم نتناقش حول ذلك بيكون فيه تفاهم مشترك
محمد صلاح: مجدي يافندم مجدي
د/محمود حمدي زقزوق : ايوة ..ما انا هاقول لحضرتك فيه تفاهم مشترك بينا وبين الآخرين وبنخرج متفاهمين لكن فيه مشكلة ..المشكلة ان هذا الحوار بيبقى في الغرف المغلقة ولا ينزل الى القاعدة العريضة وبالتالي القاعدة العريضة لا في العالم الاسلامي ولا في العالم الغربي بتحس بهذا الحوار ولا بثمرة هذا الحوار دا المشكلة .. ولذلك بدأنا في هذا الصدد طب نعمل ايه علشان نوصل الرسالة الى القاعدة العريضة سواء في الغرب او في الشرق البعض قال والله من الممكن إن إحنا معارض فنية لان فيه حضارة إسلامية والحضارة الإسلامية دي لها عراقة ولها أصالة وفيها فن وكذا ادي حاجة الحاجة التانية هو قالك ما احنا نعمل برضه تبادل الشباب بين البلاد الإسلامية وبين الغرب دا هيطلع على مالدى الجانب الاخر ويجي التاني يطلع على مالدينا دا اذن فيه اساليب دي مجرد امثلة وفيه طبعا لابد من البحث عن اسليب مبتكرة حتى يكون هذا الحوار ينزل الى القاعدة
محمد صلاح: فيه استطلاع اخير لمعهد جالوب الامريكي قال انه المصريين اكتر شعوب العالم تدينا على رأس 143 دولة انت بتقرا نتايج الاستطلاع دا ازاي ؟
د/محمود حمدي زقزوق : الشعب المصري طول عمره متدين من ايام قدماء المصريين ، الشعب اللي كان يبحث عن الدين هو المصريين احنا عارفين اخناتون اول من نادى بالتوحيد، الاثار المصرية اللي احنا شايفينها العظيمة الرائعة كلها بتعبر عن الرموز الدينية اذا التدين بيجري في دم الشعب المصري منذ الاف السنين البعض اعتنق المسيحية والبعض الاخر اعتنق الاسلام برضه الجينات هي هي فيه فعلا ميل الى التدين لدى الشعب المصري دا حقيقة
محمد صلاح: حضرتك اتصديت لموضوع النقاب وقلت انه عادة وليس عبادة واصدرت الوزارة كتاب عن النقاب واتوزع منه الاف النسخ لكن ووجه باعتراضات من رجال الدين يعني هو رجال الدين محتاجين مع وزارة الاوقاف او تحت أي مسمى اخر يقعدوا مع بعض عشان يتفقوا اصلا عشان الناس تقتنع بعد كده بيهم ولا كل واحد يسال في حاجة فيلاقي اجابة مختلفة
د/محمود حمدي زقزوق : ماهو مش رجال دين اللي بيعارضوا الموضوع دا خالص ..اولا الكتاب دا مكتوب عنوانه النقاب عادة ليس عبادة الرأي الشرعي في النقاب بأقلام كبار العلماء شيخ الازهر قال وجهة نظره، المفتي وبعدين فيه واحد لا يختلف عليه احد شيخ محمد الغزالي رحمه الله ودا في كتبه بيحارب النقاب بشدة لان ليس له اصل في الدين على الاطلاق ، النقاب دا بيلغي شخصية المرأة تماما ربنا خلق الانسان وادى له الوجه دا لما بتكلم مع حضرتك ماهو لازم يكون فيه تواصل بينا وبين بعض التواصل دا عن طريق هذه الرؤية، المواجهة دي بشوف تعبيرات وجهك وانت بتشوف تعبيرات وجهي فبنقدر نتواصل لكن انا هتواصل مع مين انا اقول لحضرتك مرة من المرات من حوالي اكتر من 15 سنة كان عندنا جارة في السكن للي انا كنت فيه قبل كده فجت قالت لي انا وديت الطفلين 6 سنين في المعهد الأزهري في مدينة نصر بعد اسبوع واحد الأطفال مش عايزين يروحوا وبالليل بيحلموا احلام مزعجة سألتها ليه قالت لي المدرسة اللي بتدخل عليهم مش شايفين إلا حاجة سودة كده فانا في ذلك الوقت رحت لشيخ الأزهر الله يرحمه الشيخ جاد الحق علي جاد الحق قلت له يامولانا الموضوع كذا كذا كذا هل فهو على طول فورا اصدر تعليماته بأنه لا يجوز أن تدخل مدرسة الفصل وهي منقبة لازم تكشف وشها وبعد ماتطلع هي حرة ودا اللي حدث بالفعل فانا سالت الجارة دي بعدين بعد فترة كده باقولها ايه الأخبار قالت لي لا دلوقت بيروحوا عادي وكل حاجة وصاحبتنا اللي هي المدرسة بتكشف وشها فالأطفال عايز من يأنس اليه دا طفل لابد اتعامل معاه بود وبحنان طب هو هيعرف الود والحنان دا ازاي ماهو لازم يشوف قدامه حاجة ازاي ان انا اخلي واحدة ممرضة تتعامل مع المرضى وهو مش شايف منها اي حاجة على الاطلاق يعني فلا يجوز اولا يقولك هو دين ..مش دين..حرية شخصية ..طيب حرية شخصية بس الآخرين لهم حقوق وبالتالي مقدرش اجي الغي حقوق الآخرين وأتعامل معهم ازاي ؟؟
محمد صلاح: سيادة الوزير معندناش فتنة طائفية ولكن عندنا توتر طائفي زي الرسم البياني يصعد ويهبط في بعض الاحيان انت شايف الموضوع دا ازاي
د/محمود حمدي زقزوق : هومفيش فتنة طائفية من وجهة نظري ليس هناك فتنة طائفية
محمد صلاح: عندنا حوادث من نوعية واحدة أسلمت أو واحد عاد إلى المسيحية بعد ما اسلم
د/محمود حمدي زقزوق : ايوة ماهو البعض بيستغل هذا ويجعل منه فتنة طائفية يعني اقول لحضرتك انا كنت في لقاء مع طلاب من الجامعة الامريكية منذ فترة قصيرة واثير موضوع ذبح الخنازير واستغربت اندهشت لانه البعض بيعتبر دا ضد الاقباط
محمد صلاح: صحيح فيه البعض حاول استغلال هذا الموضوع لاثارة نزعة طائفية
د/محمود حمدي زقزوق : يعني شئ غريب وشفت انا في التليفزيونن الالماني بيتكلموا عن الحكاية دي ان ذبح الخنازير دا ضد المسيحيين مع إن البابا شنودة نفسه قال إن معظم المسيحيين في مصر مابياكلوش لحم الخنازير وبعدين كل الاجراءات اللي اتعملت بموافقة الإخوة المسيحيين يعني مش ضدهم ولا حاجة هو فيه من يشعل النار هاقول لحضرتك حاجة على الجانبين مش جانب واحد.. هو فيه تطرف من الجانبين ودا لا من مصلحة المسلمين ولا من مصلحة الاقباط
محمد صلاح: المسئولين عادة ورجال الدين طبعا بيتكلموا كلام وردي وجميل عايزين ندخل في التفاصيل شوية خليك معانا لسه الكلام مخلصش
فاصل
محمد صلاح: تحدث الدكتور حمدي زقزوق عن التوترات الطائفية واكد ان مفيش فتنة طائفية واحنا موافقينه على كده سيادة الوزير عندنا رأي من مفكر قبطي نسمعه
د/محمود حمدي زقزوق : آه وماله أهلا وسهلا
محمد صلاح: نسمع
فاصل
سامح فوزي- مدير مؤسسة مواطنون من اجل التنمية: الاحداث الطائفية او التوترات الدينية لها اسبابها المختلفة بعضها يرجع الى تعصب ديني بعضها يرجع الى خلافات حوالين قضايا اجتماعية او اقتصادية او حتى خلافات شخصية ولكن نظرا لان طرفي الخلاف ينتميين الى دينين مختلفين فيتحول هذا الى نوع من انواع التوتر الطائفي بالطبع الحوار الاسلامي المسيحي مطالب بان يتجاوز مثل هذه الخلافات ويعمق أسس الاحترام المتبادل مابين المختلفين في الدين ولكن حتى يفعل هذا لابد أن يتحول الحوار من حوار نخبة الى حوار جمهور حتى هذه اللحظة الحوار الاسلامي والمسيحي بالرغم من عمق التجربة لايزال حوار يجمع النخب سواء كان نخب مثقفة او نخب نشطاء في المجتمع المدني او العمل العام او صحفيين او اعلاميين ولكنه لاينزل الى مستوى رجل الشارع وفي أحيان كثيرة نخشى على رجل الشارع من الحوار ونبالغ في خشيتنا على رجل الشارع من انه يندمج في الحوار وهذه يمكن ان تكون توجه لبعض الجهات او الافراد حينما يرون ان الفصل بين المختلفين هو يحافظ على السلام الاجتماعي اكثر من الاندماج والحوار بينهما الذي قد يترتب عليه نوع من الشقاق او الاختلاف لكن نحن نتحدث عن الحوار الذي تعارفت عليه الخبرة المصرية على مدار تاريخها وهو الحوار الذي يأخذ في اعتباره ان الطرف الاخر طرف يتمتع بكامل الحقوق وعليه وطرف يقوم بالأساس على فكرة المواطنة والاحترام المتبادل ولا نتحدث عن المساجلات التي ينخرط فيها افراد من المجتمع اومايطلق عليهم العوام وهو المساجلات التي تؤدي في النهاية الى نوع من انواع الشقاق
فاصل
محمد صلاح: احنا محتاجين سيادة الوزير حوار مجتمعي يعني زي ما قلت لحضرتك قبل الاستاذ سامح فوزي مايتكلم او نسمع مداخلته انه اه المسئولين بيتكلموا كويس قوي في الطرفين رجال الدين في الطرفين طبعا حفلات الافطار والوحدة الوطنية في الكنيسة وزيارات البابا شنودة لحضرتك وزيارات حضرتك للبابا شنودة وشيخ الازهر والعكس لكن المجتمع برضه بيتكلم عن التوتر الطائفي إحنا محتاجين حوار مجتمعي بين الناس وبعضها محتاجين ايه
د/محمود حمدي زقزوق : شوف حضرتك حكاية التوتر الطائفي دي طارئة على المجتمع المصري يعني انا لو رجعت 30 سنة لورا
محمد صلاح: قبل الزاوية الحمرا مكانش فيه حاجة
د/محمود حمدي زقزوق : على الاطلاق فدا يعني تيار طارئ على المجتمع المصري فيه تعصب أنا لا أنكر ان فيه تعصب لدى بعض المسلمين وفيه تعصب لدى بعض المسيحيين يعني ما نقولش ان كله على جانب واحد دا اكتر من كده
محمد صلاح: في تعصب من الائمة ومن الدعاة
د/محمود حمدي زقزوق : دا ممنوع ان أي امام يتكلم بشيء سيء عن الاقباط
محمد صلاح: دي تعليمات الوزارة
د/محمود حمدي زقزوق : دي مش تعليمات الوزارة دا القران كده
محمد صلاح: لا ماهو القران قال كلام كتير بس الناس بتخالفه برضه احنا بنتكلم عن تعليمات الوزارة
د/محمود حمدي زقزوق : لا لا تعليمات الوزارة ودايما انا في لقاءاتي بالأئمة أقولهم فيه هنا خطوط حمرا
محمد صلاح: انت تثق سيادة الوزير في قدرات كل الأئمة والدعاة
د/محمود حمدي زقزوق : انا باختار ناس طبقا لمواصفات معينة يعني اللي باعينهم كل سنة دول بيكونوا مختارين ومنتقين بعناية ولذلك شوف حضرتك هذا الشباب الجديد متحمس وعنده رغبة في هذا العمل لأنه لو معدومة الرغبة في هذا العمل بالذات هيفشل تماما فكله شباب النهاردة يعني فدول نماذج طيبة جدا وبالتالي مجيش أعمم انما واقول كل وزارة الاوقاف وحشين لما الاقي اتنين ولا تلاتة .هو الواحد من دول لما يصلي في جامع يحكم بقى على كل مساجد الوزارة
محمد صلاح: عايزين ندخل بقى في موضوع الدعوة اللي انت اقمتها للمسلمين لزيارة القدس إيه رأيك ؟
د/محمود حمدي زقزوق : أولا الدعوة دي مكانتش جديدة..كان فيه ندوة في نقابة الصحفيين من حوالي 12 سنة وكان حاضرها قداسة البابا شنودة وكان حاضرها شيخ الازهر وانا كنت حاضر فيها وكانت عن القدس فانا لما جه دوري في الحديث انا قلت يعني احنا اختزلنا قضية القدس في قضية فلسطينية وبالتالي يتم التعامل مع قضية القدس زي التعامل مع رام الله ، الخليل ، غزة إلى آخره
محمد صلاح: سياسية يعني ؟
د/محمود حمدي زقزوق : انا بقول دا إسلاميا دا غلط تماما لان القران الكريم بيقول "سبحان الذي أسرى بعبده ليلا من المسجد الحرام إلى المسجد الأقصى "والمسلمين في كل انحاء العالم بيتعبدوا بهذه الاية وغيرها من الايات فاذا بالنسبة للمسلمين القران بيقولهم دا من المقدسات وبعدين النبي صلى الله عليه وسلم بيقول "لا تشد الرحال إلا الى ثلاثة مساجد المسجد الحرام ومسجدي هذا والمسجد الاقصى".. يعني اللي عايز يزور بيزور 3 مساجد بس
محمد صلاح: ايوة ياسيادة الوزير دلوقت الظروف مختلفة
د/محمود حمدي زقزوق : ماهو هقول لحضرتك المسلمين في السابق كان من عادتهم لان هما حينما يذهبون الى الحج كانوا بيمروا على المسجد الاقصى ويزوروه دي الأسس الاسلامية اللي انا انطلقت منها مش منطلق من فراغ انا عايز نأكد الحق الاسلامي دا نأكده ازاي..ان المسلمين يروحوا يزوروا القدس
محمد صلاح: بتأشيرة إسرائيلية ؟
د/محمود حمدي زقزوق : مفيش مشكلة
محمد صلاح: بفيزات طيران اسرائيلية بفنادق اسرائيلية بالشيكل الاسرائيلي هيتعاملوا
د/محمود حمدي زقزوق : ما انا هقول لحضرتك ان الله مع الصابرين اصل انا بنظر الى الأمور دايما بنظرة عقلانية دلوقت انا لما يروح المسلمين آلاف مؤلفة العالم هيشعر إن دي قضية المسلمين مش هيتهاونوا فيها المسلمين كمسلمين في العالم كله إسرائيل نفسها هتعلم هذا وبالتالي هتجبر على أنها تتعامل مع قضية القدس معاملة تانية احنا بنقول طيب خلينا للآخر لما إن شاء الله كده وبعدين نروح مانلاقيش حاجة يعني ربما الحفريات تستمر وبعدين ينهار المسجد الاقصى لاقدر الله ..انا جالي بقى فلسطينيين منذ 12 سنة مسئولين وغير مسئولين فقالولي ياريت يتحقق هذا ..كان فيه واحد قالي ان كان فيه برنامج في احدى الفضائيات عن القدس وعن الكلام دا اللي انا قلته انا مشفتوش هذا البرنامج فبيقولي جابوا مفتي القدس قالوله ايه رأيك في الدعوة دي قالهم ياريت قالهم نتمنى هذا اصحاب القضية نفسهم عايزين دعم ومش لاقيين هذا الدعم وبعدين فيه نقطة تانية هي إسرائيل مش بمنتهى البساطة والسهولة ان هي هتسمح للآلاف المؤلفة دي انها تزور
محمد صلاح: تفرح ؟
د/محمود حمدي زقزوق : لا ابدا ابدا
محمد صلاح: واخدة مصريين صدر حكم بمحكمة القضاء الاداري باسقاط الجنسية عن مصريين اللي تزوجوا من اسرائيليات خدتهم قعدتهم عندها ليه ؟
د/محمود حمدي زقزوق : لا دا دول رايحين لهدف اخر
محمد صلاح: هتهيء الجو وهتعمل خطوط طيران وهتستقبل فنادق انها تستقبل المسلمين وييجوا يحجوا ماهم عايزين كده
د/محمود حمدي زقزوق : لا انا متوقع غير كده واللي حصل منذ 12 سنة هو كده دا بدأت وفود تروح من الاردن بعض الاخوة الاردنيين قالولي ثم وقفت اسرائيل ذلك لان هي مش بمنتهى البساطة هتسمح لان هي عارفة ايه الابعاد يعني وبعدين حكاية ان انا هاعمل رواج اقتصادي في ابدا الفلسطينين نفسهم قالولي ان الرواج الاقتصادي هيكون للفلسطينيين اللي حوالين المسجد لااقصى
محمد صلاح: الفلسطينيين بيتحاصروا جوه وعاملين لهم اسوار
د/محمود حمدي زقزوق : الفلسطينيين اللي هما موجودين حوالين المسجد الاقصى هوا المسلم اللي هيروح هيشتري من الاسرائيلي ايه هيشتري من الفلسطينيين دول وبالتالي الرواج الاقتصادي هيكون هنا
محمد صلاح: سيادة الوزير خليك معايا لسه الكلام مخلصش
فاصل
محمد صلاح: وزير الاوقاف محمود حمدي زقزوق مقتنع تماما بدعوته لزيارة القدس سيادة الوزير عندنا وجهة نظر اخرى نسمعها وبعدين نعلق عليها
د/محمود حمدي زقزوق : قوي قوي
محمد صلاح: نسمع الدكتور نصر فريد واصل
فاصل
د/نصر فريد واصل-مفتي الديار المصرية السابق: طبعا ماوجهتش الي دعوة من معالي الوزير الدكتور زقزوق لزيارة القدس لكن بالنسبة للموضوع في حد ذاته يعني اعلم ان الزيارة للقدس وهي تخضع الآن لدولة الاحتلال الصهيوني وان الزيارة إليها تحتاج لإذن وتأشيرة دخول إلى القدس من المحتل وهنا القبول بهذه الزيارة تحت الاحتلال وتحت إذن المحتل تعني التطبيع معه والرضائية بهذا الاحتلال وفي هذه الحالة تكون ذريعة لدوام هذا الاحتلال باعتبار أن القدس كما أعلنت هي عاصمة أبدية للكيان المحتل وهذا يعني أننا نوافقها على هذا بدخولنا تحت هذه الدعوة وفي نفس الوقت أقول أنني يعني أعطي لحرية وأعطي الصيانة لزيارة القدس وللسياحة له من الناحية الدينية وبذلك تنحل مشكلة الدعوة الى ان إسرائيل تمنع من يريدون من المسلمين زيارة القدس من الذهاب إليها
فاصل
محمد صلاح: زيارة المسيحيين إلى القدس تعتبر حج لكن البابا شنودة بيغضب عليهم إيه رايك سيادة الوزير في الكلام دا المسيحيين اللي بالنسبة لهم دا حج البابا شنودة مانع الحكاية دي وبيغضب عليهم وحصل قبل كده موقف وكان أثار ضجة كبيرة في وسائل الاعلام حول الذين ذهبوا وحاولوا الاعتذار بعد عودتهم للبابا شنودة وسمعنا كلام من الدكتور نصر فريد واصل وهو شعور بالرفض من أي تعامل مع أي جهة اسرائيلية سوف أمر عليها حتى اذهب الى القدس
د/محمود حمدي زقزوق : شوف حضرتك انا احترم أي وجهة نظر مخالفة لوجهة نظري يعني زي مابدي لنفسي الحق ان انا اعبر عن وجهة نظري ويكون ليا وجهة نظري المستقلة اعطي للاخر الحق نفس الشئ لكن مش معنى ذلك إن انا بقبل وجهة النظر الاخرى طبعا انا اتكلمت وقلت ان حكاية الرواج الاقتصادي هي للفلسطينيين والاخوة الفلسطينيين نفسهم اقروني على هذا حكاية كل الامر بيدور حول تأشيرة وان دا معناه الاعتراف بالواقع دا أنا رايح عشان أأكد الحق الاسلامي وبالتالي مش الحكاية حكاية مصريين اللي هيروحوا دا العالم الاسلامي كله اللي في القران وفي السنة وكلهم بيقولهم دا مقدس من المقدسات الاسلامية فالامر مختلف تماما وبعدين حكاية ان انا هاخد تاشيرة من اسرائيل وبالتالي بعترف.. دا في علاقات دبلوماسية بينا وبين اسرائيل يعني احنا فيه واقع لكن انا مابدعوش الى التطبيع على الاطلاق
محمد صلاح: ايه مفهوم التطبيع من وجهة نظرك ياسيادة الوزير ؟
د/محمود حمدي زقزوق : ان فيه علاقات طبيعية تماما
محمد صلاح: رسمية ولا شعبية ؟
د/محمود حمدي زقزوق : على كل المستويات ماهي خلاص ماهو دا التطبيع يبقى على كل المستويات يعني فيه تجارة فيه تعامل على جميع المستويات سواء مثقفين بيروحوا ويرجعوا الصحفيين ، السياحة من الناحيتين الى اخره.. يعني مايكونش فيه حواجز زي ما يكون بينا وبين أي دولة اخرى يكون بينا وبينها علاقات طيبة دا تطبيع انا مش عايز دا ..انا عايز فقط اثبت للعالم ان لنا حق كمسلمين مش كمصريين اصل الكلام كان هو ......
محمد صلاح: الدعوة موجهة الى المصريين بتطلب منهم هذا ؟
د/محمود حمدي زقزوق : ابدا دا الدعوة دي للمسلمين
محمد صلاح: ماهو المصريين برضه ياسيادة الوزير الاتحادات المهنية كلها النقابات المهنية جميعها مانعة اصلا الذهاب أي حد منهم الى اسرائيل وحتى الى القدس حتى عارف حضرتك في بعض المهمات الصحفية نقابة الصحفيين تنظر الى من يذهب الى هناك وربما تحقق معه في بعض الاحيان زملاء من الصحفيين بيطلبوا التحقيق مع بعض الزملاء اللي ذهبوا الى هناك حتى في مهام تتعلق بالعمل الموضوع فيه جدل حتى للناس اللي بتؤدي عملها فما بالك اذا كان المسالة تتعلق بالذهاب هناك طواعية
د/محمود حمدي زقزوق : هو انا اذا كان المصريين كلهم مش عايزين يروحوا انا مابقولهمش روحوا دا دعوة للمسلمين مليار ونص مليار مسلم في العالم هل راي المصرين هو اللي يعم على هؤلاء واللي هو يتحكم في هؤلاء جميعا ..لا.. وبعدين اذا كان الاخوة الفلسطينيين نفسهم والبرنامج اللي أذيع منذ اقل من أسبوعين ومفتي القدس نفسه قال مفيش مانع
محمد صلاح: سيادة الوزير مش ممكن يكون نظرا لأهمية الفكرة أو حجم رد الفعل المتوقع عليها كان يفترض انه يتم بحثها حضرتك بتوجه الدعوة الى المسلمين وبالتالي كان لابد الحديث مع وزراء الاوقاف في العالم العربي والإسلامي، بعض المؤسسات الدينية ،بعض الهيئات الاسلامية ، منظمة المؤتمر الاسلامي ثم طرحها لان احنا مش ناقصين قضايا خلافية في المجتمع
د/محمود حمدي زقزوق : هي دي اصلها مسألة على المستوى الشعبي انا لما بقول وجهة النظر دي ليست وجهة نظر رسمية دا رأي شخصي كأي مواطن أي مسلم في أي مكان
محمد صلاح: بس شفت عملت رد فعل قد إيه
د/محمود حمدي زقزوق : هو شوف انا احترم كل جهة نظر بس البعض بقى هاجمني هجوم عنيف لدرجة البعض بيقولي اسكت ياوزير الاوقاف اسكت يعني يمنعني من انا اعبر عن وجهة نظري نفسه الحرية انه يقول مابدا له شئ غريب يعني احنا لا نطيق وجهة نظر اخرى احنا عايزين نتعلم ثقافة الحوار وان احنا نحترم بعض وانه يكون لكل واحد مننا وجهة نظر
محمد صلاح: عندي سؤال كده محيرني شوية ليه المسلمين في السنوات الاخيرة يسالوا في كل حاجة في تفاصيل الدين وكان دين جديد ظهر في مكة ودا سببه انتشار الفضائيات او الموبايلات اللي بتسال فيها دلوقت بالتليفون ليه المسلمين بتوع الكام سنة الاخيرة مش عارفين
د/محمود حمدي زقزوق : يعني همتدا شغلوا نفسه بالشكليات دلوقت يعني القضايا الهامة والمصيرية اللي بتتحدث في جوهر الدين مش موجودة ولذلك حضرتك لما تشوف الفضائيات وأنا بسمع لان انا مابشوفهاش اللي بيشوفوها بيقولولي يعني اسئلة مستواها هابط جدا والاجابة عليها مستواها هابط اكتر فدا بقى ناس فاضيين بقى ولا ايه ماهو دا يدل على ان العقلية بتاعة النهاردة الدينية انحدر مستواها لكن انحدر مستواها هي بدأت تنظر للاسلام دا كشكل الشكل مادام مظبوط خلاص يبقى الواحد ضمن الجنة فالفضائيات الكثيرة انتشرت هي بدأت تشغل الناس بمثل هذه الأمور وبالتالي شجعت الناس على الحديث في مثل هذه الأمور اذن لابد أن يكون هناك تعاون المؤسسات التعليمية الاعلامية
محمد صلاح: وزارة الاوقاف؟
د/محمود حمدي زقزوق : وزارة الاوقاف انا لا اعفي وزارة الاوقاف بل بالعكس وزارة الاوقاف في المقدمة في وش المدفع ولذلك أي حد بيلاقي حاجة بيحط على دماغ وزارة الاوقاف على الرحب والسعة وبتنتقبل كل نقد وبصدر رحب وبنتمنى ان احنا نصلح كل حاجة ودا مهمتنا فأهلا وسهلا بالنقد يعني
محمد صلاح: تحاورنا في كل الموضوعات التي يمكن الحوار فيها ففي الدين لا حياء في العلم تحاورنا مع معالي وزير الاوقاف الدكتور محمود حمدي زقزوق اللي قال كلامه معانا النهاردة يارب يكون كلام جميل كلام معقول بس اكيد كان كلام ...... مسئول خلص الكلام نلتقي في الحلقة المقبلة